دقة قلب

georges morani · #1 03-07-2006

دقة قلب
=======
كنت كلما مسكت بالهاتف لاتصل بها ترتجف يداي وتتسارع
ضربات قلبي !!!! فكتبت لها قائلا :
------------
دقيت رقمك ... دق قلبي بدقتو
مشتاق بدو يحدثك عن قصتو
قصة قديمة حاملا صرلو سنين
قصة محبة !! كتير حلوة قصتو
**
هالقلب حبك .. ليش !! هيدي مسألة
سألتو ؟ ما فعل يرد .. ما هي مشكلة
بلش بحب زغير .. ربيتو السنين
تا صار شب كبير صاحب مرجلة
**
عشت المحبة بقربك .. وعشت الصفا
تسهر عيوني.... وتشبع عيونك غفا
وتا تم احفظ.. هالمحبة .... وهالوداد
اعطي وفا ... ويا حسرتي ... تعطي جفا
**
وقلت بالي كتـــــــــــــير بدي .... طولو
وكمل طريقي ..... العمر بعدو بأولو
معقول في عندي غلط بمحبتا ؟؟!!
ومعقول بحر الحب فيها تحولو؟؟!!
**
وعشعش بقلبي حبك وفرخ ورود
وصرت قلبي اوعدو بأحلى وعود
وعملت مجنونك انا .. وعشت الأمل
لولا الأمل ...... شو كان نفعو هالوجود
**
وعشت الأمل ل يوم حقق هالوعود
وكلما رسمت حد امحي هالحدود
وعقلي لقلبي قال حاجي هلوسة
اتركها .. احسبها غايبة ومالا وجود
**
وجربت انساك انا ... وانسى العذاب
كسرت القلم .... خزقت ورقات الكتاب
وحطمت كاس الحب .. وهجرت الصفا
وحبست قلبي وسكرت كل البواب
**
الأيام مرقت .... فكرت هالقلب .. تاب
لا هو سألني ولا طلع مني جواب
وفجأة صرخلك صوت مجبول بألم
وقف يا ظالم .... في الك عندي حساب
**
وبلش حسابو .. والدمع مني انهمر
يمحي شريط الهجر ما خلا اثر
قللي : ياغافل فيق .. هي بتعبدك
والرفض عندا فن ... عا عيون البشر
==============
المهيري /حزيران / 2006
جرجس وديع الموراني

ل

**amigo** · #2 04-07-2006

يا عين يا استاذ جرجس ع العشق
اللي ما بيعرفك بيفكر عمرك شي عشرين سنة
الله يسلم هل التم وان شاء الله تضل روح الشباب عايشة فيك كل العمر