سلامات يا ثناء..
بعد شكر حضرتك بدي قول شي..
الست فيروز إلها قريب الـ 1000 غنية (لسا ما قدرت إحصر العدد مزبوط لإني بعدني عم بشتغل على أرشفتهن).. المنشورين منهن حوالي الـ 630 غنية (بين غنية وسكيتش غنائي).. وهيدول كلهن بالألبومات المنشورة الموجودة بالسوق (في بعض ألبومات قليل ما تلتقى.. بس موجودة)
المشهورين منهن (أو المتداولين، يعني اللي بينذاعوا كتير وبتعرفهن معظم العالم) حوالي الـ 400 غنية مش أكتر..
الفكرة هون إنو الأغاني اللي حطيتيهن حضرتك لهلق هني من الـ 400 
"سمرة يا ام عيون وساع"، و "ما أحلى الرجعة بكير" و"سمعنا سمعنا" كلهن من ألبوم "يا ترى نسينا" وهالألبوم موجود بالسوق.. (وكل هالأغاني من كلمات وألحان الأخوين رحباني)
"الله معك يا هوانا" من مسرحية "لولو" (من كلمات وألحان الأخوين رحباني)
"تخمين" أو "كم بنفسجة" من مسرحية "البعلبكية" (كلمات ميشال طراد وألحان الأخوين رحباني)
"يا كرم العلالي" نشرت هالغنية بتلات ألبومات "البعلبكية" و"الإسوارة" وألبوم "تغني فيلمون وهبي" (كلمات الأخوين رحباني وألحان فيلمون وهبي)..
مش عم قول هيك مشان ما بقى تتابعي هالموضوع.. بالعكس.. بس حبيت ضيف معلومة قلال اللي بيعرفوها.. وإذا قدرت رح شارك معك بهالموضوع بكام غنية (لإنو صعب عليي بهالفترة إرفع غنية ع النت.. لإنو الاتصال عندي بيعلّ!!)
آخر شي.. ملحوظة صغيرة.. بدي إعتذر منك قبل ما قولها..
الصورة اللي أرفقتيها حضرتك تحت غنية "سمرا يا ام عيون وساع" بظن هي لـ "مطربة" المصاصة "ماريا".. صراحة تفاجئت بس شفتها بهالموضوع!!! إنو أكيد لا هالموضوع ولا هالغنية إلهن علاقة فيها (عني.. الوجه الغبي ما بشوفو حلو)
و.. صوري
تحياتي
__________________
حلمي أن أرى الدنيا بلا عسكر
|