عيد الأب
=======
هذه شمعة أضيؤها لروح ابي ، وأقدمها تحية لكل أب في عيد الأب
-----------
عيدك انت يا بيّي
تاج على عياد السنة
يا بو الهمة القوية
بايدك عمّرت الدني
**
عيدك عيد الرجوله
البطوله والانتصار
يا بو زنود المفتوله
يا صنديد ويا جبّار
**
على الشغل بتوعى بكّير
بتوعى قبل طلوع الضو
وما بترجع قبل ما يصير
الليل مكحّل عين الجو
**
ما تهمك بردات الجو
ولا بتسأل عن شمساتو
ولا بالبحر تخاف النو
ولا بتهزّك موجاتو
**
ما بتحسب للعمر حساب
ولا بتفكّر بسنينو
ولا همّك دار الدولاب
ولا وين صارو موازينو
** بتهمّك لقمات العيش
وتجيب لعيالك مصروف
ويبقى على جناحاتك ريش
وما يقولو عنّك منتوف
**
انت والزمن صنوان
وكتفك عا كتف فصولو
من فصولو آخد عنوان
البيعدّوها بيقولو :
**
ربيع وصيف وخريف
شتويّه ومطر ورعود
شباب رجوله وتخويف
من شيخوخه كلاّ قعود
**
ومع هيدا بيضل السيف
بايدك شامخ ما لو حدود
بأحلى ملقى تلاقي الضيف
وان قضيت انت الحاصود
**
ولو سألوني مرّه مين
غير بيّك هوّ المقصود
راح قلّن يا سمعانين
هوّ اللي مالي الوجود
**
البي : الفلاّح الغالي
والعامل جوّا البستان
اللي بيسهرو الليالي
تا يبقى عيشي منصان
**
البي: الراعي اللي بكّير
بيسرح هوّ وعنزاتو
يبوس المنجيره ويصير
الكون يردد نغماتو
**
البي : العامل بالمصنع
ميكانيكي وكهربجي
الآلة البحتاجا بيصنع
ولا بيعمل مرّه حجه
**
البي ورفقاتو: عمّال
خدمه بيحمو الشأن العام
لو غابو وميزانن مال
بتشقى وتسود الأيام
**
البي : المن صنف الشرطه برتبه أو من دون رتبه
ومع العسكر بالخطّه
بيحمو الدوله من النكبه
**
البي : القاضي بيقضي بعدل
العدل مزيّن ميزانو
البي: محامي بقصر العدل
الحق بيبقى عنوا نو
**
البي : معلّم أو أستاذ
ومد رّس تحسبلو حساب
بعلمو صادق ما بيعتاذ
يطلب رحمه من الأصحاب
**
البي : الدكتور والطبيب
بقلبو شو مخبّي أسرار
الصحه للمحتاجا يجيب
مضحّي بوقتو ليل نهار
**
البي: الصيدلي السهران
يعطي الدوا للمحتاج
صدقو واخلاصو عنوان
بيحرص ما يغلط بعلاج
**
البي : مهندس صيتو ذاع
بهندستو وعلمو الفريد
اختص بنوع من الأنواع
المعروفه أو جات جديد
**
البي : اللي بيبقى فنّان
من أنواعو المختلفه
وبيرفع اسم الأوطان
وبيزيد عليّا اللهفه
**
البي : اللي هو أديب
يخلّد أمجاد بلادو
أو عالم مبدع نجيب
يورّث فنّو لاولادو
**
البي : موظف صنف زغير
البي: موظف صنف كبير
البي: موظّف مدير عام
البي : بها الدورة وزير
**
تسلم انت يا بيّ
شو ما كانت أشغالك
انت لبيتك شمسيّه
تحتا بتتفيّا عيالك
**
انت وحدك سيد البيت
وعامودو مع ساساتو
يرحم روح البلي المات
العيّش تهنا حياتو
****
المهيري /حزيران /2007
جرجس وديع الموراني
 | 
