يا حضّار اللي دعوتنا لبيتي=اسمعوني وزقفّو هلق لبيتي
لو زرتوني بشي مرّة لبيتي=الصدر الكن ولي عتبة الباب

سفح الجبل لا اطلع عتبتو=وناجيكن إذا عليي عتبو
باب بيتك يا شاعرنا عتبتو=أعلى من قصر عالي البواب

صقر الشعر يا عالم شي غف لي؟=وقصد بيتي على غفلة شي غفلة
وأنا زايد بشاعرنا شغف لي=اللي قادر للملا يوزّع أدب

شمخنا بحبّ سوريا وعلينا=بأسدنا المثّل الحمزة وعلينا
ضيوفك فضلو عليك وعلينا=لما شرفو ودقّو البواب

إذا الشاعر لهالزرقة غزا لها=قصدانو بوحي الخالق غزلها
ولهالحضار منغنّي غزلها=شو بدنا بالسياسة وبالعرب

يا فكري كلما السامع وما سراح=ان كان في جنون في عقلي ومس راح
سوريا مرتع صقورة ومسرح=وعرين أسود يحرم عالذئاب

إذا شعارنا داخو وسكرو=قفل الشعر في يدّي وسكرو
السياسة بابها زيحو وسكرو=أنا بسلّ الصوارم عالحراب

إذا خصمي على المنبر معنّى=غير الود ل شعر معنّى
العتابا باسمنا ومنبر معنّى=وأنا باسمي خلقت امضي الكتاب

بو علي وجودك بين جلسة انس حبّ=ومافي ولا جنّي ولامتلي انسي حبّ
لا تفتكر لو كان سيفي انسحب=أنّو القضية يا شفيق هويّنة

شعرك عا طريق الحق دارك=وصديقك حصن لولا الوقت دارك
وما زال نحنا دخلنا بواب دارك=شو بدّك بالسيوف وبالقراب

شاعر أنا عا منبري ما نسا حلي=خصمي ولا يقرب بالوغى منساح لي
خصمك إجا صوبك بطل منساحلي=ربّ العتابا والزجل ما همّنا

خصّ الأرض هالليلة وخص مي=شطبي عالخصم طالع وخصمي
في داري أنت خصمي وخصمي=إذا بيكون ربّ بينغلب

قرار الحق يا رفيقي محا ريب=بيأسس منبر وعمر محاريب
كون لمين ما بدك محارب=وخلي ذكر الله عا جنب

إذا عالخصم مرّة ورّ بابي=عقبرو العود يرقص والربابي
ما ذكرت الألوهة والربابي=على ذوقك عم تردّ الجواب

أنا من الموت مش معقول بالي=إذا بفنى وبيصير الجسم بالي
لا تتغطرس إذا طولت بالي=ولا تجبرني عليك كشرّ الناب

شو يللي صابك الليلة ونابك=ويا ساح المرتجل شاعر ونا بيك
وإذا بينتلي سنك ونابك=رح بردّك جريح بْلا نياب

متلي مين بالإقدام أقدم=بكل من وطأ فوق الأرض أقدام
وحيث منك أنا بالشعر أقدم=فيي زحفك فوق التراب

بهالأشعار مافي عمر أجداد=جدّد بالشعر تنقول أجدد
وأنا ما زالني بالشعر أجدد=فيي حطّ راسك عالسحاب

ببلدنا ما بيشمت بت عدو لي=ومتلا ما بيبتع بتع دولي
الزقفة لو سمحتو بتعدولي= عشان حسان يقرا هالكتاب

باسم الإلاه مقدر ظروف الأنام=جينا نرش الشعر منتور وخزام
بحضرة ملوك الشعر أسياد الكلام=ان ما قدرت غني منيح ما عليي ملام
لكن بحربك يا عمر عندي هيام=وجايي توضحلك قضية بوجه عام
يا بتعتلي بمقام شعرك عالسما=يمّا اعذرني أنت مش قدّ المقام

لو كنت شاعر فاهم وعقلك سليم=ما حكيت حكيك هيك عن شاعر عظيم
بتعرف مقامي وأنت عنو مش غشيم=بقدر بحمل ألوف من شكلك بقيم
لكن مقامك أنت ضايع يا فهيم=وتا تعرف وتا يعرف الجمع الكريم
طلعت سألت رضوان عنك بالسما=قلي ملفك عندك مالك بالجحيم

