حفلة صيدنايا 2008

شفيق · #1 02-12-2008

بناء على طلب بعض حبايبي وأصدقائي ..
رح نزّل مقتطفات من حفلة جار القمر 2008 أول شي مكتوبة وبعدين رح نزل مقاطع صوت وصورة
بين

جوقة زغلول الدامور.............................جوقة الشام
عادل خداج....................................شادي موسى
زغلول الدامور...............................شفيق ديب

..

بداية

شفيق :
بديرة صــــيدنايا من الروايا.....طلعت غني على كل الزوايا
وقدم سر أشعــاري وصــلي.....بمحبّة هالشـــباب وهالصبايا
يا أجمل جمع يا ولفي ياخلي....إذا شجعتنــــــي بليل العطايا
بنخوة شعــبك الــغالي لخلّي........قبالي يركعو أربع سرايا
عزمت الشعر يللي عم يعلي.....رجع ليي وسـلك بين الودايا
وقصد عا صيدنايا وهون قلّي.....شمخ مجد الشعر لما اجتمعنا
....................عند جار القمر في صيدنايا

ويا أفكاري اسرحي ويا روح جوبي.....عأبطال الجنوب المن شعوبي
الأســــرى حرروها من الســجنها......وشهيد الـعز عاد على دروبي
الـــعروبة بسيــدين حكيت عـــنها......عم يزيلو مشـــاريع الصعوبي
بلادي منهــج العـــزة ووطــــنها......ومصدر فخرهالشعب الجنوبي
الشـهيد اللي ســلك فيها ومنــــها.....من جنوب الفدا وشعبو المقاوم
.........................لديرة سوريا أم العروبي

ومع الزغلول هالحضار قالو.....شفيق اليوم خاطر في مجالو
إذا التاريــــخ قصة مستحيلة.....أنا التاريــخ مــــني راسمالو
العتابا في لها أعــظم سليلة.....من الساحل ومن عظمة جبالو
ومن ريف الوفايا بلا جميلة....الزجل عـنا زرع رونـق جمالو
سوانا جــمد الــفكرة بوسيلة......شـهور شهـور والأيـام طالو
لكن منـبر بلادي الجـــميلة.....الشــعر جاهز بمدفع ارتجالو
انزلو عا ساحتي براس القبيلة.....لأني بسـاحة الشعر ونزالو
أنا شاعر أنا سلـــــطان جيلي.....وأكبر شاعر قبالي بيرجع
......................من المنبر عم بيحكي لحالو

ومن فترة سمعت أهـــلي وناسي.....لامونـــي عتزوبـــد السلاسي
وقالو شو جرى وفي وجه أوضح.....أنا جاوبت عن حنكة وفراسي
عرفت زغلول سيد كل مســــرح .....وعادل شاعر بيملك حواسي
وحتى ما شعــاع الشمـــس يلفح....سجنت الشمس بخيال الشماسي
وبس اليوم يا جمـــهور اسمــح......على الزغلول بدي كون قاسي
ومع عادل إجا الزند المسلــــح.....يزتو من رواســــي عا رواسي
أنا من صغر سني طلعت أفصح....من الغير وإذا بيولـــع حماسي
عــــــتابا ميـــجنا معنى موشــح....قصيد بخرطش الفرد الأساسي
بمارون وعلي راســـي توشّــــح....وبأحمد والمسيح الروح كاسي
وراس الصهينة مش رح بيربــح.....إذا بيهجم على مارون راسي
أنا من شعب سوري ما تزحزح.....غمرت الخي في روح القداسي
وما بخلي الســـياسي الود يدبح.....إذا خيي شــتمني بالســـــياسي
بدنيا المال ما تعـــــودت اطمح.....عوهم وجاه وقصور وكراسي
بس بــــــــدولة الفــــكر المجنح.....إلاه العرش جوهـــرني وسلم
.............لأسمي مقعد الشعر الرئاسي

شفيق · #2 02-12-2008

الزغلول:
إلك يا صيدنايا بصدق نيّة.....صلاتي من عبكرة ومن عشيّة
لأنو الطهر منّك والبـشارة.....هدونا عالـــسماوات العـــــليّة
وإلك مش أول واخر زيارة.....من الزغــلول والجوقة الوفية
وبأطهر معبد وأحلــى مغارة.....نشقنا ريحة العـــطر الزكية
ولو من أهل سوريا الغيارى......وعطف بشارها الكلو حميّة
لا عنا صار في أمن ووزارة.......ولا تم الـــوفاق الناطرينو
..............ولا انتخبو رئيس الجمهورية

