*****
عجيبه وين رحت دخلك عجيبي=يا توأم يا سيامي يا عجيبي
إنت شو دخلّك مع ناس عاشو=وماتو... وخلّدو حروف الكتيبي
*****
ذكرت زين وأنا بكلمات... عا شو=كتر هالحكي... إسمع يا حبيبي
الحكي المنك بيطلع عا بلاشو=ما بيغبّر على الناس الاديبي
*****
ملوك الشعر ساعة ما تلاشو=وخلي المنبر من عقول اللبيبي
حسن بنوت جدد انتعاشو=من المهجر... من الارض الغريبي
وسراج الليل صار ينده فَراشو=على مسافه البعيدي والقريبي
وعلى وب سايت عم بيشع شاشو=طلقت صرخات قصداني الرهيبي
*****
إذا في ناس موهبتي تحاشو=ما فيي عدّها عليي مصيبي
ما زال زغلول سجّل إندهاشو=بأشعاري بمرجلتي بلهيبي
وبشحماتو بلحماتو برياشو=إجاني وقال (يا شيخ الشبيبي
تركني بو علي يحرق حلاشو=يا ريت تكون بالجوقه نصيبي)
*****
وأنا مش مطمعي بمجدو ومعاشو=ولا بدي هالسخافات المعيبي
الزجل اولى من العرش وفراشو=وإنت للعرش تا توصل غصيبي
*****
فيق وزيح عن عقلك غباشو=وقعه وقعتها ببحر الكريبي
تا توصل للعرش يا حص كاشو=بيلزملك ألف سيبه وسيبي
لا فاتح قادر يفيدك نقاشو=الدخل قبلك زواريب الهريبي
ولا حسان رح بيزت شاشو=ولا يلمّك يا بو الوجه الزبيبي
*****
راجع شعرك بتقشع هشاشو=قصايد من عهد ستّك نجيبي
سطحيين فوفيشات فاشو=ما عندك من حلا الكلمات طيبي
الزجل بدو حرب بدو كباشو=وكتيبي تهجم تلاقي كتيبي
ما بدو ناس غميو وناس طاشو= ولاسلمى تندب وتنعي شكيبي
*****
بدو بو علي يروي عطاشو=برمح الزين وسهام المصيبي
وألف فاتح وبسطاطي ما حاشو=الدم للي انسكب منك سكيبي
أنا الشاعر الافكاري تماشو=مع الاجيال لاكن رغم طيبي
إلاه الكون لو بيحط كاشو=وطلبني عف عن روحك يا راجح
ما بقبل غير من روحك ضريبي
*****
*****
*****
شيل الكذب من شعرك وحط الصحيح=مين للي راسل مين يا شويعر كسيح
ومين للي حطم مين قللي يا فصيح=ولليوم كفّي بخدك معلّم مليح
لما قبرتك هالارض صارت تصيح=شو خطيتي تا قبرت فيي هالقبيح
زتّت فروعك بالسما تا تستريح=وعين القمر من هالابر مش رح تزيح
أهلا وسهلا فيك عا سطح القمر=جايي وناقل من ضريح على ضريح
*****