لا يوجد شيىء في الموسيقا أسوء من عزف الدولة | |
[لا يوجد شيىء في الموسيقا أسوء من عزف الدولة
بالبداية بدي اشكر الشباب اللي اشتغلو و تعبو تا طلع المهرجان بهالمستوى.
من البديهي انو الصعوبة الأساسية البتواجه اللجنة المنظمة للمهرجان هيي التمويل
وصار من المعروف انو بسبب نقص التمويل السني اقترحت اللجنة السابقة توقيف المهرجان لسنة وحدي أو عملو ضمن الامكانيات المتاحة "ع قد بساطك مد جريك" .
وهون اتدخلت البلدية و أعلنت عن استعدادا للقيام بالمهرجان, طبعا بالتعاون مع عدد من شباب اللجنة القديمة ... و فعلا صار المهرجان
فشو رأيكون نستعرض شوية إيجابيات و شوية سلبيات للمهرجان السني , تنشوف كنو استلام البلدية لإدارة المهرجان منيح أو لأ :
الإيجابيات:
· أول و اهم ايجابية هيي انو المهرجان انعمل و بكامل فعالياتو و شويي زيادة.
· لأول مرة بينقل يومين من المهرجان ببث مباشر ع التلفزيون.
· حضور رئيس الوزراء اللي بيوسع نطاق الاهتمام بالمهرجان.
· اضافة فعالية فرقة إنانا اللي كانت رائعة فعلا.
· اضافة فعالية الشعر الفصحى (مع تحفظاتي ع المكان اللي انعملت فية).
· بدال حفلة رئيسية وحدي بالساحة انعملت حفلتين(مع انو نوعية الطربين كانت خيبة أمل بالنسبة إلي بس هالمطربين الون جمهورون و الذوق الفني موضوع شخصي و نسبي).
لهون بيبين المهرجان قمة بالنجاح
بس خلونا نستعرض شوية سلبيات تنشوف شو كان ثمن هالنجاح:
· إذا كان من الطبيعي انو المحافظ بما يمثلو يقعد بالصف الأول فمن المسغرب انو يكونو الصفين الاولين محجوزين لولادو و قرايبينو بالوقت اللي فيه كتير من كبار المشتى عمرا و قدرا – مو مليقايين كرسي ولو بآخر صف.
· تغيير موعد حفلة معين شريف , مع إنو البروشورات توزعت قبل هالتغيير, بيقولو السبب هوي وجود البث المباشر و رئيس مجلس الوزراء بأول يوم. وأنا بعتقد انو لو بقي المهرجان ع احترامو للناس العم يحضروه و ع حرصو ع انو ما يجي حدا يحضر فعالية و تطلع خالصة من يومين,كان اجا يوم يصير التلفزيون وغيرو يرتبو مواعيدون ع أساس المهرجان.
· بخصوص حفلة الزجل عرفنا انو بعد ما اجا طليع من سنتين و موسى من سني كانت النية يجي الزغلول هالمرة بس اتعدلت الخطة و انجاب طليع حمدان لتاني مرة بناء ع طلب المحافظ.
· بالنسبة لحفل انتخاب ملكات الجمال تفاجأت تماما بنمط الاسئلة اللي توجهت للصبايا : عددي تلات معالم اثرية في القطر العربي السوري , عددي تلات مهرجانات سياحية بالقطر العربي السوري ... هالأسئلة ذكرتني بجو النشاطات الترفيهية الهادفة يعني كأنو الواحد قاعد بشي معسكر طلائع أو معسكر تدريب جامعي.
· السهرة المشتاوية كان من الواضح انو هيي اقل فقرة نالت اهتمام بالمهرجان المشتاوي مع انو الشباب اللي شاركو فيا قدمو كل امكانياتون بلا ما ينطرو حتى كلمة شكر.
· فرقة كنيسة مشتى الحلو المسرحية تقدمت ع انّها فرقة شباب المشتى , أنا مو عم احكي من منطلق تعصب أبدا بس هالفرقة فعلا تابعة للكنيسة و مرخصة من الدولة فلشو هالخوف المانو مبرر, بعدين اذا ما بدكون شي الو طابع كنسي فلا تطلبو من الفرقة تشترك من الأساس بس عيب تستفيدو منها و بعدين تغيرو اسما.
· و أسوء شي ع الاطلاق هوي عبارات الشكر الموزعة ع حيطان المشتى, معقول يا جماعة هالكم واحد اللي تبرعو تيرضو فلان ولا فلان ينشكرو بهالطريقة , وكل الشباب اللي تعبو بالمهرجان شو ما بيستحقو الشكر, و اللي تبرعو بمبالغ كبيرة بالسنين الماضية , واللي تبرعو بألف و راتبون خمس آلاف, واللي تبرعت بسيارة اسعاف واللي تبرع بسيارة لدفن الموتى, كل هدول مابيستاهلو ولو كلمة شكر, كمان أعضاء اللجنة القديمة يا ترى ما بيستاهلو الشكر و التكريم خصوصا انون تعبو ع المهرجان وقت اللي كان حلم زغير ما حدا مصدقو, مو بعد ما كبر و صار ظاهرة بيتمنى كل واحد ينسب الفضل فيها لنفسو.
بتصور انو بنظرة بسيطة ع هالسلبيات بيبين بوضوح كيف مهرجان المشتى اللي كان يعبر عن روح المشتى و ذوق اهلها ,تدجّن و تحول بطريقة مأساوية لمهرجان حكومي و الشاطر يرضي الأكبر منو, لما كانت التبرعات تنلم من أهل المشتى كان المهرجان يمثل أهل المشتى ولما صارت تنلم من متعهدين البناء و المؤسسات الحكومية صار المهرجان مضطر يمسح جوخ لأصحاب الأموال و للسلطة .
أنا ماني ضد النشاطات الحكومية و المهرجانات الهادفة بس هادي في منا كتير و الدولة أيمت ما بدا بتعمل مهرجان متل تدمر و بصرى و طريق الحرير و غيرون
و اللي كان مميز و رائع بمهرجان المشتى هوي إنو كان مهرجان أهلي حر و مسقل .
و مع احترامي للنوايا الطيبة لمعظمم أعضاء اللجنة المنظمة – حاسس انو هالاستقلالية انباعت بسعر كتير رخيص .
و الغريب انو في أشخاص باللجنة كانو يشرفو ع المهرجان من وقت اللي كان اسمو حفلة عيد الصليب و هالأشخاص كانو يهلكو تا يجيبو موافقة أمنية ع العمل الاهلي المستقل , معقول بهالسرعة نسو تعبون تا رضو يرجع المهرجان يلبس مريول و يوقف بالصف و يأدي تحية العلم كل يوم الصبح.
بالختام بدي وضح اني لمّا عم بنتقد البلدية أو المحافظة فأنا بقصد الصفة الوظيفية للأشخاص و مو قصدي سبب أي اساءة لأي حدا بصفتو الشخصية.
عفوا ع الإطالة و ع قولة نزار قباني
لا يوجد شيىء في الموسيقا أسوء من عزف الدولة.[/align][/font][/size][/size]  | 