بيلوموني وأنا ما بلوم حالي.....لأني عالزجل مشغول بالي
بيقولو ليش هالزغلول غنا.......مع هالشاعرين اللي قبالي
بقلن في شباب كتار عــنا.....عندن شعر أغلى من اللالي
مغمورين بدن دعم مـــنا......متل غمر الدوالي البالحقالي
ونحنا اللي على الشعر ائتمنا....كتابة ان كان يما ارتجالي
افتكرنا وقلبنا هيكـــــي تمنا....لأنو شـــعبنا مـــش اتكالي
بدنا كل معمرجـــي وبنا.....معنا يحــــط كتفو بزند عالي
تنخلق للقصايد والمعنى....جيل جديد عا نفــــس الطريقة
............يجي من بعدنا يكفي الرسالة

يا ليل الشعر يعطيك العوافي....لعندك جيت من أبعد مــسافي
تفلفشلك خصل شعرك بـــديي....وفيق جفنك اللي كان غـــافي
لقيتك من بعد نومي هــــــنيّة....بحضن الموهبي مكنكن ودافي
فقت فوقة عروس المستــحية....اللي خلطت بالعسل قطر الكنافي
إلي خمسين سنة وأكتر شوية...وأنا حامل همــــومك عا كــــتافي
وما بتضوي الليالي المنبرية....بلا ما عالغنا حــــرك شفـــــافي
ويا شعار الزجل والعــبقرية.....عنكن لا يكون الـــــسر خـــافي
تعو تا نلتقي عن صــدق نية....ونحكي كلمتيـــــن بقلـــب صافي
إذا مش رح تنعاون سويـــة.....ولرص الصف نعمل جهد كافي
وإذا ضاع الدوى من الفرمشية...الزجل بيموت ومنصرخ بموتو
..............العوض بسلامة رجال القوافي

أنا زغلول أنتو بتعرفوني....وإذا ما بتعرفوني بتســـمعوني
وعند ما خلقت من أول دقيقة....بريحان المعنى ريـــحنوني
أنا والشعر في صحبة عــتيقة....وكل اللي بيغنو بيقربـــوني
م في بلبل طلع صوتو بحديقة....تعلمتو على سحري وفنوني
وتنجي هالزجل من كل ضيقة....عملت للدف طارة من عيوني
ومن جفوني ومن رياشي الطليقة....عملت رنة نــحاساتو الحنوني
وإذا سألتوا الدني بتحكي الحقيقة....عن الزغلول والجوقة المصوني
منها بيشهدو عموم الخليقة..............طلع أكتر من تلاتين شاعر
.........وما قدرو لحد هلق يلحقوني

شفيق · #3 02-12-2008

شادي ::
جار القمر بالهمس نادانا.....وعا صيدنايا الشعر ودانا
الزغلول والديب وأنا خداج....هدينا عدير السيدة عدراج
...............ديرك يا عدرا شموع ضوانا

وجينا على جار القمر زوار....نشوف القمر ونزور بيت الجار
وقت الوصلنا هون لاقينا.....أقمار عم تضوي على أقمار
وصار السحر يلمع بعينينا....بجار القمر صار الاسم محتار
وغنا قبل ما نقول غنينا....دار للأقمار صرت اليوم
.............وهودي القمار الهون أهل الدار

وقت شعري بتصويري تأنى.....ومن قوس السما ألوان جنا
بريش النور روتشت القصيدي....ونام الليل عالشهر المغنى
الشمس سمعت قصيدي ومن نهيدي....تلون خدها نبيدي وتحنا
وسكب حالو بحضن كاسة نبيدي.....شربت وقلت كاسك يا وطنا

