شَعْرِك الـْ كان يْلِفّني وينـام = وْإنْتي تْنامي مْلـَفْْلَفي بِحْرام
وْإسْهَر أنا هِزّ الْعَتِمْ تـَ النَّوم = يْهَرْهِرْ دَفا مِنْ شَجْرِةِ الأحْلام
شَعْرِك الـْ فالِتْ فَوقْ صدْر العاج = شلاّل عتْم وْطاف فَوق سْراج
وْعاراسِك بْيِنْلفّ مِتْل التَّاج = الـْ فَوقُو سَما وْتَحْتو سَما مْنِ رْخام
وْهالنَّهرْيا الـْ عَ ضِفّتُو غَفَّى = وْرود الـْ إجِتْ بالبَردْ تِتدَّفَّى
وِمْشَكْشَك بْشَكْلاتْ تـَ ـصَفَّى = صفْحِةْ عَتِمْ وِمْزَوْزَقَه بـِ قْلام
والصِّبح ..بالحمَّام كلّ نْهار = بيصير شَعْرِك لِلغَزَل غيتـار
وكِلْما الْمِشِطْ بِيْمِرّ عَ الأوتار = بْتِرْقُص قْبالُو مْرايْةِ الْحمَّام
يابِنْت ..شَعْرِك وقْت ما بْتِرخيه = مْنِقْشَع ألِفْ ذِكْرى وْذِكْرى فيه
وْحامِلْ حَلا الأيَّام ..لاتْقِصِّيه = بْتِنْقصّ مِنْ عِمْر الْحلا الأيام
وليل السَّوادُو لَونْ شَعْرِك خَصّْ = ألفَين غَصَّة عا رْفيقُو غَصّْ
وْبِبْيوتْ شِعْري بعْد ما بْيِنْقَصّْ = بْيوتِ الْعَزا عاشَعْرِك بْتِنْقام
وِبْصير عيِّش هَيْك عَ الذِّكْرى = ذِكرى الحلا اللّي انْقَصّ بالْجَكْرَه
وْبِطْلُبْ لـَ ألله يْعَجِّل بْبُكْرا = ت َ يْعُود شَعْرِك طُوْل حَور الشَّام
وْبِسْهر أنا وْإيْدي عَلَى خَدِّي = وْبِبْكي ..وْقَدِّي !!ما انْبَكى قَدِّي
وِبْقول ألله يْقصِّر الْمِدِّه = وِيْطُولْ شَعرِك مِتِل مابَدِّي
وْحتى الحلِم يِتْحَقَّق بْغَدِّي = كيف بِقْدُرْ نام عَ مْخَدِّه
=======================
شَعرك الـْ كان يلفّني ويْنـامْ = ويطير فيِّي بْجانِح الأحلامْ
ياما نْظَمْتِلُّو قَصايِدْ بكْر = ما خطّها شاعر وَلا رسّـامْ
شعرك الأشقر متل ضوّ الشّمْع = هالْكان يلمـَع بالليـالي لمْـع
ياما ويـــاما مْحَمِّمو بالدَّمع = ومْمَّشّـطُو لِلْخَلْف وِلْقَدَّامْ
كنْت مِنّو لِعِبْ ما إشبع لِفُّو عَ إيدي = مَقْطَعْ ومَقْطَـع
بالكون كِلُّو شَعر ما بقْشَع = ي َ حبـال شمس مْخايْلِة عَ رْخامْ
قدَّيْش بدَّا تْنوح الِمْخدِّة ! = الـْ هامِتْ بشَعرِك هالحلو قـدِّي
وقدَّيْش بَدُّو يِفِقْدو خَدِّي =اللِّي فضَّلو عَ ألف ريش نْعام
وقدَّيْش بدّو التَّخت يِتْذَمَّر = لمَّا بْيعْرِف شَعرِك تْقَصَّر
وقدَّيْش بدَّا قْلوبْ تِتْحَسَّر = لمِّنْ رح تْطِّلِّي بِهالْهِنْدامْ
كنتي إذا بْهالحيّ رِحْتي شويّ = تِعِمليلي مْظاهَرة بالحيّ:
هايْدا يْصَرِّخْ آخ، هايْـدا خيّ = هايْدا يْرِشِّكْ ورد هايْدا خـْزام
وْهايْدي تْناقِرْ جَوزْها المَفْجوع = هايْدي تْهَدِّي إبنْها المنزوع
وْهايْدي تْشارِع خيَّها المَوجوع = لكنْ ِبشَرْعي ما حدا بْيِنْلام
بِدْعي على الحلاق؟!، شو ذنبو ؟؟ = معقول؟!، مُشْ معقول ما حبُّو
ما قَصَّرو، ولا طاوعو قلبو = لوما بْشِغلو للقرش خِدّام
بِدْعي على التّمْدين، عَ الموضة؟ = وْبِدْعي على أذواق مَمْروضة
بِدْعي عَ عصْر النّور والفَوضى = يِلْعَن أبو التمْدين والأيام ..
