شو هالعجيبه بخامتك ياتراب=ياحاضن بقلبك عِدا وصحاب
من ميل فاتح للمنيّه بيوت=ومن ميل مانح للحياة خْصاب
متل البحر مَ المَي يِرْغيها=وموجات عاصدرو يعَلّيها
من جَبلْتك بتعَمّر الأجساد=وبجبلْتك بتعود تطويها
فوق الملامح وين ما بتزيح=مَ بتُرْسم بوجه المحبّه زيح
عاشق إنت للشمس بالصّحرا=وبالغاب عاشق للشّتي والريح
بين الدهور بْلعبتَك ماضي=بِتْوَشْوِش الزعلان والراضي
عا وجهك مْنِقرا خْبار اليوم=وبقلبك مْنقرا عن الماضي