ويللي انعرف رسام مش عادي...........شادي أبو مياس ببلادي
سرقت النعومة من خطا مياس.....وفيها عدرب الشعر عم دادي
ملكت الصلابي ووقفة المتراس....بحرب الشعر تتكون زوادي
مزجت القوافي بخمرة الأحساس.....وصبيتها بكاس الوحي الهادي
وسقيتها للناس كاس وكاس......وصارت الناس تقول منعادي
وهلق مع الزغلول حد الناس....بشعري ما بدي كون متمادي
ما جيت يا زغلول اعمل ماس....يولّع المنبر نار وقادي
عرفتك لأشعار الزجل نبراس......حملت الشعر عجناحك النادي
ولو عالحمل صاب الجنح وسواس....الشادي عا قد الحمل وزيادي
جايي تا قول ارتاح يا بو الياس.....وريح جاحك من تقل هالحمل
................وارمي الشعر عجوانح الشادي

وهنا القصيدة الخالدة لشادي
وكيفك يا عادل بعد غيبة عام.....بقلك أنا من قــــبل ما تقلي
شاعر وفي متواضع ومقـــدام.....وما يوم عن مبداك متخلي
عيف التواضع وانتضي الأقلام.....ولا تقول غنيتو من القلي
يللي ب ملي مــــنبرو إلــــهام.....غير المن منبر عم يملي
ويلي تحت باطو الوحـي بينام....غير التحت باطو إلو مسلي
ويللي بيخلي الشعر نحت رخام...غير اللي دبش حجار بيخلي
ويللي بيولي الشعر عالأحـــلام......غير المع الأحلام بيولي
ويللي بيعلي للسما أعـــــــــلام..غير البقي بأرض الشعر علّي
وهيك جوق الشام متل الـــــشام.....,...عالية وعاطول بتعلّي

شفيق · #4 02-12-2008

عادل:
بجار القمر يسعد مسا الحضار.....مش بس شفنا في قمر لللجار
فتنا وشفنا قمار عالميلين........بجار القمر موجود أحلى قمار
يا صيدنايا بدل عمر تنين......غنيت فيكي وسلطنو الأفكار
وحملت أخصام المنابر دين.....واليوم جايي كبير حد كبار
زغلول عم بيرفرف جناحين.....وعادل جنح نسر بجناحو طار
ومن سوريا جناحين والوعدين....يكفو الطريق ورحلة المشوار
ومهما الصعاب تمر عالقطرين....ومهما انقطع وصل اللقا والحب
...................ما بتوصلو غير كلمة الشعار

جينا يا سوريا عقلعتنا.....وجبتنا المحبة بصدق كلمتنا
عا صيدنايا لديرة الأطهار....تالسيدة تبارك رسالتنا
وجبنا تحية صرخة الأحرار....برجوع أسرانا لساحتنا
وجبنا تحية من سمير قنطار....البمواقفو شرف قضيتنا
لمجد الأسد للقائد البشار....اللي عزتو بتضل عزتنا

يرتجل

منعيدها ويا ليل معنا سهار....ويا ارتجالي خش سهرتنا
معروف عني خلقت شيخ الكار....وهيك البداية من بدايتنا
ونحنا النهاية وسيفنا بتار.....ما في حدا يقرب نهايتنا

وهيدا درس يا كل هالأقطار....أنو التنازل عار أمتنا
مجد الصمود بسوريا الثوار....ومقاومتنا وصرخة الأحرار
............هو وحدهن صانو كرامتنا

وبدهن سفارة ترفع البنيان........بن سوريا ولبنان عالأزمان
وبسبور مع فيزا وختم وحدود.......تا يصير فينا نقشع الخلان
لا لا يا سوريا قطعنا عهود........نحنا رجال الشعر والأوزان
ما منعترف بحدود أيدي السود....سايكس وبيكو القسمو الأوطان
منحضر وقت ما بدنا ومنعود.......بفيزا وبلا فيزا لكل مكان
بجوانح الكلمة وصدى المنشود....منطير من صنين عبلودان
وبصيدنايا مصطفى ومحمود.....يغنو بفرحة بولس وسمعان
نزور الكنيسة وجامع المحمود....نسلم على الشيخ وعلى المطران
ومنروح عا أرض الإبا والجود....أهلنا نشوف بحما سلطان
مافي عدو إلنا سوى اليهود.....وشوكة رح يضلو بعينيهن
.................أهل الكرامة بسوريا ولبنان

وتنعود هالحفلة يا خلاني.....البالذوق والأزهار ملياني
مع شاعرين الحب من لبنان....وبسوريا بالكفة التاني
نحنا رسالتنا لها عنوان......حب التعاون خط إيماني
تتضل راية شعرنا تنصان.....بشعر سوري وشعر لبناني
وهون ما بيتضيع العنوان.....عنوانكم نازل بقلبي حفر
...........وبقلوبكن موجود عنواني

