,,,,,,, نجوى متقاعــد ,,,,,
============
المتقاعد في قصيدتي هذه ,من أحيل إلى التقاعد , ولا يملك عملا آخر.

قالو لي تقاعد وارتاح.............وعشلك شي يومان ملاح
من يوم اللي تقاعــدنا............ونحنا منبكي ع اللي راح
***********
من يوم اللي تقاعدنا ............وقعدنا جوات البيـــــــت
مع الهم تواعدنــــــا ............ولا ساعة عنو تخليــــت
ولا دقيقة عنو بعدنا ............ولا لحظة عنو استغنيـت
شو اللي بدو يسعدنا ...........من ربي علم ترجـــــيت
***********
حقلة زهر الوظيفة ...........واياما كليتا وروووووود
سنين العمل لطيفة ............ولو كانو لياليها سوووود
عيش ايامك شريفة ...........وبالعمل ابداع وجوووود
عيش وايديك نضيفة ...... وع البيت فكرك مرتاح عود
بتقول حلوة الوظيفة .......ومكروه العمر المقعووووود
**********
كنا نساهر نجم سهيل ......بترتيب اليوم الجايــــــــــي
شو فيه خير وشو فيه ويل .... وشو في امور مخباية
اليوم منقضي كل الليل.....ما منحكي غير حكايــــــة
حكاية هالهم الطويـــل.....وهالشجرة اللي معرايــــة
***********
كنا نوعى قبل الضو ........ والهمة توعى معــــــــنا
العتمة نكعرها من الجو .... الصبح بنورو يمتعـــــنا
بالبحر ما نخاف النو ....... ولولا صوتو سمعـــــــنا
ولا بالبر نخاف السو ....... ولولا بالغابة وقعـــــــنا
واليوم صرنا متل البو ...... شكل وجسم بلا معـــنى
بيوعونا منقول شـــــو ...... شو بدكن نامو معـــــنا
**********
بالشغل انت بتشــــوف ..... بتشوف كل يوم ناس جداد
وبتطفي القلب الملهوف .... بالقراب وبالبعـــــــــــــــاد
يمكن هني يكونوا ضيوف ... ويمكن من نسل الاجــداد
يمكن تاريخن معروف ....... ويمكن ع التاريخ جـــداد
يمكن ت تشوفن ملهوف ..... ويمكن عليهن معــــــــتاد
ومع هيدا بتبقى مشغوف .... وبتشوف ايامك اعــــــياد
************
بالشغل بتبقى الاحـــلام ..... تحول عتم الليل نــــــــهار
خناقات الشغل افــــــلام .... عليها بالبيت بتســـــــــــهر
بتمر عليك الاوهـــــــام .....بتنساها وما بتتذكــــــــــــر
بترجع تنقلب الايـــــــام ..... بترجع تتبدل لفــــــــــــكار
وبتشوف ايامك انـــــغام .... وكل يوم بتخلق اخـــــــبار
وكلا وقت اللي بتـــــنام ..... بتطويها وبتصير اســــرار
**********
بالشغل بتبرم بتدوووور ..... وبتتعرف ع بــــــــــــلادك
وضياعا الحلوة بتــزور ..... وبتشوف امجاد اجـــــدادك
وبتكون فرحان ومسرور .... لما بتزرع امجـــــــــــادك
وع جبينك بيشع الـــنور ..... لم بترجــــــــــــع لاولادك
بتضمن انت ومســــحور .... وبتعيش احلى اعــــــــيادك
***********
بالشغل كنا حساســــــين ........ نزقزق ع غصون الاشجار
نعشعش بعيون الحلوين ......... ناخد ونجبلن اخـــــــــــبار
واليوم صرنا حمــــالين......... جبلي كوسا وجبلي خـــيار
عملنا جمعية نساويــــن ........ بالحارة وبطلنا الـــــــــــكار
تعرفنا ع البياعــــــيـن ......... وصرنا من صنف الشـــطار
ولما منسأل نحنــا وين ......... وكيف ت هيكي معنا صـــار
بيجاوب عمر الستــين ........ عصفورك يا زغير طـــــــار
***********
وبيكمل عمر الستــين .......... يوعي فيي اوجـــــــــــــــاعي
بيرجعني ع الخمسين .......... ع عمر العقل الـــــــــــــواعي
وبينزلني ع العشرين .......... وما بيراعي اوضـــــــــــــاعي
ايام الكانوا الحلــوين .......... غنمات حوالا الــــــــــــــراعي
ايام الكانوا تشاريــن .......... يخافوا من راس الـــــــــــداعي
************
هيدا المتقاعد يا روح ........ معقولي هيك نخلـــــــــــــــــــيه
متحير وين بدو يروح ....... وما بيعرف شو بيسلــــــــــــيه
خليتو باسرارو يبوح......... وكلشي في عندو يحكــــــــــــيه
ويحس بقلبو مجروح ........ ونار التذكار بتكــــــــــــــــويه
وع جروحاتو تزيد جروح ... كل ما حاولت تنســــــــــــــيه
يما منضمو ومنروح ......... ع عالم تاني يرضــــــــــــــيه
***********
يا متقاعد يللا قـــوم .........شد الهمة ولاقـــــــــــــــــــــينا
ما فيه وظيفة بتدوم ........ لو دامت مابتجــــــــــــــــــــينا
ما بدنا يقيدنا النوم ......... ولا منقبل يحكم فـــــــــــــــينا
حاج تعاتب حاج تلوم ..... سماع الفرحة تناديـــــــــــــــنا
فردلي وجهك حاج مغموم... وخلي العمر يوديـــــــــــــنا
على عالم ما فيه هموم ...... ويرسينا على الميـــــــــــــنا
***********
المهيري / ايار /2005
شعر وكلمات : جرجس وديع الموراني

شكرا كتير استاذ جرجس
كلنا عا هالطريق . كلمات نابعة من القلب ومعبرة جدا جدا (الله يعطيك العافية )
ننتظرك من المزيد

جورج دبس
المانيا

__________________

__________________

رمّـوش

عذرا من كل قراء ( نجوى متقاعد ) , فاانا لم اقصد احدا بها انما هي نجوى ذاتيةقادني اليها الفراغ الذي اخذت اشعر به بعد احالتي للتقاعدوبعد سنين طويلة من العمل واحساسي برغبة كبيرة جدا للاستمرار به .
ثم الا ترى انني انتقدت نفسي في المقطع الاخير منها مخطئا مشاعري هذه
حين قلت : ( يا متقاعد يللاقوم .... ) فعذرا ثم عذرا ممن يراني انني قصدته او اسئت اليه .... واعدكم بالعودة الى التفاؤل والاقلاع عن السوداوية ......