شرق الشمس داري وخلف داري = سما.. فيها بکفّي نجوم داري
وطقسي لحن بيزنطي بتسهر =عصوتو الريح تايطلع نهاري
خلِقت كون وتحجم الكون يكبر= قْبَعِت سقف الخيال بطلْق ناري
وشفت موسى زغيب بقصر مرمر= وضحكلي وقال كيف حالك ياجاري
وعطاني كاس من غيمو المعصّر = عبير متلّتو بصدر الحواري
وعطيتو خبز تجديدي المقمّر =ع صاج ملوهج بلمعة قماري
وصفي يسكر ويوعى وصرت أسكر= وأوعى بانبهارو وانبهاري
ويابنّوت: القساوه مابتظهر= اذا ماكان خصمي من الضواري
وأنت قرقور عالمنبر زغيّر = ولولاالصّوف دبحك مش تجاري
وقت دفشوك رفقاتك ت تثأر= بعدما تقهقرو من انتصاري
رجعوا فيك شمتوا وقت زمجر= المحيط الأطلسي و غرّق "كناري "
وعلى حفلة زجل لُو رفيق فکّر= تيعزمني وجنابك عمتباري
مارح أدفع تأسمع هيك محضر= أنا بعطيك تاسكت مصاري
لقب البوعلي للزّين کسّر = سيوف وفزّع وحوش البراري
وعلى دورك صفي مشرشح معتّر= ڧيه يشلّحو سيفو مكاري
واذا الزغلول عاقصرو المقدّر= جابك طقم لسنانو عياري
م جابك قبل مابالعمر ختير = وبقصرو صار لازملو جواري
وعلى التجديد ياشاعر مأخّر= تعا ت تدوزنك رنة وتاري
التجدد روح من سجن المسکّر = انطلق عن ثورتو كاتب و قاري
ومش مقيّد بجيل وْلا مسوّر = بوقت .. ومش بأصلو انتحاري
أنا بالعمق بحكي .. بحكّ جوهر = المعْنى بلمّعو بماس ابتكاري
بخيالي منبر الكلمه تشجّر = شجرأشقر شرب مهجة جراري
وبعيني تحمّم الالهام أكتر = من الرّمل ل عشطّ البحر عاري
وبقلبي النور ايقونه مصوّر = بترشح عطر بتوشح شعاري
وصرت زعقة جمال بكل منبر = دهنت الريح لونت الصحاري
کأنّي نهر عاصي بمي دوّر = نواعير التحدي عْلى مداري
وهلق ياحسن ضلّك تذکّر = مين ل بلّش ب "ذات الصواري"
أنتي طمعت تتباري الغضنفر = وماكانت هالبدايه باختياري
وبعد "أم المعارك" مابتخسر = وبوكرك تختبي وناري تداري
بدي خبرك تالكل يخبر = البدايه مش قراري بهيك عركه