يا خيّ بيدق .. كلمة اللّه بسوريا و لبنان بتنلفظ متل ما قطّعتا أنا ..و كمان متل ما قطّعتا إنت ..و لمّا حطّيتها بالشكل الوارد بالشطر تبعي , ما فيك تقلّي لازم تلفظها بالشكل التاني و متل ما قطّعتها إنت .. لأّنو الوزن إيقاع و الإيقاع موسيقا و الموسيقا سمع و متل ما بتسمع بتحط التقطيع الموسيقي للوزن .. فإذا كانت كلمة و الله عم إلفظها وَلْ لَ اْ ما فيك تقلّي بالتقطيع لازم تعملها .. وَلْ لا هِ .
و كمان كلمة شطرنج .. كلمة أعجمية و ما فيك تضبط تحريك هيك كلمات و خصوصي بالعاميّه
اليوم بالأخبار مثلا .. وردبمحطة الجزيره الفضائية كلمة فلوريدا .. اللي ممكن تنقال فلوردا .. و كمان غيرا كتير .. إذا هيك بالفصحى المضبوطه بألوف القواعد من النحو و الصرف .. فكيف باللغه العاميّه .. اللي ما في قواعد ضابطه إلها و بتختلف من منطقه للتانيه ..
و لهالسبب أنا شكّلت كلمة شطرنج وقت كتبتها بالحوار بيني و بينك
و كلمة (اللي ) كتبتها هيك لأنّو معروف .. بتتقطّع سماعي لْ لِ
بالفصحى بتقول: اللي ما بتلفظوا .. يحذف و ما بيدخل بالوزن .. ليش ما بتطّبق هالشي عاللغه العاميّه و بتقطّع متل ما بتلفظ ..
من شان هيك نقطة الخلاف بيني و بينك : إنت بتقول التقطيع بالفصحى متل العاميه و أنا ما بوافق هالكلام .. و هالخلاف حول الأبيات بيّن هالشي ..
الإيقاع الموسيقي بالتنين نفس الشي .. بس الكتابه العروضيه بتختلف
أنا بحكي لغة عاميّه .. بلفظ فيها كلمة معيّنه بطريقه معيّنه .. ما فيك تطبّق عليها قواعد لغة تانيه و تلفظها بطريقه تانيه .. حتّى لو كانت هاللغتين من جذر واحد ..
بالفصحى بتقول اثني عشر.. و بالعاميّه بتقول تنعش .. كيف بالتقطيع بتلفظ تنعش متل اثني عشر .. بعتقد ما بتظبط .. و هيك كلمة اللاّ ما فيك تلفظها متل اللّه بالفصحى .. حتّى لو كُتبت متلها عا سبيل الصدفه و إذا شايفا إنت غلط رح إكتبها من يوم و رايح اللاّ ..حتّى ما تخربط بينها و بين كلمة اللّه باللغه الفصحى .. بس نحنا منكتبها هيك لأنّو الناس متعوّدي تقراها هيك ..
و ما في قواعد للنحو و الصرف باللغه العاميّه إلاّ ما هو دارج و سماعي ...
برجع بقلّك .. الوزن بالفصحى و بالعاميّه نفسو لأنّو الوزن موسيقا و الموسيقا هيّ مشتركة بين الشعوب بينما التقطيع العروصي بيختلف لأنّو كل لغه إلها قواعدها بالنحو و الصرف
هاي وجهة نظري و وجهة نظر معظم شعراء الزجل بسوريا و لبنان على أقل تقدير .. و أنا بحترم وجهة نظرك
و شكرا إلك عالجهد اللي عم تبذلو بهالمنتدى و يعطيك العافي
عصاممعمحبّتي  |