انكنك قوي وعندك زنود مفتلة=وبتشيل متلي ألف ما في مشكلة
لكن ربع نقطة فكر من منهلي=لو شلتها بتوقع بحملك مبتلي
ومالك أخد مني ملفي المعتلي=بالشعر والأفكار والشعر العلي
تيعذّب البيكون متلك يا عمر=باني قصيدو عالضحك والمهزلة

عقلك الظاهر يا فراس مضيعو=ضاعت الأفكار والحجة معو
لما السبع يسمح لصوص موقعو=يعطي رأي بنياب بدها تبلعو
في وقتها بسمح لأطرش بالزجل=يعطي رأي باللي ما قادر يسمعو

من بعد تاني رد نشف منبعك=وبعدو الفكر بجرار شعري ما اندعك
يا أخ ثبت جنب مني موقعك=صوص وسبع حجة ضعف ما بترفعك
ولا تفكر ان جيت وجبت بيك معك=قدام مني بالزجل رح ينفعك
وفي وقت ما بيصير قاسي مقلعك=وتركع سباع الفلا عا مطلعك
وتقطع حدود اليابسة وبحر الخيال=في وقتها بيجوز حنّ واسمعك

قدام ناس مقدرة منجلها=الردّة اللي قلتا ما إجت بمحلها
نبعي بيروي للمواهب غلها=المي البيقلبو كوثر على حلها
وبقطع دود الأنت ما وصلتلها=وبركع سباع الفلا وبذلها
ومن خلقتو البيكون ما بيسوى قرش=بيشوف حالو عالخلايق كلها

ما زال دق الشوط باب نهايتو=والناس عرفت مين رتل ايتو
شرف أخونا والتجني هوايتو=أشرف إذا مننهي الحفل ببدايتو
وهالقرش يللي فيك علا رايتو=حتى مقام الرخص بحكي حكايتو
ما في حدى رخص وجودو للوطن=إلا فرض عالكون كلو غايتو

يا قصب جيت وعم تلوح بساحنا=فاضي رجعت ومكسر من رياحنا
القدك ألف مرة غرق بقداحنا=ومن ساحان ما قدر فشخة زاحنا
نحنا الفتح باب المجد مفتاحنا=وما في سلاح بيقدر على سلاحنا
ولما القضية تصير كرمال الوطن=منفدي وطننا كلنا برواحنا

حروفي عالمنبر أمطار=خلو الكلمة معباية
وبحقل الشعر الأزهار=ما بتفتح لولايي

شاعر بالكلمة معجون=والكلمة بشعري نضيفي
وشفوق بسيفو المسنون=ما بيقدر يقطع ليفة
عالمنبر بيجن جنون=تيقلي ردة ضعيفة
ولما بكسر راسو بكون=عم اتسلى تسلايي

يا عميّر بعدو بكير=تقلي لفظة لولايي
قلي ياها لما تصير=تفك حروف التهجايي

شو بدي بليفة بفلوس=وليفة عنقك ما شالله
ببالي خلي بالدبوس=راسك عنك يتخلا
ان كنك جايي يا منحوس=الليلة وبدك تتسلا
ما تتسلا بكسر الروس=روح تسلا بلهّايي

صار عمرو 18 عام=وجايي بلهايي ودبوس
ما عاد فيي شك سهام=وما عاد فيي كسر روس
وتا يقشع أحلا الأحلام=وما يشوف بنومو كابوس
كل ما بدو يروح ينام=لازم نحكيلو حكايي

بتحكيلي بعد الأرباح=حكايي صغيرة عقياسك
بحكي روايات الأشباح=وفيها بعبيلك راسك
وبعود بحضر أرواح=ترقص بالخوف ضراسك
تتموت ومنك نرتاح=وما نشوفك عنا جايي

يا بو علي لو كان بدّك للصحيح=بشعر العتابا سبقتني وقولي صريح
لكن إذا بشعر الزجل منحط زيح=منرقص عضام الرميمة بالضريح
بيناتنا صوت الصلا شعري الفصيح=وبالشعر نحنا ريح عم بتزيح ريح
ان كنّك جريح بهالشعر يا بو علي=لا تخاف نحنا منعرف نداوي الجريح

