تحية الى الأب في عيده

[georges morani]

تحية الى الأب في عيده
===========
يحتفل العالم بتاريخ/ 21/ حزيران بعيد الأب
فالى روح ابي والى كافة الآباء في العالم اقدم قصيدتي هذه عربون محبة ووفاء
--------------
عيدك انت يا بيّ
تاج على عياد السنة
يا بو الهمة القويّة
بايدك عمّرت الدني
**
عيدك عيد الرجولة
البطولة والأنتصار
يا بو زنود المفتولة
يا صنديد ويا جبار
**
عيدك عيد الارادة
والعزيمة الما بتلين
ارادة ومعها زيادة
تصميم وثقة ويقين
**
على الشغل بتوعى بكير
بتوعى قبل طلوع الضو
وما بترجع قبل ما يصير
الليل مكحل عين الجو
**
ما تهمك بردات الجو
ولا بتسأل عن شمساتو
ولا بالبحر تخاف النو
ولا بتهزك موجاتو
**
ما بتحسب للعمر حساب
ولا بتفكر بسنينو
ولا همك دار الدولاب
ولا وين صارو موازينو
**
بتهمك لقمات العيش
وتجيب لعيالك مصروف
ويبقى على جناحاتك ريش
وما يقولو عنك منتوف
**
والناس ما تشوفك جوعان
ولا ولادك جنحا مكسور
ولا عريان ولا حفيان
ولا ساعة بيتك مقهور
**
انت والزمن صنوان
وكتفك عا كتف فصولو
من فصولو آخد عنوان
البيعدّوها بيقولو
**
ربيع وصيف وخريف
شتوية ومطر ورعود
شباب رجولة وتخويف
من شيخوخة كلا ّقعود
**
ومع هيدا بيضل السيف
بايدك شامخ مالو حدود
باحلى ملقى تلاقي الضيف
وان قضيت انت الحاصود
**
وبتبقى انت البنيان
اللي حجاراتو ما يلينو
بتبقى حامل عنفوان
الدهر وغضبات سنينو
**
ولو سألوني مرة مين
غير بيّك هوّ المقصود ؟؟؟
راح قلن يا سمعانين
هوّ اللي مالي الوجود
**
البي : الفلاح الغالي
والعامل جوّا البستان
اللي بيسهرو الليالي
تايبقى عيشي منصان
**
البي: الراعي اللي بكير
بيسرح هو وعنزاتو
يبوس المنجيرة ويصير
الكون يردد نغماتو
**
البي : العامل بالمصنع
ميكانيكي وكهربجي
الآلة البحتاجا بيصنع
ولا بيعمل مرّة حجة
**
البي : ورفقاتو عمال
خدمة بيحمو الشأن العام
لو غابو وميزانن مال
بتشقى وتسود الأيام
**
البي: المن صنف الشرطة
من دون رتبة او رتبة
ومع العسكر بالخطة
بيحمو الدولة من النكبة
**
البي: القاضي بيقضي بعدل
العدل مزين ميزانو
البي: محامي بقصر العدل
الحق بيبقى عنوانو
**
البي : معلم أو استاذ
ومدرّس تحسبلو حساب
بعلمو صادق ما بيعتاذ
يطلب رحمة من الأصحاب
**
البي: الدكتور والطبيب
بقلبو شو مخبي اسرار
الصحة للمحتاجا يجيب
مضحي بوقتو ليل نهار
**
البي: الصيدلي السهران
يعطي الدوا للمحتاج
صدقو واخلاصو عنوان
بيحرص ما يغلط بعلاج
**
البي: مهندس صيتو ذاع
بهندستو وعلمو الفريد
اختص بنوع من الأنواع
المعروفة أو جات جديد
**
البي : اللي بيبقى فنان
من انواعو المختلفة
وبيرفع اسم الأوطان
وبيزيد عليها اللهفة
**
البي: اللي هوّ أديب
يخلد أمجاد بلادو
أو عالم مبدع نجيب
يورّث فنو لاولادو
**
البي: موظف صنف زغير
البي: موظف صنف كبير
البي: موظف مدير عام
البي: بهالدورة وزير
**
تسلم انت يا بيّ
شو ما كانت اشغالك
انت لبيتك شمسية
تحتا بتتفيا عيالك
**
انت وحدك سيد البيت
وعامودو مع ساساتو
يرحم روح البي المات
العيّش تهنا حياتو
**
المهيري /21/ حزيران/2006
جرجس وديع الموراني

[titi]

وأنا بدوري بهني كل أباء العالم بعيدن وبقلون نشاء الله تطلو بخير والله يحمي الأباء لأنو هني دعامة الوطن والمجتمع
ura: