باسل .. والثلج .. والمهيري
===========
باسل مغترب ، كان يمضي عطلة العيد معنا في الضيعه ؛ وتمنى أن يتساقط الثلج ، وكان له ما تمناه ، وكانت قصيدتي هذه.....
-----
يسعد صباحك يا قطن مندوف
توب العرس لبست دنيتــــنا
باسل يا ابني قوم انت وشوف
ما اجملا بهالتوب ضيعتنا
**
توب أبيض ، ساحر وفتان
سبحان الله بسر تكوينو
هالتوب لمبطّن بسبع لوان
ابداع رب الخلق تلوينو
**
تطلّع حواليك بتشوف التلج
صفحات بيضا عا لأراضي وعالشجر
استعجل قبل ما يدوب ويبان المرج
وتدوّر وما يضل للتلجه خبر
**
شوف المشمشه شقد حليانه
بهجة نظر لوحات فنيه
متزينه على زنود عريانه
بطانة تياب العرس بنّيه
**
وزيتونة البدّارحنيت راسها
خجلت ع لبس التوب ع الزينات
لمن حبيبا صار حدّا وباسها
قالت ياربي زيد هالتلجات
**
والسنديانه الشامخه بها الجو
قبل غيرا صار أبيض لونها
من وقت ما جهجه عليها الضو
عا فرشتك صارت تبص عيونها
**
ليك الطريق شقد حلوه شوفتا
وبمغارة العدرا عيونك متّعا
زميتا على بابا خود انت صورتا
تزود ببركتها وطريقك تابعا
**
بساتين جيرتنا ، صخورا، وحرشها
بساتين ضيعتنا ، ونهرنا، شو حلو
هيدي الطبيعه عم تغير فرشها
فرشت قطن أبيض يا روحي ماجملو
**
ومش بس هون التلج مادد فرشتو
ماددا على مدى عينك والنظر
شلحات تغزل عا مهلها بدلتو
وتنشرا متعه لعينين البشر
**
قام باسل حامل الأشواق
وقللي صباح الخير يا بيّ
لا هالتلج شو هالقلب مشتاق
وينك يا أمي تطلعي فيّ
**
فنجان قهوه على العجل معكن حلو
ومع صبح ضيعتنا بهالتوب الجديد
جلسة وفا ترد العمر من أولو
وتقول يا ماحلا التلج وتعيد
**
وين آلة التصوير ، هيدا موسما
دخلك ياأمي استعجلي بجزدانها
بصوّر ما بين الأرض وحدود السما
كلّو حلو ، شو هالدني !!! سبحانها
**
راح باسل على التلج الله يكون معو
يركض يصوّر ، والقلب فرحان
ولمن رجع عالبيت يا مين يسمعو
يحكي ويضحك ، مالك الأكوان
**
شو صوّر !! وقدّيش حلوه!! مزكزكي
مجموعة اللي صوّرا بتطلع كتاب
الصورا لحالا ، تخبّر بدال الحكــــــــي
ولمن تشوفو الصور بتلاقو الجواب
**
نشالله ياابني متل هالتلجات
بيضل قلبك أبيض وعيشك هني
وتفرح ع طول العمر وتحب الحياة
ومع كل ساعه تقول : حلوه هالدني
*******
المهيري /27/ كانون أول /2006
الله يخليلك اياه يارب وتفرح منو بالقريب العاجل ...
ما أجمل حظي مصادفة باسل في دولة الاغتراب و الجلوس معه وشرب "energy drink " معه ( المتي )
الأخ جرجس نحن بانتظار انشاء زاوية مخصصة لك في منتدانا
ملاحظة : موضوع حنين مهاجر الذي يتكلم عن العصافير في الدار " أزيل " أرجو منك اعادة ادراجه
لك مني كل الحب و الاحترام
__________________
إذا لم تستطع أن تنظر امامك لأن مستقبلك مظلم ولم تستطع أن تنظر خلفك لأن ماضيك مؤلم فانظر إلى الأعلى تجد ربك تجاهك إبتسم... فإن هناك من... يحبك... يعتنى بك... يحميك ...ينصرك... يسمعك ...يراك...انه (( الله)) ما أخد منك إلا ليعطيك...وما ابكاك إلا ليضحكك...وما حرمك الا ليتفضل عليك...وما آلمك إلا لانه
يحبك
السيد موراني كلماتك رقيقة رقة نسيم الربيع بضيعنا. و الله هيدا الأدب اللي بيرد الروح لصدر العشاق و بالمناسبة أنا متلك عندي ذكريات بضيعة جبلية ذكرت حضرتك بمنتدى الكفرون عن ذكرياتك فيها.
[ ][ ]العزيزة ريما ....
رقة كلماتك جعلت مشاعري أرق من النسيم العليل على روابي ضيعتك ، وضيعتي ، وكل ضيعة
وخاصة اذا كانت :
ضيعة زغيره بكتف تله معربشه ...... ما بينها وبين القمر فيه وشوشه
لك شكري ... لك محبتي... اتمنى أن القاك دائما
وأتمنى أن نتعارف شخصيا .. وحبذا لو ذكرت اسم ضيعتك الحلوه
اهديك قصيدتي التي نشرتها اليوم في الموقع بعنوان ( فالنتاين )
جرجس وديع الموراني ]
آخر تعديل بواسطة georges morani ، 12-02-2007 الساعة 04:51 PM.
شيخ الشباب جرجس وديع الموراني لانك أحلى شب بيكتب غزل و الغزل هو دمي و العاطفة روحي. أنا من سكان الشام حاليأ . و كل صيفية عمشتى الحلو و الحلوين عبيتنا الصيفي .
ما راح خليك تروح و ايدك فاضية جبتلك معي شئ إنشاء الله يعجبك
لوحة التحكم الخاصة بك
خروج
بحث
الأعضاء
التقويم
