يا مشتاوي الزجل والشاعريي=قبل ما تعجّل بحكمك عليي
وقبل ما تقول أني مش مهذب=تعا نوضّح هالامور الخفيي
دخل عا منتدانا هون ثعلب= بحيلة مكر متلو جهنميي
ومشاكل عا جميع الناس سبب=بظني بهالقضيه عنصريي
وانا شاعر لكل ملقى مدرب=ترد الخصم عا بيتو ضحيي
وإذا عمل السما للشعر ملعب=السما بتسجد قبالي منحنيي
لمن صار عالضربات متعب=وطبل راسو انطوش من تحت ديي
عملني إجر كرسي وما تأدب=وأنا مرّقت هالكلمه الشقيي
افتكر حالو بهالحجه تغلب=عا إستاذ الادب والعبقريي
ووقف في وجه موهبتي مطنب=ونسي قدرة جواباتي الذكيي
ووقت ما شاف حالو قد أرنب=قبالي زت كلماتو الغبيي
وأنا لهالمستوى ما كنت برغب=تا إنزل من سماواتي العليي
وإذا جوي بشي لحظه تكهرب=وجاوبتو على ذات المزيي
مش معناتها الاحمق الاجدب=ربحني ونال شهره عالميي
بموسى زغيب مستقوي ومعجب=وموسى ما إلو علينا وصيي
موسى وصـّلو حظو المهبهب=وانت حظك معي عملك قضيي
من غير مدرسه ومن غير مشرب=ولو موسى بنفسو طهر نيي
ما قضّا العمر يتفزع ويرهب=من الزين ودروبو الحربجيي
وانت متلو بتتخبّا بتهرب=وما في عندك ثقه بنفسك قويي
بأسامي مش حقيقيه محجب=جبان وعم بتعمل عنجهيي
بربيع ومرهج وأعور وأحدب=وNoor و kelb ورقيه وعليي
وسمير وطانوس ونجم المدنب=وجحا وسقراط والعله الخفيي
وألف موسى عا جنبك لو بتسحب=على حفلة تحدي منبريي
سويه بترضعو الرمح المكعب=وسويه بتركعو قبالي سويي
يا منشار التجدد يا مقلـّب=برقصة خلوعه وفلتة صبيي
لا بعتل همك ولا فيك برغب=إن كبرت اجر للتقليد فيي
أنا ركيزة أساس بكل مذهب=اذا قصيتني أكبر خطيي
الحداثة من نبوغ الأصل تشرب=الما عندو أصل ما عندو هويي
وعلى توب الشرف إياك تقرب=شرفنا أرز وقفاتو أبيي
ما فيي غير قلك روح تضرب=يا منشار التجدد والعماله