عيد المعلّم
========
عيد لمعلّم صفحة مجد
من كتاب الكون الأكبر
عيد لمعلّم عهد ووعد
من الجهل الكون تحرر
**
عيد لمعلّم شمس الكون
بتضوي وبتزيح العتمات
لمعلّم وين ما بيكون
نور وأفراح وبسمات
**
عيدك يا معلّم ميدان
للشعّار وللكتّاب
اسمك يا معلّم عنوان
علوم وتاريخ وآداب
**
حروف اسمك يا معلّم نور
ينورنا ويعلّمنا
يغلق دور ، ويفتح دور
ومفاتيحا يسلّمنا
**
الميم الأولى، منبر حر
عنّو زرعت علوم علوم
وكل معلومه عطيتا سر
فيه بتسما ، وفيه تدوم
**
وعينك ، عين الما بتنام
سهرانه تجمع أنوار
ما بتسأل مهما الأيام
ومهما الدهر عليها جار
**
ولامك، لام القول الحر
العلم الشمس الما بتغيب
نور يميّز فعل الشر
من فعل الخير الحبيب
**
الميم التانيه، ميزان
للمعلوم وللمجهول
ميزان بيحمل أوزان
بتوزن كل فنون القول
**
تسلم يا باني الأجيال
ممشّيها على دروب طوال
نشالله هالعمر الغالي
بتعيشو مرتاح البال
**
وتفرح بعز عيالك
بدربن تصرف أموالك
وبالحب الناس يقولو
يا معلمنا نيالك
**
وتفرح بزواج ولادك
يللي فلذة أكبادك
ومعهن من بعد زواجن
تفرح بزواج احفادك
**
ونحنا منبقا طلاّبك
شموع تضوّي على بوابك
مهما علينا وكبرنا
منبقى كلمة بكتابك
**
كل المجد من جهودك
الله يديم وجودك
ووين ما رحت تلاقينا
ورده حلوه من ورودك
*****
بكل المحبة والاحترام ، اهدي قصيدتي هذه الى... معلمي الكبير / نعمة ديوب جرجس/والى صهري /الياس ابراهيم الموراني وأختي زوجته / والى ابنتي ميسون؛العاملين في حقل التعليم ، والى كل معلّم ومعلمة.... سائلا الله للجميع الصحة والسعادة
وكل عام والجميع بألف ألف خير
المهيري / عيد المعلّم / آذار/
جرجس وديع الموراني
 | 
