سحبت ريشة و حـبر من دِرجي = و ورقة بقلب الدِرج مندرجي
و مطرح مَ قلّي المجد قوم طلاع = علقت عــيوني بأوّل الدَرجي

قلّي شو صرلك مد صوبي الباع = تَ ارفعك عمــــــلاق عَ برجي
حسّـــيت بالآلام و الأوجـــــــاع = و صارت كأنّو حالتي حرجي

قلت كيف بحــــــــــس بالإبداع = و بسرج عَ خيل الموهبي سرجي
و شايف شفيق لْ منزوي ملتاع = و بالقِِلب راكب مُهــــرة العَرجي

يمكن شفيق بقلب صحرا ضاع = و صار يحــــــلم حـــلم بالمرجي
شعرو ضحل راكد بعـــتم القاع = لا تفضــــــــــحو قدّام جوهرجي

من كتر مَ بقلبو حشو بيـــــساع = ما بْتعرف المطـــلع من الخَرجي
و كل حرف مــــــلزّقو بْلمّـــاع = مَ بتـــــــــسحبو بقدّوم كِندرجي

عزمتك على بيت القصيدة شعاع = حتّى شو في عندك حلا تفرجي
طلعت برأي الشـعّار بالاجمـــاع = متل لْ فتح صــــــندوق للفرجي

قلــــــــــت بدّي ارفعك لقـــــلاع = مجدي و لو ما كـنت من خَرجي
مدّيــــت ايدي رَدْ ايــــــدو دراع = كــــــــيف بدّي ارفــــعو و علّيه
عيونو لَ فوق و ما بيـــــسترجي

**
شعر عصام يوسف


---------------------------