نشالله بتبني بهالزنود البانية=ونوشف قطوفك عالمسارح دانية
خليك عايش هالحياة الهانية=وتتظلل بفية غصوني الحانية
ليش تا نفسك عنفسك جانية=وما فيك معي توقف دقيقة وثانية
القتلة الاولى بالعتابا أكلتها=وبالزجل رح تاكل القتلة التانية

يا بو علي بالحرب لو زاد الجفا=الليلة على بلودان رح ترجع حفا
شاعر أنا وعرفتني بحق وصفا=بدي خصم مليان عالمنبر وفا
يا بو علي ويا مصطفى بفن الزحل=لا بو علي بيهمني ولا المصطفى

يا صاحب الأخلاق يا نبع الوفا=شو بتستفيد ان كان رح نرجع حفا
وما زال شفوقة بقتلي ما اكتفا=وبلا قتل عينو ما بتشوف الغفا
وقت على حدودك لا تتمادى وكفا=بو علي عنك قد ما بتغلط عفا
لو كان شمس الكون بدها تنطفي=بو علي الشاعر طول عمرو ما انطفا

يا شاعر اللي أنت عالمنبر وفي=إلا بخصوم كبار ما رح اشتفي
سل المواضي اليوم حتى نكتفي=ونشوف جو الشعر عالمنبر صفي
بو علي الشاعر بعمرو ما انطفا=لكن معي هاليوم بدّو ينطفي

تهجمت عا رفقاتك رفاق الطريق=مش رح تخلي لا محب ولا صديق
الما بيعرف بيسبح بهالبحر العميق=المفروض يحمل قد ما بيقدر يطيق
وما زال عم تنوى تغني عالسليق=وبالارتجالي صرت بارع يا شفيق
بتولع الشيحة ببدء المعركة=وبتصرخ وبتقول يا عالم حريق

بلفظة سليق بقول شو هالشعر مال=بدك سلق عالشعر يا ابن الحلال
وما زالني بولع حريق بكل حال=بولع سما بولع شمس في هالمجال
واليوم جايي بالشعر ولّع حريق=تا ينطفو كلّ اللي قالو ارتجال

صوتك حلو والسمع منّو ما اشتكا=متل الكنار ان غرّد وصوتو حكا
وهلق شفيق عا مخدتو قام ارتكا=وولع حريق وبعد ما ولع بكا
ما زال أنو مغرم يولع حريق=بنزين كتّو عليه تيهبّ الذكا

نار الضيافة بولع بصدق النفوس=ما زال أني شهم من عين العروس
يا بو علي خيلك بهالميدان سوس=ولولا قشعت الشمس هلق قوم بوس
شفت الشمس قدام أفكاري عروس=وعا منبري بولع أنا حرب البسوس
من ميل منولع على المنبر حريق=ومن ميل منخلي الكتاف بدون روس

موسى الطلع عالطور قديشو قوي=متلو أنا تحتي الجبل عم يلتوي
عم نشحنك بالنور تا تضوي ضوي=بتضل مطفي وبالزوايا منزوي
عين العروس اللي عرايس تحتوي=مو بحاجتك يا شب بتحب الشوي
مولع حريق وصوتك بيدوي دوي=وما كنت تنما ولا شفت شعرك غوي
بدّك غلي عالنار 16 سنة=تا عقلك اليابس الأعجر يستوي

يا بو علي بالشعر بتركب جمل=ما قالها قبلك الراكب عالجمل
راسي أنا رح يستوي بخمرة ثمل=وسابع السما بالشعر في لجظة شمل
راسي أنا معقول أنو يستوي=وتا يستوي راسك مافي عندك أمل

ما فيك تعدي عالخيول العادية=ما بن سفوح الجبل والبادية
ما زال روحك بالعداوي بادية=ولا راسك رفاق الكريمة فادية
راسك متل طبخة بحص ما بيستوي=بجهنم ولا فوق نار الهادية

بالحرب لولا كان خصمك زعزعك=حكي الهريبة بالشعر ما بينفعك
شقلبت بالأفكار معنا موضعك=شو صار يا شاعر لحتّى ادفعك
ثبّت مواضيعك على شوط الزجل=اثبت وصفي خصم يتغنّى معك

بعلمي عملت حالك أنت متل القمر=وشاعر كبير منور ليالي السمر
عجناك لكنّو عجينك ما اختمر=وبدل ما ينفش على الفاضي ضمر
ومن شان تعرف تنسحب بالمؤتمر=عندك حيل وبواب عا أسوع نمر
يا بتلزق بحسان حتّى يخلصك=يما بتركض صوب فراس وعمر