الـْ مِنْ شَعرك المِشَّـقَرّ حرْموني = وشالو حِلِمْ أخضر مْنِ عْيوني
ولوما تْكوني شْويّ مجْنونِة = مــا تْركْتِي مْقَصّ ..يِلْمُسْ لَمْـس
============================
شَعرك الـْ كان يلفّني ويْنـامْ = لفِّة عْيون الطفل بالأحلامْ
ومِنُّو لحالو كان يتْخَصَّل = خِصْلِة إلي مْخدِّة وْخِصْلِة حْـرامْ
وأغفى وْشعرِكْ يِسْهر عْليِّي = وبْغفوتي يْسَبِّل عَ عينيِّي
وأوعى ولفُّو بين إيديِّي = متل الملاك بْتخْت ريش نْعامْ
ولمَّا كنِتْ إصْحى مْن الوهْلِة = وجدّلِك بالعتِم عَ مهْلي
تـَ جْدايْلك تِضْحك وْتِندهْلي = وتْقول: خلِّصْني من الإعدام
بْيِظْهر عِرِف شَعرِك رَحِ تْقِصِّيه = وْراح يندهْلي تـَ إشْفع فيه
وْما في إلو غيري .. أنا مربِّيه ! = وبيني وبينو فَرَّقو الأيامْ
وإنتي ضميرِكْ بالعمى موصوفْ = ومتلِك الحلاق ما بيشوفْ
وصار شَعرك متل شي خاروفْ = عم يحتمي بالدِّيب من لحَّامْ
وإنتْ يـا حِـلاق بِدْعي عْليكْ = أللهْ يِنْقل هـمّ قلبي لَيْكْ
أصعب مَ تِعمى وييْبسوا إيْدَيكْ = ويصير عمرَكْ مدرَسِةْ أوهامْ
كيفْ لكْ قلبْ تِقْطَع أمل عمري ؟ = وانْتي .. يا إمّ الأملس الخمري
فْطمْتي طفل رابي على غمْري = تـَ تْعيّشيه عَ سِفْرِة الأيتام !
كيف تـَ الِمْقصّ لْفَوقْ شَعرك مَرّ = طاوَع إبِنْ آدم عَ فِعْل الشَّرّ
وْيا هل تُرى مَطْرَحْ ما شَعرك هَرّ = ما انْفَلْشِت حْكايِة مْنِ الآلام ؟؟
هايْدي حْكايِة مِنِ دْموعي البكِرْ = الـْ بِقْيو مِنِ عْيوني بِشَعرِك ذِكِرْ
وْهاوْدي نِقَطْ مِن شَمْع قِدْسِ الفكِرْ = هودي .. ألف قاموس إستفهامْ
بَعْدو معي مَنْديلِك الأصلي = بْكَرّمُو وبْعاملو بْأَصلي
وتـَ يْضلّ يبْكيلِك، ويِرْقِصْلي = مِن شِعرك الـْ بيحِنّ عَ وَصْلِة
إنْ كــان عنْدِك بعْد شي خِصْلة = ابْعتيها اليَوم ذكر للمنديل
=======================
