حنين مهاجر
========
اغترب طلباللعيش ..فطال اغترابة ، ولم يعد بامكانه العودة ؛ فاصبح مهاجرا!!!
في قصيدتي هذه ، اتحدث بلسانه ، املا ان يأخذ العبرة منه كل من يغترب .. ..
ولا يسمح للأيام ان تمضي به ليصبح مهاجرا !!!!!
-------
يا ضيعتي !! لا تزعلي مني
تركتك ي ضيعة بالغصب عني
الأيام جارت والزمن غدّار
والعيش لقمة مغمسة بعنة
**
الأيام جارت والزمن غدّار
والهم لفلفنا كبار زغار
ما عاد طقنا نشوف ارض الدار
نحسّا تقول تقلعو عني
**
كبرو ولادي وهمهن بالقلب زاد
ووحدي على الله وزندي الاعتماد
الرزقات ما جمعو قساط المدرسة
بياكل معي بالصحن همن هلولاد
**
وقلت بلكي الأهل معي بيوقفو
وخليت جيراني بأمري يعرفو
طلبت من امي وبي مساعدة
ردوا وقالوا الأمر انت بتعرفو
**
ما فبه غير النار تاكل بالحطب
امتين راح بيفل عنّا هالغضب
وها الحفافي مهدهدي حيطانها
وما فبه معنا قرش نصلح ها العطب
**
وعبق شتي .. والأرض والصخر ارتوى
ولوما سندنا الباب بالمخل التوى
اللوزة اللي كانو يعشعشو فيها الطيور
شالها من شلوشها جنون الهوى
**
وناديت ربي يستمع مني
وسود الليالي يبعدا عني
ومشيت وتركتك ي ضيعتنا
وما عرفت اني تارك الجنة
**
تركتك انا وما لقيت للحالة بديل
ومتلي انا شدّوا الشبيبة عالرحيل
عريت الضيعة والبيوت تسكروا
لحقنا التعاسة بهجرك وسوء السبيل
**
راحت زنود الكانت تفج الصخور
والأرض صارت كلها مساحات بور
يا ريت فينا ما نبقي ولا مطار
ويا ريت فينا نسكر بواب البحور
**
وخلف البحور بأرض شلحتني الدني
دورت ما لاقيت مين يلمني
وصدفة طلعلي مين الله باعتو
ولعيلتو بكلمة حنونة ضمني
**
وقعدت ، ايشو اشتغل شي بهدلة
وشو شرشحة ان عرفو الأهل بالمسألة
بس شو بعمل انا طفران
ومهاجر ومن مشكلة لمشكلة
**
وقلت ايشو عليه ما دمنا بعاد
وما هم ايشو منشتغل بهالبلآد
البيهم انو يصير في معي فلوس
وابعت الخرجية لمرتي وللولاد
**
وبكرا الزمن بيدور والحظ بيجي
وما عاد لهيكي مشاغل بلتجي
وبترك/ الكشة / انا وبفتح /ستور /
وبصير صاحب عمل كلو نغنجي
**
وبنسى زمان الشقى وليالي السهر
والهم والأحزان وصنوف الضجر
بضحك مع الأيام ما عندي هموم
وللضحك قلبي شقد بالماضي نطر
**
وصح الحلم والحال غير حالتو
ومال الزمان الدهر دارت دورتو
وبدال ما انسى الضيعة وأهلها
نار الحنين القلب جوّا حرقتو
**
من عمر بنتي تارك بلادي
واليوم بنتي مكملي العشرين
متشوق لأهلي ولأولادي
وسنين بعدا عم تجر سنين
**
كل ما الربيع يطل ، تمرق نسمتو
عا شغاف قلبي بصير زهقان الدني
ولمن الصيف تصير حلوة لقمتو
يصير الأسى بالقلب صورة مسودني
**
حامل بقلبي مية صورة ملونة
لضيعتي الحلوة ولأهلا الطيبين
لبيوتها ولدورها بتشدّني
جلسات انس ولطف ومحبة وحنين
**
مشتاق للسهرات بالبيت العتيق
استفقدتلو وللموقدة وللقنطرة
كيف حالها ؟ بعدو حلو بقلبا الحريق
والباب كيفو وكيف حال السكرة ؟
**
وهاك الدروب الكنت ازرعها حنين
وترابها من دموع عينيّ ارتوى
اشتقتلها... ما بينها وبيني سنين
وأحلام ومواعيد وغناني الهوى!!!