يا بو علي عا منبرك شو اللي جرى=بعلمي أنت شاعر حروفو منورة
عرفتني بالشعر صاحب مقدرة=وجاوبتني جوابك بأكبر مسخرة
الليلة أنا رفاقي على دروبن مشيت=تا يوصّلو الميت عباب المقبرة

بالمملكة محسوبكن شاعر ذكي=وبئس التطاول عا سياد المملكي
ومن شان نحصل عا نتيجة هالحكي=من بعد هالجولة العقيمة الشائكة
هونيك جوقة وهون جوقة تانية=شرّف يا بسطاطي على المعركة

يا هلال يا معود بجوقي تعتلي=تتكون جولات المعنى ناجحة
في كفتك لولا ما غنّا بو علي=ما كانت الكفة علينا راجحة

بالاخرة بيهمنا من المسألة=مين العلى أعلى براج بيعتلي
وما زال عم تحكي عرجح الكفتين=البيهم رجحت هون كفّة بو علي

حسان طل من البواب الواسعة=وهلال متلو بلون شمس الساطعة
ردتك صارت بقلبي طابعة=تا سمعك من ردتي المتواضعة
ما بحب أني شوف كفّة نازلة=ولا شوف كفّة قبال منها طالعة

المنبر دني جود الطبيعة دلها=توزع مواهبها لشعرا بجلها
شاعر أخد عقدة قوافي وحلها=وشاعر بحنجرتو الحنونة قلها
شاعر حجج أفكار خصمو شلها=وشاعر بمرجلو السيوف يسلها
ويا بو علي حتى العقدة نحلّها=تلّة غرورك انزل على مطلها
هيك الطبيعة بنورها وبظلها=عطيت لكل شاعر لوحدو موهبي

اليوم يا شادي بمعاني المرجلي=عا قمّة المريخ بعمل زلزلي
وما في وْلا شاعر بالدني وفي هالوجود=بيقدر يقرّب صوب ساحة بو علي

تخطيت يا شادي مسافات الحدود=غلطة ويمكن ما تكون بهالوجود
هزّيت هالوردة لحتّى تشمّها=ومين اللي هيكي معلمك شم الورود

أحلالكن لو في شمس تتشمسو=أحلى بالأحلام ما تتوسوسو
كبار الزجل والشعر يللي تغطرسو=مع بو علي ما بيقدرو يتنفّسو
هالحكي الفاضي ليش حتّى نكردسو=من صوب شادي البطل الله يحرسو
مش غايتي بدموعكم تتغمّسو=ولا غايتي الزرع اللي طالع يبسو
لا تفكّرو صاير دريئة بو علي=البينيشن عليي بنظرة بقوسو

البدو يفوت عالبيت بيدق البواب=ما بيجي من الشباك يا زين الشباب
سايرتكم وعملت للجوقة حساب=وأنتو عملتو عا وجودي انقلاب
بيكفي شفيق الأطلق لسانو وساب=وما حسب هالزرزور حسبة للعقاب
والشعر يا حسان حكمة من الكتاب=يواسي العالم عالهموم وعالمصاب
لكن يا حسرة بهالعصر صار الزجل=متل الكناسة عالدروب وعالتراب

يا بو علي اعذرني عردة بالكلام=أنت العلم شو نحن م قبال العلام
لكن أنا عليق عا شعر الزجل=عم حك بالنخلة تأكبر بالمقام

الردة الاولى منعتبرها سفرجلي=كل عضة بغصتين مسجلة
لكن الردة التانية بتلبس حلي=متل العروس الفوق عرشا بتنجلي
أنت وشفيق الحلو في هالمرحلي=وخيك فراس وعمر لي بيغلي غلي
تا نعتبركم أهل شعر مأصلة=وتيابها عا قدها ومفصلي
البدو يخاطب بو علي ويحكي معو=بيقول لو تسمح يا عمّي بو علي

