]عيد ميلاد سعيد
====
يحتفل باسل اليوم ، في الامارات ، بعيد ميلاده السعيد .. واشاركه فرحه ، باحتفاله هذا ، بان أقدم له، القصيدة التي كتبتها ، في الذكرى الأولى لميلاده ، ولم أنشرها حتى الآن ..
قلت فيها :
**
باسل .. يابابا .. يا حبيب الروح
من طيب عطرك .. تستحي الأزهار
باسل .. يابابا .. والقلب مجروح
شو بقلّك .. بعيد مولدك .. !! محتار
مسموح .. اني اختمر .. مسموح
مسموح قلبي يصير شعلة نار
مسموح دور بهالبراري وسوح
جمّع ولم من الطبيعه زهار
ضمّا لقلبي وشمشما وتفوح
ريحة عبيرا ويعبق المشوار
واحكي سراري ، وبالخبايا بوح
وللناس كلن انقل الأخبار
وفلن أنا بأرواح صرت بدال روح
من عاشر الأيام من ايار
**
باسل يابابا .. صورة العمر الهني
يحميك ربّي ، ومتل ما يقدّر تصير
باسل يابابا .. شقد حلوه هالدني
بالقرب منّك يا حبيبي ، يا أمير
لو كنت غاطس بالفقر بصبح غني
وسجاد عندي بتقلب بنود الحصير
وساعة عمر بتصير ايام السنه
والعمر مهما يطول !!! بيضلّو قصير
بضحكه زغيره تردني للولدني
تسلم يا غالي بحبك البابا أمير
**
طلّيت .. مع ايار .. مع فصل الربيع
شهر العباده والصلا أحلى الفصول
طلّيت .. ورده مفتّحه..بصدرو الوسيع
طليت .. زهره .. نزيّن حفافي الحقول
طليت .. سحرو الفاتن .. وذوقو الرفيع
طليت .. شمسو الضاحكه .. وبدرو الخجول
طليت .. مجدو الخالد .. ولونو البديع
ونغمة طيورو الشاديه ولحنا البتول
تحميك مريم .. يحفظك .. ابنا الوديع
تكبروتنمى .. والعمر.. يابني .. يطول
**
باسل .. يابابا .. بمولدك .. حل الندي
عا قلبتا .. والعمر ..حليت طعمتو
ميسون .. قبلك .. قلبنا .. بحبا بدي
والعيش معها .. شقد طابت لقمتو
وصفّا عمرنا.. غصون خضرا .. مورّده
والزهر .. ماليها .. ويا محلا بهجتو
والطير .. باكر .. ع سطحنا .. يهتدي
يغنّي الأمل .. والحب .. هو ورفقتو
وللشعر.. صرنا نحن .. يا روح ..نشدي
لأحباب قلبي.. شعر ، حلوه نغمتو
والعمر.. منحبو.. بعزيمه .. مجدّده
منشانكن.. انتو . يا روحي.. غايتو
تا بوسكن .. ما عرفت .. من وين ببتدي
بوجه.. كل واحد .. التاني .. صورتو
تعيشو العمر .. انتو .. رجايي ومسندي
ويحميكن الفادي .. يسوع .. وميمتو
*******
المهيري / العاشر من ايار /

جرجس وديع الموراني