قصيدة / عصام العبد الله

راجح · #1 08-01-2008

ألقى الشاعر عصام العبد الله هذه القصيدة في حفل تكريم الشاعرة أمل جراح عام 1998

***

ودّوا حدا يفيّق بساتين الكلام
أو
تلفنوا بيرن ديك المملكة
وبينتبه نوم الحمام
وبيقوم عالشغل الزمان
راكض كإنو حامل الأيام
تيقدما هدية
وصلت ع حفلتها أمل
كحلة عرب والصوت صوت شوام
حتى الشجر بيفيق عاضو الخبر
بيلم شو عندو صور
بيحطها بالمي
بيصير في صفين من شجر الحكي
بتمرق أمل
متل المعاني بالجمل
ومشعشعة متل النحل
بيعن تايحلا العسل
ودّوا خبر
إنو القصيدة مارقة بين البيوت
سمّوا القصيدة بإسمها
أو سمّوا ياقوت
بتدق ع بواب الشعر
بتفتحلها بيروت
أهلاً وسهلاً يا أمل
ومضوية متل البدر لما اكتمل
بيصير ليل المملكة
دفتر غزل
وبيروح يلعب عالجبل
مهر الشعر
لما الشعر بيقول كتبتني أمل

زاهر حدو · #2 09-01-2008

حلوة
بس بتشبه طلال حيدر , أكتر من اللزوم

راجح · #3 10-01-2008

ياأستاذ مفلح

بالنسبة لعصام العبدالله ..وقت بتعرفو أكتر بتعرف انو لأنو مسرحو كبير كتير بيكون الحضور قليل .. و وقت بيكون الحضور كتير بيزغر مسرحو..
دور عليه وشوف ..لأنو قلال بيفوتو من الباب الضيق ..

ملاحظتك بتدلني انك مخبى جرة من عرس قانا وقاعد عمتمزمز فيها .. فخر للموقع يكون فيه حدا بيعرف كيف يربع الجرس

راجح