معقول هيكي صير منسية=وهالقد اتعامل بوحشية
وكرمال شعر صغير شوف الدم=بدل اللطف حايم حواليي
نسيتي شو كنا ببعضنا نهتم=ونتبادل النظرات يوميّة
ومن بعد ما نشبع صبابة وضم=تشهق قناديل الرومنسية
قديش كنتي تظهريلي الهم=واعكس بدال الهم غنّية
ولولا بعيونك لاح طبع الصم=اعكس بدال الصم حنّية
وقدّيش كنتي تظهريلي الغم=واعكس بدال الغم حرية
ولو كان وجك عم ينقط سم=بعكس بدال السم شفّية
ولو عا شفافك باخ لون الدم=وزمت هالخدود الموردية
بغبش تا اتحمل عيوب الذم=وقلك دخيلك حقّك عليي
وهالعلبة المكياج بنت العمّ=العشنا سوى أنتي وأنا وهيي
شمتت على اللي صار فيي أم=ما شبعت شماتة شماتة وأنانية
وهالزنبقة الكانت عطر للشم=هلق بدلتيها بجورية؟
مراية أنا واسمي مراية بتم=واللي عمل هيكي بسمير هلال

من قلّك عروحي كمليلي=وزنود الشمس تلبس كمّ ليلي
اتركيني عيش عذكرك كمّ ليلة=ما انسى طعمهن تحت التراب

يا حكمة ربنا بصلي لحمدك=عدم النسر ما عمرو لحم ديك
ولروح يا قيس بوسلك لحم ديك=وقبّل عا قبر ليلى التراب

بلادي الشعر عا دربها خاطي=منبع الفكر الدمقراطي
بلادي يا أول ما خلق مينا=مينا شعر من ربنا العاطي
كان الوحي هوي يناجينا=ويركع يبوس الموج عالشاطي
والسحر فيه نسافر وفينا=بيرسى ونلمح هالفلك واطي
واليوم يا موسى النبي بسينا=اسهر معانا وحجم الخاطي
وهنّي النجوم وعود هنينا=بشادي ومعن ورفيقنا عمور

بلادي الشعر لما خلق فيها=قلها وهوي عشاطيها
بيدور عالدنيا وبعد جيلين=بيرجع لإلها تا يلاقيها
ودار في عرض الدني طولين=وعاد وبعد جيلين تنزيها
قلها ما في بهالكونين=متل سوريا ولياليها
سوريا وجيرانها والنهرين=عطيو لهالدنيا أهاليها
ومتل ما منقول عالحالين=فوق السما الله حماها بس

وبعد المدح في مجد أوطاني=سيفي ابتسم وتنحنح حصاني
وتشجعو الأنصار والأنصار=حبّن سكن جوّات شرياني
يا معن يا شادي وأنت ياجار=وحسان قلّو للبلوداني
مو خرج ننزل بهالمضمار=الظاهر العلقة كتير حميانة
أنتو حبابي وزينة الشعار=وبهجتي وحبي ووجداني
لكن إذا بيولع بشعري النار=ما رح بعود اليوم عا بيتي

يا شفيق الباهر ليالي الحلك=لا بريد تزعلني ولا ناوي زعّلك
بالشعر جايي بكم ردة اسألك=تا اجمع غمار الشعر من منجلك
بعرف ألف زلزال ما بيزلزلك=ولا بالدهر شاعر بعمرو عدّلك
تحدّيتني وممكن أنا اتحمّلك=وشيل قلبي وبمحلو نزلك
لو قتلتني في منزلك عيبة عليك=وعيبة عليي قاتلك في منزلك

معليش لا تاخد بحكيي الأصبغة=ساوي كلامك في كلام النابغة
قلبي على حربك بعمرو ما بغا=وفعل الجرم بالشعر من فعلي لغا
وما كنت بتفكر بأني هجمت ليك=لوما النوايا البالقلوب مزغزغة

تلفنت وفرحنا بأحلى مكالمة=نشفي الجروح البالصدر متألمي
تم اللقاء وفيك عيني حالمي=فايقة بذكرك باسمك نايمة
بيتاتنا ما في قيامة قايمة=عزمتنا ومنقول سفرة دايمة
صرلا تلات اشهر عيوني صايمة=وفطرت عا شوفة الصورة الناعمة
زغزغ النية عا مزاجك يا شفيق=بتبقى نوايانا نقية وسالمة

يا بو علي اللي قايل الشعر الصفي=ولع النيران حتّى نحتفي
مدحتنا وبالمدح ما رح نكتفي=بدنا الحروب من المعاني نصطفي
ويا ذاكر النية بأطباع الوفي=ما بخالفك أو موقفك مو موقفي
ما شفت هالصدق البطيّة نيّتك=اظهرلي النوايا البالضلوع بتختفي

