اسير وعدت يا امي استقبليني = أسد جبار راجع عَ عريني
تعالي كَحِّل بدمعك عينيي = وما بدي على اسري تعاتبيني
قَسَم بالله ما خِفت المنيي = ولا في موطني تزعزع يقيني
لوحدي كنت عم قاتل سريي = ثابت في مكاني وفي كميني
ولما تكاثفو الاعدا عليي= صحت يا كْلَشِن* بالك تخذليني
ورشقت العِدا كم صلوة قوية = وإختلط صوت القنابل مع عنيني
ولحتى الدم خططلي يديي= اغميت وقلت كنو إقترب حيني
وفقت يا امي عَ لقطة اجنبيي = والضرب ييجي بشمالي وعن يميني
وكل ما يسالوني عالهوية = جاوبهم مقاوم فلسطيني
هذا الْ صار وهذا الْ جرى فيي = وبدي اسالك وتجاوبيني
ما بسال عالزعامات الدنيي = ولا باسم خاين بتاديني
بدي اسالك عالمعنوية = بمخيمنا يا امي طمنيني
وبعدت يا امي لبلادك وفيي = لحيفا ويافا والقدس وجِنيني
وبعدك بتطربي عالبندقية = مع الطلقات كنتي تراسليني
واخيرا اسمعي مني الوصيي = امانة تسمعيها وتفهميني
مالي ثرا اللا البندقية = هيي الوحيدة الْ بعدها اميني
وبعدها تعي يا امي ونور عينيي = إن كنت إخطيت يا امي سامحيني
ما راجع من بلاد البترولية = لحتى جيب شَهَادي ثميني
لكن جبتلك احلى هدية = زهرة عشق من ارضي وبلادي