يرتجل

وما كنت بدي اليوم سيرة جيب.....صوب التحدي مرتب الترتيب
لكن شفيق اللي هجي خداج...............اليوم بدي هذبو تهذيب
وشادي البحبو بحر شعري ان هاج....بيغطس ببحري بعذبو تعذيب
يا ديب لا تبهور علينا حاج ...........نحنا جماعة منعشق التأديب
شو مفتكر خداج صوص دجاج.......تا هيك تحكي والقوافي تجيب
شفتك جنب مني يا نور سراج......وشمس المعنى شمس ما بتغيب
رح قلك الليلة بلا إزعاج...........كلمة صحيحة والهدف بتصيب
الديب لو بتطعمو بنعاج...............الديب بدو يعود يرجع ديب

شفيق · #5 04-12-2008

عادل:
طلعو عالجــــو زيارة....بالطيــــارة الهدارة
ونحنا شفنا قمار الجار...بلا جناح ولا طيارة

صــــيدنايا عالأزمان....خلقاني للطـــهر مزار
من سوريا ومن لبنان...زاروكــــي كل الأقطار
للنور خلقتي عـنوان..وكل ما بتطلع شمس نهار
ببركة سيدة الإيمان....الشمس بإيـــدك اسوارة

شفيق:
بهالليلة عــطيت مواعيد....بتفكــيري وقوة زندي
المنبر صرلو زمان بعيد....ناطر من شعري سندي
ولولا جينا الـــــعيد نعيد...هالسهرة بتطلع عندي
سهرة شعر بــعظمة عيد....الفطر وعيد البربارة

شادي:
الشاعر كل ما فكرو حك.....بيكرج شعرو كرجة نهر
بيوضع أبــياتو عـــمحك....السامع كل يوم وكل شهر
والحبسات ببيــــــت اليك....إلها دوبارة بـــــــــالزهر
والحبسة بأبــــــيات الشك....ما في إلها دوبـــــــــارة

المشاركة الجايي بداية المحاورات

شفيق · #6 04-12-2008

شفيق:
يا منبر صارحني,, ليك.....بعروقي عم يغلي الدم
عرفتك من نظرة عينيك.......في هم وقلبك منحم
ومهما عادل صار عليك......يتمختر لا تحمل هم
بدو اللـــــــيلة عادل بيك.......يدخن اخر سيكارة

عادل:
بيشهد يا منبر ماضيك......العملاق تقزم حدي
جاييني ربع المتـــليك ....وبحصة تتهدى مهدي
واخر سيكارة يا شريك......بدخنها الليلة وبدي
اطفي السيكارة واطفيك....وحرم تلعب بالنارة

شفيق:
رح حرم العـــب بالنار....ورح بلش العب بالمي
عندي ســـنارة أفــــكار....ما بتخــلي شاعر حي
بنزلها بروح الأشـــرار...وبطلعــــها شوي شوي
ووحدك من بين الشعار...بتتعـــــلق بالســـــــنارة

عادل::
بدك تا تلعب بالمـــــي....بركة نايلون يا مهضوم
تطبش فيها شوي شوي...ساعة تغرق ساعة تعوم
جبنا سنارة من الـــحي...لعبة صرت عليها تحوم
جايي تعلق فيهــــا بي....البحـــــرية والبــــحارة

شفيق · #7 04-12-2008

شادي:
منبرنا حــــارة وبيـــــوت...ويا ويلو الناوي العركــات
فيها جوري وفيــها توت...ورجال بتحمــي الحــارات
عادل ضج وصابو سكوت...بهالعركة اللي فيها فــــات
وناطر تالزغلول يفـــــوت...ونســـكر باب الحـــــــارة

الزغلول::
يا شادي الله يحمــــــيك...تتـــسهل معنا أمورك
لوما عادل وصـــا فيك...ما تثبت معنا حضورك
عالحارة الله يخــــــليك...لا تنــــطر مني زورك
فيها شي مزعج هونيك...وكل حــــرامية هالكون
................موجودة بهيك مغارة