**
والمنطرة قلبي انكسر عالمنطرة
شو مرقت عليها الصبايا غندرة
والمحدلة الكانت تخيل عالسطوح
مشتاق شوفا وشوف كيفا مكوره
**
مشتاق اسمع صرخة الناطور
مشتاق لم من الحفافي زهور
واسمع حكايا اهل ضيعتنا
بمشوار امرق فيه عالتنور
**
مشتاق ، شو مشتاق ارجع زور
تلات ضيعتنا ، وصوفر للنسور
واغفى ع نغمة نهر ميدانو طويل
وأوعى ع رنات المعاول بالصخور
**
وسنديانة بتحفظ حكايات
انحكيت تحتها وتحت هالفيات
غنى صلاتو بعبها العصفور
وع كعبها غنى المجد آيات
**
وراس النبع مطرح ما كنّا نروح
لو كان طالعلو الحكي بيحكي
شو كان ينعش قلبنا المجروح
واليوم لمن بذكرو ببكي
**
مشتاق للضيعة، ولمربعها الغني
للساقية ، للكرم ، والعيش الهني
وخضري بينده : وين انتو رايحين ؟
كونو أوادم ما بحب الولدني
**
مشتاق دق الجرس ربّع دقتو
وقداس يوم العيد احضر بهحتو
وبكنيسة الضيعه انا مشتاق
من السنكسار العيد اسمع قصتو
**
والمصطبة شو بحن لسهراتها
يللي الرطوبة قشّطت طيناتها
وزينات تتغاوى على درب العين
وجرار تتراقص على دياتها
**
قديش عالمرفع وعا راس السنة
متشوق على السهر بالجو الهني
وعالجرن ، والمخل ، وعلى القيمه سوا
يتجمعو الأصحاب وتطير الدني
**
للجوزة البدّار شو عندي حنين
وللتوتة اللي حدها من عاليمين
واقعدبفي الدالية واسمع زجل
معقول بيعودو الليالي الماضيين
**
مشتاق اتفرج ع صلي المشحرة
واقعد واشرب كاس ع كركي العرق
وامرق على الطاحون شوفا مبودرة
وشوف المكاري بدربها مسقسق عرق
**
ما عاد في عندي جلاده على الحكي
بالعين دمعة وبالقلب هبات نار
ولمين بدي لغير ربي اشتكي
يقرب الأيام ، نرجع عالديار
**
ولادي ومرتي وين ؟ يا روح اسألي
من ايمتي ما شفتهم ؟! ما بتخجلي
بدي الحبايب وينهم ما في حدا
بصدري يا نار الشوق هبّي واشعلي
**
يا شريكة العمر الوفية يا ملاك
سامحيني على البعد د قت الهلاك
ظلمتك انا وظلمت نفسي والولاد
يا بيتنا راجع انا ما لي سواك
**
هالقلب بعدو صوت أمي ما نسي
ولا صوت بيّي يقول كيف المدرسة
يلّلا كلو ، وقومو بسرعة عالكتاب
وللغير خلوكن حكايا مقدسة
**
يا ميمتي بقلبي وعيني مصوره
خيالك بليل العمر جتة منوره
قريت مكتوبك وطافت هالدموع
تش الورق والحرف ما عاد انقرا
جايي انا !!!
حاجي يا أمي مكدرة
*******
المهيري/آب / 2006
جرجس وديع الموراني
[/color]
لوحة التحكم الخاصة بك
خروج
بحث
الأعضاء
التقويم
