الحضارة

وين الحضارة يا بشر ؟؟
وإيمتا أجت عالكون
شو وينها تخمين ؟؟
ومن وين بدها تطل ؟؟
وتقدم صور
ونحن على باب الخليفة
ناطرين !!


قالو لنا:
كانت بأرض الصين واليابان
وهربت لفارس عن طريق الهند
من كونفوشيوس من زمن وزمان
ومن بيدبا انبلت بمي السند

وهربت لأرض العقل والانسان
ارتاحت انبسطت بالشمس والبرد
وتمددت هونيك باليونان
وتدحرجت عالبحر والشطآن
وع ايد ذو القرنين بلشت ركد
من مطلع الشمس البعيدة
لمرقد الانسان

وقالولنا رجعت على بغداد
وارتاحت من الركد
وشافت شبابا هون بالاسبان

***

قلي يا فاتح
وين كنا وين
معقول هيك تخلعو الايدين
وصرنا ع باب السلطنة
الكتاف تزحم عالبواب كتاف
والجوع عامل ولدنة
والبهدلة
والسعدنة
بتنضاف
شو وين راحو وين
ماضل فيه شغلة زغيرة نشوفها
غير اللي ما بينشاف