نفاض جناحك يا آدار
وعلّي بالعا لي العا لي
على جبينك اكليل الغار
من عيد الأم الغالي
**
أحلى كلمة كلمة أم
وأعظم معنى معناها
شمل العيله الأم تلم
وويلا العيله لولاها
**
الدنيا كلا هيّ الأم
محبتها بوسعا كبيره
وبقلبا بتعبي الهم
وتقضي عمرا بالحيره
**
الأم بتتعب ليل نهار
حتى ولادا يرتاحو
وقلبا مستودع اسرار
ومع ولادا مفتاحو
**
الأم بتسهر طول الليل
حتالي ولادا ينامو
وبقلبا بتخبّي الويل
وابنا تحلى ايامو
**
عمرا كلّو بتقضيه
تعب وهموم كتيره
وزيت سراجا بتضويه
بدرب ولادا بالديره
**
الأم بتحمل البردات
بأيام الشتويه
ومن درب ولادا التلجات
تدوبهن بالحنيه
**
يا ما ربيع الأيام
حملت بالبقجه زهورو
وجابتها ومعها الأحلام
لأبنا حتى تزورو
**
يا ما بأيامات الصيف
عرقاتا بلّو تيابا
تا تخبز للغالي رغيف
وبحبّو تعلا بوابا
**
وخريف العمر بطولو
شقى وأتعاب وأحزان
ويقولو شو ما يقولو
بيكفّي قلبا فرحان
**
بتحمل تعب هالأيام
كلّيتو فوق كتافا
عين بتسهر ، عين بتنام
وتبقى البسمه على شفافا
**
بعيدا .. شو بتحلى الكلمات !!!
وشو بيكبر مضمون العيد!!!
حروف اسما ، مطلع آيات
بصلّيها ، وكل يوم بعيد
**
بليلة عيدك يا أمي
أيشو بدّي اهديك
راح بعمل قلبي ضمه
من الورد تبوّس ديك
**
واركع ع جريك الحلوين
وصلّي للرب العا لي
يزيد سنين العمر سنين
والصحه عليك تلالي
**
يا أمي بميزان الحب
بيبقى راجح ميزانك
لو مهما حبّك هالقلب
بيطلع ورده ببستانك
**
يا أمي الربّيتيني
طفل زغيّر عالدادي
وكبرت وجوّزتيني
وربّيتي معي ولادي
بسأل ربّي يعطيني
محبّة قلبك زوّادي
ورسمك يبقى ع جبيني
وباسمك قلبي ينادي
*****
رائعة هذه الكلمات .. رائعة هذه المعاني .. رائعة هذه القصيدة ، بل إنها من
عيون الأدب الصادق العاطفة . كم نحن سعداء إن سمحت لنا أن نقول ، إنك
باسمنا جميعاً قد أنشدت الأم شكرنا فأبدعت أيما إبداع .. شكراً لك !
مع تحياتي وتقديري العميق لشخصك الكريم
ريّان الحلو ـ ألمانيا في 19.3.2008
لوحة التحكم الخاصة بك
خروج
بحث
الأعضاء
التقويم
