18-03-2006
|
| |
]تحية الى الأم ... في عيدها
=.=.=.=
الى أمي في عيدها الوطني ... والى كل أمهات العالم
==============
ليلة عيدك يا أمي
شو راح بدي اهديك
راح اعمل قلبي ضمة
من الورد تبوس ديك
**
واركع ع جريك الحلوين
وصلي للرب العالي
يزيد سنين العمر سنين
والصحة عليك تلالي
**
يا أمي والدنيا أم
محبتها بوسعا كبيرة
وبقلبا بتعبي الهم
وتقضي عمرا بالحيرة
**
يا ما تعبتي يا أمي
حتالي ابنك يرتاح
وقديش كنت تهتمي
حتالي عيش الأفراح
**
يا ما سهرت الليالي
جمني حتالي نام
وضحيت العمر الغالي
حتالي تحلى الأيام
**
عمرك كلو قضيتيه
تعب وهموم كتيرة
وزيت سراجك شعلتيه
على دروبي بكل الجيرة
**
يا ما تحملت البردات
بايام الشتوية
ويا ما دوبت التلجات
من دروبي بالحنية
**
ويا ما ربيع الايام
بالبقجة حملت زهورو
وجبتيها ومعها الأحلام
لابنك حتى تزورو
**
يا ما بايامات الصيف
عرقاتك بلو تيابك
تتجيبي للغالي رغيف
وبحبو تعلا بوابك
**
وخربف العمر بطولو
شقى واتعاب واحزان
ويقولو شو ما يقولو
بيكفي قلبك فرحان
**
حملت تعب هالأيام
كليتو فوق كتافك
عيونك تسهر عيني تنام
وتبقى البسمة على شفافك
ولحافي من ريش نعام
وهموم العمر لحافك
يا أمي طول الأيام
ما بقدر وفي وصافك
**
يا أمي طول الأيام
راح يبقى قلبي يحبك
ياامي عيوني ما بتنام
الما حن عليها قلبك
**
يا أمي بميزان الحب
بيبقى الراجح ميزانك
لو مهما حبك هالقلب
بيطلع وردة ببستانك
**
يا أمي الربيتيني
طفل زغير عالدادي
وكبرت وجوزتيني
وربيتي معي ولادي
بسأل ربي يعطيني
محبة قلبك زوادي
ورسمك يبقى على جبيني
وباسمـــــك قلبي يــــــــــــــــــــنادي
===================
المهيري / عيد الأم / 2006
جرجس وديع الموراني
]  |