شادي::
الحارة منها مـــغارة عيد...حسابك تنصحح ظنو
بالحارة حمــــام بــــــريد...تزوروه ولا تـــتجنّو
الفوتة عليه من التـــــأكيد...مش متل الطلعة منو
طاسة سخنة وطاسة جليد...بتتهنو بهيك زيـــــارة

زغلول::
تكرم يا شادي الأنغام...الله يديمـــك ويــعافيك
عا حمامك ما بتنــلام...عليك مبــارك وبهنيك
عا لبنان بوجه الــعام...رايح من هون وخليك
عا مراية هاك الحمام...تبقى وحــــدك تتبارى

شادي:
عا مراية شعري المصــقول...وحدي وقفت ووحدي بضل
عالمنبر احـــــملها وجــــول...واكشف فيها عــيوب الكل
لا تهـــــــــــرب منها وتقول...أنو المــــــشكل رح ينحل
وأنت خــــــــبارك يا زغلول...الــجارة بتنقــــلها لجارة

زغلول:
قلــــــتلك يا شــــادي كن...وتا تسلم فــتح علينك
حاجي تبرعط حاجي تعن...الحفلة مش لعبة مليك
تأكد لمــــــا علـــيك بجن...ما بيعودو يحنو عليك
لا كبار ولا صغار السن...ولا الجارة ولا البصارة

شفيق · #8 منذ 4 أسابيع

شفيق::
بمهد الفجر عا نغمتي يا ليل فيق...واسمع شفيق واسبــك عقود العقيق
هي أول المرات بالشعر العريق...زهر المعاني صار يــدلق بالرحيق
ومن شان هيك بعتمة الليل الغميق...بالشعر جايي الفعل عن حق وحقيق
في هالمسا ينقل ولاية هالزجــل...من منبر الزغلول عا مـــنبر شفيق

زيادة
يا مولعين النار لا تلومو الحريق...عليكم مساحاتو إذا صارت تضيق
نحنا إذا من الفكر عبينا بـــــريق...أكبر محــيط بكاسنا بيوقع غريق

زغلول::
يا شاعر البعدو غصن عقلك طري...بيعد نحاسك عن خزايـــن جوهري
بالسوق لما يصير في بيع وشــري...سعر الحدايد مش متل سعر الفري
وحتى نترجم هالكلام العنتــــــري...أسهل عليك ان كــنت جايي تفتري
تنقل لرحمة ربنا المولى الكـــريم...من قبل ما تنقـــل حجر من منبري

زيادة
وضح كلامك يا شفيق العـــــــبقري...بــتستاهل الشفقة عهالقول البري
صرلي عمر واقف عبرج المشتري...من قبل ما بشعرك تبيع وتشتري

شفيق · #9 منذ 4 أسابيع

شفيق::
بستاهل الشفقة وأنا بالاختــصار...من حروف اسمي الفجر خيطانو استعار
بتقول عندك منبر حجــارو كبار...من المستحـــــيل تزحزحو صواريخ نار
مزبوط لكن وقت ما اخــد قرار...وانقل لرحـــمة ربنــــا بـــــتالت نــهار
بزيح الحجار وبجبر اللي شككو...يتوبو لألله ويركـــــعو فــــــوق الحجار

زيادة
لولا هجمنا عالـــخصم دايـــــر مدار...ما برجعو إلا غبار على غبار
ولو حصن خيبر منبرك هاليوم صار...جايي أنا وحامل بإيدي ذو الفقار

الزغلول:
بدك تزيح حجار مش مــمكن تزيح...لكن تتسلم من طريق الموت زيح
أنت بحياتك ما عملت مـــــرة منيح...وبنهار دفنك كان غيرك مستريح
نحنا جمعنا حـــــجارنا من كل ريح...وبسوطنا ضربناك تتبطل تصيح
ولما ركعنا قال منــــــبرنا الصريح...ركعو البلابل فوق مقبرة الفحيح
تأكد ما عندي شك وبقــــــلك صحيح...بتقوم حدي متل ما قام المسيح
الزغلول عم يعمل عجايب بالزجل...وبيجبر الموتى يقومو من الضريح

GEORGE-TALI · #10 منذ 4 أسابيع

انا جورج من صيدنايا انا لم انتهي بعد من التسجيل في هذا الموقع بينما كنت اكتب معلومات عني واتنقل من موضوع لاخر صدفة اقرا حفلة صيدنايا وان مغرم بالزجل شششششكرا فرحت كتير