هاليوم عندي أصبح من العمر عيد=وأنتو ملائكنا بهالعيد المجيد
الشاعر أبو حسان سلطان القصيد=وشلهوم شاعرنا يا غريد النشيد
هيدي الندوة إيد عم بتشبد إيد=بتخلق غنا وثروة من الفقر الزهيد
حسان أنت الحكم في هادا الوعيد=تنشوف من بدو على المنبر يكيد
يا شفيق يا بحر في موجو مديد=هلق إذا بتريد نرجع من جديد
بدك تنازعني وما زال الله شهيد=عنتر العبسي اليوم مجدو بستعيد
بالشعر لا تنازع الشاعر بو علي=ما نازعو عالاسم هارون الرشيد

يا رجال عالميلين ابقو توزّعو=ان كنتو ألف شاعر قبالي بتركعو
ويا بو علي الشاعر البتغني معو=نجوم الكواكب بالمجرة بتسمعو
وما زال هالشعار هالحفلة اندعو=والشعر هالجمهور جايي يشجعو
ما نازعك عالاسم هارون الرشيد=لكن أنا هالاسم جايي انزعو

يا خينا حسان بعد الاطّلاع=تفضل بهالفختة إذا بتسمح رقاع
يا شفيق قشاع حلو الاجتماع=يقلك يا طير الشعر عالمنبر طلاع
ما بعرفك شاعر مخبّى بالقناع=بعرفك تحكي على راس الدراع
وبين النزاع والنزع حقي وين ضاع=لصحيح حاج تقسمو أربع رباع
بحاكيك بالصدق بلا غش ولا خداع=بكلمة وصداها يهز ل سهل البقاع
من شان نعرف يا شفيق حدودنا=بين النزع بدّك تميّز والنزاع

يا نسور من فوق السما يللا ارحلو=بديو بلابل فكر شعري يترغلو
ويا بو علي موضوعك العم تسألو=اسمالله عهالموضوع الله يدللو
امشيلك عشي موضوع بفكارو ملو=من شان صيتو يوصل لمشتى الحلو
موضوعك الليلة ما رح يمشي معي=ليصير موضوعك مرتب بقبلو

اطلع منطلع انزل منمشي نزول=كيف ما معك حبيت منمشي الخيول
يا شفيق بن ديب صلي عالرسول=خيفان أنّو ياخد عليك الكحول
لا شك عندك حكي يذهل للعقول=وين ما بتحكي الناس دقولك طبول
بيني وبينك ما انقطع حبل الوصول=تنيناتنا منميل عا ذات الميول
لا تخلط فروع القوافي بالأصول=وما بريد أنو يسيطر عليك الخمول
الغنّا مع الشاعر الأكبر بو علي=خلّي القبول عليه ما عليي القبول

باب التحدي بينك وبيني افتحو=وخلي المواهب في كتبنا يفرحو
الشاعر شفيق لما عيوني بتلمحو=بجرح حجر عيني ولا يمكن اجرحو
بعرف شفيق الجبل ما بيزحزحز=وبركان ما بيغيرو من مطرحو
حبيت أني هالنصيحة انصحو=من شان أنصار المعنى يفرحو
أنتة بتعزم بو علي تا ينتعب=بس عزمت حسان حتّى تريحو

يا ناس بالأفكار ابقو جودو=ورتلو هالحرف معنا وجودو
وحسان بسطاطي الحروفو ما بتدو=بليل المعنّى عا وجودي يعتدو
وهاليوم مش رح حاربو ما زالها=خدود وجّو عا كفوفي تعوّدو

شاعر أنا من كتر ما عندي حنين=ما اعتدت غنّي وجود الطيبين
يا بو علي بالشعر بحلفلك يمين=أنك أنت عا منبرك حصنو المتين
ويا أبو حسان شاعر كل دين=حدك ابن شلهوم سبع بهالعرين
يا عمر من كتر ما عندك يقين=شادي إجا استشعر حروفو الطيبين
يا معن يا رفيق الحما ونبع الحنين=بجاوب شفيق بكل رقة وكل لين
شاعر أنا خلقو خدودي موردين=بتضل ميلة فل ميلة ياسمين
من بعد ما تخلص من الخد الشمال=تكرم رح بقدملك الخد اليمين

