الشمس ضاعت بالبرق والرعد ........وتلفح زوابع ع جبال الريح
والليل يتكسر ع باب الوعد ........والرعد يعصف ع الابد ويصيح
******
تلبد الغيم تخرسن التسبيح ........تشعل وتطفي بهـ الفضا مصابيح
وينزل البريق من السما ع الأرض ........تا الأرض صارت للسما مراجيح
******
الريح مرة هياج مرة سكون ........والليل أبرد من تلج كانون
وبعدو الضباب من الضجر سهران ........ومن خلف قضباب العتم مسجون
والحور يركع ع الأرض فزعان ........ينزل غصون ويرجع بلا غصون
وبعدو القمر ضايع متل سكران ........مخزق تيابو مهوشل ومجنون
******
والعاصفي تغطي الجبل والتل........والتلج ينزل ع الشجر زيني
ضيعان حواش الحبق والفل ........يتكسر وتبكي الياسميني
من البرد ما تلاقي الدواري محل ........خدرت جوانحها المسكيني
ويرجف من البرد بيت الشل ........وتكرج ع سطحو لمعرجليني
******
بيتي بآخر هـ الدني معمر.......بيركع ع بابو قصور وعلالي
صخورو قلاع وما بتتأثر ........لا بهوا شرقي ولا شما لي
جوّا بموقدتو الجمر احمر........والبرد برّا سهام قتالي
قاعد لا حالي بهـ الدفا أسكر........ورندحلها من القلب موالي
لبيهم أنو سهرتي تعمر ........أما الدني والي نوجد فيها