يا"طيردبّا"..خبري "القنطار" = العندو كرامه بالحبس قنطار
النسر ل عكتف المجد كان يغط = من "طيردبّا"اليوم يمكن طار
حلّو البطل يغفى وبنومو يغط = بتراب نصو دم نصو نار
حلّو.. رياشو بالخلود يغط = ويكتب بايدو صفحة الأحرار
لبنان تاريخ العروبه خط = من جديد حتى يشعشعو الثوار
ماعاد بدنارجال عمبتحط = وتشيل بس بخدمة الدولار
بدنا حكومة شعب ترسم خط = أحمر قبال الصهينه والعار
تتعود هالأرزه علينا تمط = جناح الكرامه فوق كل الناس

بيروت مابتركع ..مجد بيروت = تعلق على حيط الزمن صوره
الصوره جبل ..قديس من ياقوت = باسمو خطايا الشرق مغفوره
وعاقد ماصهيون باللاهوت = يغير بآيه ويطعج بسوره
بيضل أول رب من عشقوت = يكزدر ع شاطي جبيل كزدوره
خلي السياسيين فوق تخوت = شرشف حرير وشعر سنيوره
يمصو"بلح" هالجعجع العكر.. = ويدنسوا ديوره ورا ديوره
قولولهن ماعاد بدنا قوت = بدنا ت نشبع ناس مسروره
ولاعاد بدنا تانعيش بيوت = وجبالنا من الناس مهجوره
بدنا حكومة عالقلوب تفوت = توحد أرض تتعود معموره
بدناحياة ومش حجر منحوت = باسم الحقيقه نشنشلو ندوره
ل بيموت أسطوره بمالو, سكوت = ترابو بيخلق زوبعه بجوره
بس البطل من ساعة البيموت = بيكون عميخلق بأسطورة

قاوم لأنو الأرض النا ,شيل= خنجر ,حجر,سكين ,نار ,فتيل
قاوم عدو مجرم,عدو عطشان = للظلم للتهديم للتقتيل
قاوم لاتستسلم ,أذى العدوان = مافيه يمحي سطر بالانجيل
مافيه يمحي شعب بالقرآن = بيقرا الوطن بيرتلو ترتيل
قاوم بغزه,بهبضبة الجولان = وخلي شعارك جيل يلحق جيل
مابينحني ببلادنا الانسان = الا لألله حنية التبجيل
ولبنان رح يبقى البطل,لبنان = شوكة صمود بعين اسرائيل

ياجنوب مجروح الوطن تخمين = وقلوبنا من الأمس مجروحه
لاتتكل عا"أخوت بعقلين" =الباع الشرف كرمال بحبوحه
بدوالشرق غضبةصلاح الدين = توحد همم عالحرب مقدوحه
تدوّر رحى حطين وب حطين = تخلي الرياح تصير مرجوحه
تنقل سبع الجنوب ع فلسطين = وعالقدس تفرد جانح الشوحه
وتضرب مدافع ناس مقهورين = تتصير كتر الضرب مبحوحه
ياشعبنا ياألوف ياملايين = حرب التحدي اليوم مفتوحه
بدنا جرار النصر مليانين = مابتسكر العملاق قدّوحه
وبكرا بعد مايغامرو ب حومين = و ب صور يللي المجد ممنوحه
منرجع ع أنصاف الرجال ندين = ملوك للي باعو بلادنا والدين

نحنا رجال العز صرنا ضروب = بواريد مصليه على "شمونه"
من دمنا منسقي أرض الجنوب = مواويل حريه ودلعونا

فلسطين طفله من الزجل شقرا =العالم غنايا وأهلها فقرا
انباعت ألف مره بسوق الدين =من ملوك رخوه عيونها جقره
ملوك العرب حيتان ..دجالين = بين اليهودي وبينهن دقره
ل ضيّع دماغو بسفر للتكوين= كيف رح بيفهم سورة البقرا
ياأمتي ..ياديوك بطرانين = ومش قاصدين ينقِّرو نقره
مابظن فينا نرجّع فلسطين = وملوكنا عالذل مفطومين

ياشعبنا رشّو بعيونك نوم = وغيمة النومه صارت غطيطه
وبتخاف بحر المعرفه.. وعالعوم = ن رميوك بتصفي بزحليطه
من الطائفيه ضل واعي اليوم = ولاتخاف لا لڧّه ولابرنيطه
نحنا صدى من فرد صوت.. و دوم = منضل بالهمسه وبالعيطه
بقبة سما..وبنفس توبه وصوم = متعلقين بنفس مغّيطه

مين العطاك وعالمدى رخصه = تاتستبيح الناس ياصهيون
وتقتل طفال ضلاعها رخصه = بغزه و تحرقها متل نيرون
شو عاملين على العرب رخصه = وعابلادنا مكتوب أوكازيون

بالحكم مش عادل أنت , أنتي طرف = ب عود الخيانه عين موطنا طرف
وبتضل عمتحكي باسم اسلامنا = وتبيع نفط وتشتري بدالو قرف
و شيك الكتبتو من بنك أحلامنا = مالو رصيد وبالبنك مابينصرف
مابخاف صهيوني وقف قدامنا = بخاف يللي بيننا ومابينعرف
مجرم أنت ,أنتي سبب آلامنا = أنتي عدو للشعب بعيونك خرف
وأنتي وشله من همج حكامنا = تجار بعتونا ومافيكم شرف
لكن و حق حروفنا وقلامنا = الموكب مشي وعن حقنا مابينحرف
ولابد ما نکسّر حجر أصنامنا = والعار مع نهر التمرد ينجرف