عا جنب غرفة نومك من سنين ............. مرأت الغيمة وبكيت عياني
وطلعت مع الشباك شجرة تين .............. ترافق صباكي ومنك تعاني
ومن الطيور ومن العشاقين ................ يزورا تنين يزورك تماني
وما طعمت من كوازها حزازين ............ أد ما طعمتي عيون جوعاني
ليلا صلى ودموع قديسين ................... وليلك عطش وطيور برداني
وهيي بيعريها هوى تشرين .................. بتنطر سني فستانها التاني
وإنت رغم ما عندك فساتين .................. بتقضي ليالي الشوق عرياني
ريحت قميصا عطر ورياحين ................ وريحة قميصك خمر وأناني
وبينك الفرق وبين شجرة التين ............... هيي بتجهل بالسني مرة
.......................... وإنتي عاطول العمر جهلاني .................

مرة سحرني الهوا بألب القفص عصفور .................. وهديو لأبوكي وما كان القصد كرمالو
كرمال عينك إذا بدك غناني طيور ........................ يسهر يغني لكي وتفغي عاموالو
بالليل جبتي القفص عاغرفتك والنور ..................... تسلل ومن فتحة الفستان ضوالو
وما كان عندك علم تاتستري المحظور.................... . العصفور هيدا أنا ورح ينشغل بالو
ولما كشفتي الدهب صار العجين يفور .................... وطيور خلف الحرير عازوقن يلالو
وبلش بهاك القفص يتحرقص ومقهور ..................... بدو يدوق الحلا ومش قادر يطالو
ولما دلقتي الدهب عشراشف المقصور ................... صارو طيور التلج يتغنجو قبالو
تشردق بدمعو وبقي بين العتم والنور .................. يشبق بهاك القفص حتى قتل حالو

زرتك فتحتي إلي وإلتي تفضل فوت ..................... مدري بي بيت الزجل مدري بالمديني
وبلش يموج الحلا ويتوهج الياقوت ............................. والورد جوري الحلا والتلج صنيني
ورحتي تردي الغطا عارخامك المنحوت ........................ وتاتسكتيني بإشيا ما بتعنيني
إلتي عاوهج الشمس عم تحترق بيروت ......................... وإنتي عاوهج المباسم عم تحرقيني
مازال عندك دوا يرد الضجيج سكوت ............................مشان الله عاحالي ما تخليني
أو أطبي هالجرح أو خليني موت ...............................عن يد غيرك ما بدي علاج يشفيني
شحشط ورايي الهوا أحلام عشتروت ............................ وهلأ وراك أنا عم شحشط سنيني
وضليت لوم الدني وأول لبحبو خوت........................... وإضحك عا أهل الهو حتى خوتيني

بهونيك ليلة شتي كان القمر نعسان ...................... والنهر يزرع نغم والأرض غفياني
والجرد يشلف تلج ويجلد الصوان .................................ومزراب سطح البيوت يرندح غناني
وختيار آعد عاجنب الموئدة وبردان .............................. وشبيب يورق غزل مع بنت جهلاني
يعني بهاك الزمن فاق المعنى وكان............................... في كل محضر إلو جولات رناني
يصدح بعرس الجبل ينقال بالأحزان .............................. ينخي رجال الفدى عا ظلم عثماني
يغل بنشيد الصلاة ومباخر الرهبان ............................... يسهر بجامع صلاة بتقدير رباني
ولم صار في تلفزة وألفسبرسليبان ............................... تدني مقام الزجل بضياع أوطاني
وبعصر جاكسون ابتديو يسمعو الشبان ........................... ساعة أوربي النغم ساعة أمريكاني
وبين التراث الحلو وما بين هالألوان ............................ تا تعرفو مين أنا وأديش عم عاني
شاعر صرفة العمر غربة وسفر تعبان ............................ إحمل تراث الحلو من بلاد للتاني
ومرة عزمني سفير بغربة الهجران .................................. وألو لأبنو وأنا وعم رندح غناني
الضيعة وشعر الزجل يا بني وعلم لبنان ............................ بدك تحبن سوى تاتكون لبناني