حسان بسطاطي وجودك ما اختفى=وليل المعاني والشعر فيك احتفا
شاعر أنا وعرفتني بكل الوفا=بدّي خصم يحمل مشقات الجفا
وما زال بتدرلي خدودك بالصفا=وبعد اليمين شمال رح قلك عفا
من بعد ما خلص من شمال ويمين=دير حتّى خبطك وجّ وقفا

يا جوقة الاسمك عنهر العاصمي=بعمرك ما كنتي للمعنى مخاصمي
كلما عصبورة حدى منكم نزل=بينزل على الشعار ضربة فاصمة

بواب التحدي ليش أنتو فاتحين=نحنا الشعر عم نقرصو متل العجين
بيت الشعر كنا سوية قاصدين=تا نلتقي ونحتك بسباع العرين
لقينا عباب الدار كلمة عن يقين=الها جميع الناس بتعلي الجبين
ضيف الحما لو طل بيلاقي محل=بين الزهر والفل تحت الياسمين

عمري إلك ساعة وساعة بقسطو=من شان يا بو حسان دمك نشّطو
بحق الأخوة الناس ما بيفرّطو=واللي بيخون العهد بدنا نسقطو
الشعار عالفهرس أسامي تفقطو=متلك يا بن شلهوم ما بيتسلطو
أنتة عم بتبني اللي غيرك هبّطو=بتخيط اللي كف غيرك شرطو
ومن شان تبقى أنت فرعون الزجل=محمود بدنا اليوم كلنا نحنطو

جينا لهالسهرة وقصدنا رحابها=نقرا معاني الفلسفة من كتابها
سهرة عريقة والمجد لصحابها=وكل المودة معشعشة عترابها
ولما رجال الطيب طلو عالحما=كتبت معانا يا هلا برحابها

رح قول ردة للجميع مخصصة=بصدر الرحب وتكون منها منغصة
موسى النبي بفعل العصا شق البحور=ومحمود بيشق البحور بلا عصا

موسى النبي يعطيه الله العافية=شق البحور المالحة والدافية
وخلا جند فرعون تمشي حافية=وشربو العكار وشرب كاس الصافية
ومحمود لا تفكر بيوتو شافية=بيتو لفية عالمنابر لافية
بصاروخ وبسكين و12 عصا=محمود ما بيشق حرف وقافية

حاجي بقا بالمرجلة عم تدعي=لنك جرير قبالنا ولا الأصمعي
لو كان بالأشعار في عندك وعي=قبالي ومعي بهالليل اورد منبعي
ومهما بشعرك تنتخي يا بو علي=بدّك دهر تا تقدر تغني معي

تبت وحرمت الخمرة=وشرب المشروب
ولكن عن حب السمرة=مش قادر توب

يا مالك خمس حواسي=شو بعمل فيك
سكنت بقلبي واحساسي=ومنو بطعميك
عم شوفك وسط الكاسة=ولما بناديك
بتهرب وبصير بقاسي=وقلبي بيدوب

شاعر ما بقبل غني=ردة بالدين
متل النحل البيجني=برف الجنحين
كلما قربتي عني=بشوفك بالعين
بشوفك لو بعدتي عنّي=بالتلسكوب

دبدوبك ضاع لقيتو=عا درب الدار
ولما لبيتك وديتو=قلتيلي سهار
سهرت وجمري طفيتو=عشفاف النار
وكل ليلة بدعي ريتو=يضعلك دبدوب

السحر بعينيها بادي=ومنو صبيت
تا يسكر طير الشادي=من أحلى بيت
عالصدر الفيه بهادي=ياما تمنيت
تا يكون محل الفادي=قلبي مصلوب

قديشو حضنك دافي=والصدر مهم
وحبك سكر وكنافي=وعطرو للشم
ولو صرلي الشهد الصافي=من هاك التم
بدي حرم عشفافي=دبس الخروب

شادي:

طفلك غنا موالو=بالبكوة وناح
غمرتيه وصدرك طالو=والعنبر فاح
تا اشرب من شلالو=الروح ارتاح
رح جرب ابكي بدالو=واعمل ملعوب

تواعدنا نضل سوية=بكل الأيام
وتبقي الشمعة المضوية=بليل الأحلام
كترة ما قصيتي عليي=زادو الالام
وصارت دمعة عينيي=تطوفلي دروب