شفيق · #11 منذ 4 أسابيع

شفيق:
هاك العجيبة من صميمي بودّها.......لكن على المنبر بيقلب جدّها
لا تفيّق شرارة وبنار تمـــــــدّها.......بتولع الـــــغابة متل ما بدّها
وبيصير يكبر مدها ومن مـــدّها...يسطي على خشاب المنابر حدّها
فيقت روحي وما قــدرت تحدّها...رح بسألك من أمسها ومن غدّها
هاليوم يا زغلول شو اللي جابرك.....تفيّق مصيبة وأنت منّك قدّها؟؟

زيادة
الردة العلى رداتنا بتردها...فينا بجواب صغير نحنا نصدها
الثغرة اللي عم بتشدها عمشدها...يا سدها يما نحن منسدها

الزغلول:
يا مفرخ من جديد مش رح بخدعك...حركت عاطفتي وعجبني مطلعك
خليك حدي ولا تغير موضــــعك......فكر وغــــني بحب إني اسمعك
لكن إذا بتنكر جهود الطـــــــلعك.....رح شد فــيك نزول حتى وقعك
ان كنك مصيبة مصيبتك مابتنفعك.....مسكين مـفتاح المقابر مش معك
وقت اللي بدي بشيلك من المقبرة....وعالمقبرة وقت اللي بدي برجعك

شفيق · #12 منذ 4 أسابيع

شفيق:
رجّعتني عالمــــــقبرة جــوّا الثرى...من بعد ما فيّقتني شو اللي جرى
عا كل حالة عن قـــــناعة ومقدرة...اقبرني بجيب العتم متل الجوهرة
بالمقبرة بساوي منـــــــابر للورى...وبحاســــــب الشعار قدام وورى
حتى ال نجي من سطوتي فوق التراب...يعلق بأيــــديي بــــــقلب المقبرة

زيادة

وينو المهلهل ينده على عنترة...وشمشون ينزلي بتخن صنوبرة
وشعّار في شعّارها متجرجرة...بردّن على المنبر رقاب مكسرة

الزغلول:
يا صيــــدنايا بنورك علينا انجلي...وساعة ظهورك عالدني لا تأجلي
ويا تراب فوق تراب عرم وانتلي...وخلي الدني تخلق زهور مشكلة
ويا شفــــيق اليوم سعرك ما غلي...عصـــبتني ودمي عنهفاتك غلي
كان زين شعــــيب عالي المنزلي...راح وتركـــني بهالطفالى ابتلي
وما زال عم تــعمل عليي مرجلي...لـــــــما أنا بوديك عديار البلي
ان فكرت تتمرجل بقلب المقبرة...رح تـــــعلق بإيدين خيي بو علي

شفيق · #13 منذ 3 أسابيع

شفيق:
يا روحي عا صدى الاهات حنّي....الشعر مشـــــتاق حــــتى يدوق بنّي
الربابة عا وترها وصــوت عودو....عنّت خمــــــــــس تعشر ألف عنّي
رجع زغلولنا وأكـــــــمل جهودو....وخطف روحي وسلب عمري لإني
سبقت الــــضو بجـــبالو وجرودو....وبساح المرتجــــل ما خـــاب ظني
وقت ما فارقت عمـــري وورودو...وزرع المــــوهبي بــــطّل يجنّـــــي
سمع رب السما وخــــــبر جنودو...يروحو يفرشـــــولي تـــــنعش جّـني
...........
وأنا ورايح على رهبة حــــدودو...سمعت الكون رن بفرد رنّي
اجتمعت بزين في غربة صعودو...وبقلب المقـــــبرة بدينا نغني
وقلي بــــــــعد ما نــــفذ وعودو...أنت ذكرتنـي في صغر سنّي
وبفن المـــــرجلي وعزة صمودو...أنت خــــلقان فنك متل فني
....
وصرخ والصوت بعّد في شرودو...أنا الشعار بعـــرف مــــين هنّي
شفيق اليوم ما بحطـــــــم وجودو...بشفيق الشعر بدي الشـــعر هنّي
وبقوّة نـــبرتو وعـــــــزّو وجودو....قلـــي خــبّر الزغــــــلول عني
وأنا ماشــــــي على وصيّة خلودو...رجعت مخصوص يا زغلول قلك
..................إلا زين ما بيحميك منّي