تحية الى الأم في عيدها

========

الى أمي ... والى كل أم في العالم ...
-------

نفاض جناحك يا آدار
وعلّي بالعالي العالي
على جبينك اكليل الغار
من عيد الأم الغالي
**
أحلى كلمة كلمة أم
وأعظم معنى معناها
شمل العيله الأم تلم
وويلا العيله لولاها
**
الدنيا كلا هيّ الأم
محبتها بوسعا كبيره
وبقلبا بتعبي الهم
وتقضي عمرا بالحيره
**
الأم بتتعب ليل نهار
حتى ولادا يرتاحو
وقلبا مستودع اسرار
ومع ولادا مفتاحو
**
الأم بتسهر طول الليل
حتالي ولادا ينامو
وبقلبا بتخبّي الويل
وابنا تحلى ايامو
**
عمرا كلّو بتقضيه
تعب وهموم كتيره
وزيت سراجا بتضويه
بدرب ولادا بالديره
**
الأم بتحمل البردات
بأيام الشتويه
ومن درب ولادا التلجات
تدوبهن بالحنيه
**
يا ما ربيع الأيام
حملت بالبقجه زهورو
وجابتها ومعها الأحلام
لأبنا حتى تزورو
**
يا ما بأيامات الصيف
عرقاتا بلّو تيابا
تا تخبز للغالي رغيف
وبحبّو تعلا بوابا
**
وخريف العمر بطولو
شقى وأتعاب وأحزان
ويقولو شو ما يقولو
بيكفّي قلبا فرحان
**
بتحمل تعب هالأيام
كلّيتو فوق كتافا
عين بتسهر ، عين بتنام
وتبقى البسمه على شفافا
**
بعيدا .. شو بتحلى الكلمات !!!
وشو بيكبر مضمون العيد!!!
حروف اسما ، مطلع آيات
بصلّيها ، وكل يوم بعيد
**
بليلة عيدك يا أمي
أيشو بدّي اهديك
راح بعمل قلبي ضمه
من الورد تبوّس ديك
**
واركع ع جريك الحلوين
وصلّي للرب العا لي
يزيد سنين العمر سنين
والصحه عليك تلالي
**
يا أمي بميزان الحب
بيبقى راجح ميزانك
لو مهما حبّك هالقلب
بيطلع ورده ببستانك
**
يا أمي الربّيتيني
طفل زغيّر عالدادي
وكبرت وجوّزتيني
وربّيتي معي ولادي
بسأل ربّي يعطيني
محبّة قلبك زوّادي
ورسمك يبقى ع جبيني
وباسمك قلبي ينادي
*****

المهيري /عيد الأم / 2007


جرجس وديع الموراني

أستاذي الشاعر جرجس
أطال الله في عمرك لتبقى لنا نبراس الكلمة الطيبة وصولجان المناسبات المقدسة ...
أطال الله في عمر كل الأمهات في هذا الكون الفسيح.
دمت نبراساً وألقاً في منتدانا الغالي مشتاوي .

ويشرفني أن أضع مقطعاً من قصيدة لي في هذه المناسبة الجليلة عيد الأم :

[الأعزاء ... ثناء .... أنووووووس
شكرا للمداخلة ..... وعظيم جدا ما كتبته يا ثناء ... وبدوري اقدم تحيتي واحترامي الى والدة انجبت ثناء ... متمنيا لها العمر السعيدطالما هي على قيد الحياة
شكرا جديدا ... وكل الأمهات في العالم بألف خير
جرجس وديع الموراني