حبستيني بسجن عيونك=قضبانو رموش
رموش انغزلو من جفونك=يبنولي عشوش
عشوش تدفي مسجونك=تالشادي يطوش
يطوش الشادي وعغصونك=دمعاتو تدوب

بذكر لم حبيتيني=من ماضي بعيد
بفية خرنوبي وتيني=شبعنا تنهيد
عشر سنين هجرتيني=ولما بالايد
سلمتي رجعتيني=لتين وخرنوب

لما تطلعت عليكي=مدري شو صار
قلبي ركب جنحيكي=وهاجرني وطار
فتحتي قلبي بإيديكي=ورحتي مشوار
وخليتيني بعينيكي=يا حلوة جوب

النقل الغزلاني نقلو=ريتو ما يغيب
ومين المتلو بيلبقلو=يودي مكاتيب
ومجدك بتمنى تقلو=مكتوبو يجيب
وكل ما عيوني بتشتقلو=تبوس المكتوب

كلما شلهوم تخمر=فيه التذكار
من كاس نبيد الأحمر=قلتيلو سكار
وكلما عا وج الجوهر=نزلتي خمار
المحجوب العنا أكتر=صفا مرغوب

قلبي ولع بركانو=بين الضلعين
لمن غابو سكانو=عنو يومين
قلبي كان بإمكانو=يصبر يا عين
لكن دمعاتي كانو=دمعة يعقوب

ميجنا ويا ميجنا ويا ميجنا=بتخطر عبالي يا زمان الولدنا
نقلة غزالك عا سفوحي تنقلي=وقلوبنا عا جمر حبك تنقلي
فيكي حياتي للبداية تنقلي=ويرجع حبيبك ابن 16 سنة

سمعتك يا حمامي تهدليلي=رحت دور عليكي تاه دليلي
ويحرم عا عيوني تهدى ليلي=ويكحّلها الغفا وانتو غياب

مرت ليالي وكنت شي اغفى شفيق=وماالتقى في شاعر وقلبو شفيق
وهلق أنا بتشكر الشاعر شفيق=يللي جمعنا بمعننا وحساننا

مش كل ملتقى في الو معنا=إذا سهرنا عشمع النور معنا
معن الزايدة بهاليوم معنا=وحسان ثابت بحسان صاب

الصقر حيّك من الحالك عبايتو=يا خيطان الضحى انلفّي عبيتو
وجينا اليوم زوارو عبيتو=لحتّى نكتسي بحلّة أدب

عند ما الجرح خيك يختم اتلي=كتابي ولا تكوني يا اختي متلي
أنا البالدمع باعت يخت متلي=وعحظّي عاد من تاني جنب

بعد ما درست حبا واختمتلا=شهدِتلا بالمحبّة واختمتلا
بنت عمّا صبية واختا متلا=ولغيرا ما حسن قلبي ضرب

إذا بيكون فيكي المس تحيلي=حيلي بكون راضي المستحيلة
وعلى خدودك يا بيضا لمست حيلة=الجمر عالتلج بس الجمر داب

اخترعتيلي ألف حيلي وحيلي=وهواكي هزّ أعصابي وحيلي
وهمسك من عند الله وحي لي=متل وحي القصد طه العرب

بدل ما تكتبي بحبّي ملحمات=عملتي من مهج قلبي ملحمات
المحبّة انتحرب وأصدق ملح مات=بعد ما بالعهد قلبك كذب

سوى سيوفا على قتلي ما جرّات=وسوى دموعي على خدودي ما جرّات
لو حطّو بيننا أربع مجرات=بتفهم بعضها رموش الهداب

أتتني الصبح عا راسا طبق تين=الأرض شفتا ببسمتها طبقتين
ولما رموش عينيها طبقتن=طبق قلبي مع رموش الهداب

بيك دفل لكن نرجس امكي=من شواطي عيونك نرجو سمكي
خلقتي من صباكي نار جسمكي=ويالله اشقدّ ما حروق شباب

لمّا شفتها حدي تلتمت=من قلبي تلت فحّم تلت مات

استاذنا ابراهيم يا شاعر ولي=شاعر زكا ووزن ونبوغ ومرجلي
أوتار عودك تا بحبّي تمتلي=اسحب دموعي وتار للعود الجلي
بعدك بتدحي بالعتابا كل باب=متل مالباب اندحا بصارم علي