يا حضرة المسمار شو للي أجبرك=تصلب مسيح الموهبه عا منبرك
من قبل ما نقلّك عن سرار الفدا=المفروض عن فعل الندامه نخبرك

القربان مش متل العماده يا حلو=ومسمارك بكف المسيح ما اثقلو
ول ما بيشعر بالندامه وفعلها=ما منقبل القربان يتقدم إلو

يا حابس فكارك بدهليز الظلام=ما بحسدك عا هالفصاحه وهالكلام
بالشوك والجوري ونفحات الخزام=بتعالج الموضوع حكيك مش تمام
وبالسكر والخمره وكاسات المدام=بتشبه الفادي بهالصوره حرام
سر الفدا دين وعباده والتزام=وتضحيه وصوم وصلا وحب وسلام
ومش كلمن تعمـّد مشي عا هالنظام=وسوكر الجنه وصار مرفوع المقام
تا تنال بالموضوع معنا احترام=لازم تتوب وتندم وتضرب سلام
ولا تكون توما الما عرف سر الفدا=الا بعد ماربنا من القبر قام

لوما من المسمار ما في جلجله ؟=وشك توما فضل عالرب العلي؟
هي فلسفة فاتح وديكارت الولي=العاشو بدنيا بالشكوك مرسمله
ومن قبل ما تفتح بواب المرجله=وتجني عا حالك بالشعر والترغله
عا منبرك من قبل ما تشك الابر=حيـّد من صواريخ عمك بو علي

يا فاتح اسماع الحقيقه واستريح=رح خبرك فعل المنيح من القبيح
للي ثبـّت المسمار بكفوف الجريح=ولليوم بعدو حقنا عم يستبيح
وفرّق الاهل وعمـّر سياج الصريح=مش رح بوديلو زنابق يا فصيح
بودّي إلو صاروخ يعمي خلقتو=من عند أطفال النبي وعيسى المسيح

للي تسلحو بالعلم والحق اتدعو=حقوقنا أكلو وما كانو يشبعو
وهالمعتدي عالحق كيف بتردعو=بالسلم؟حتى عالجريمه تشجعو؟
عندك زهور تبرطلو وتدلعو=كلما الهوا بيميل بيميلو معو
وعندي شباب بحقهن متسلحين=وإلا لخلق هالكاينه ما بيركعو

استسلم لأمر الواقع وسوء المصير=أكتر ما صار بشعبنا شو رح يصير
وحياة إسم الرجـّع الاعمى بصير=ما بقبلك عن مجد أمتنا نصير
طمـّن طفالا نايمين على الحصير=وطمـّن ضحايا بلادنا وأهل الاسير
بسلاحنا مش رح نفوز المعركه=نحنا ضعاف وباع أمتنا قصير