" ليش على طول لما منحضر حالنا مشان نكتب شي, بتصير كل تعابيرنا مصطنعة و بايخة و ما بتعبر مزبوط عن الشي اللي عم نفكر فيه؟... ليش لما بحكي معك بستعمل كلمات عادية و بسيطة و ما فيها تكلف أو مجاملة؟.... بس بالمقابل لما بجي و بجرب اكتب شي من أحاديثي معك بصير بدور على كلمات منمقة و مهذبة مشان خاطبك فيها؟!!!!
يمكن لأني بخاف انو حدا يقرأ الشي اللي كتبته ويستغرب من طريقتي الغريبة بالتواصل معك, أو يمكن بخاف انن ما يقدروا يتفهموا كيف انو علاقتي فيك مميزة و مختلفة عن علاقتن.....
بس بتعرف....... في شي تغيير فيي بالفترة الأخيرة... صارت عندي قناعة أنو متل ما الناس الها حق تحكي و تتفاخر بعلاقتها معك, أنا كمان بيحقلي متلن و أكتر....
بعلاقتنا.... أغرب شي هو انك بتعرفني و بتفهمني متل ما أنا.... بس أنا بالمقابل ما عم بقدر أعرفك أو افهمك.... أوقات كتير بحس فيك قريب مني, و بحس اني قدرت اتفهم تصرفاتك و أعرف آلية تفكيرك..... بس بتجي بأوقات تانية بتعمل شي بيخليني عصب منك و بطل أحكي معك, حتى انو مشاكلنا المتكررة بتوصلني أحيانا لمرحلة اني شكك انك موجود معي متل ما بتقلي على طول......
هلأ يمكن أنا ما بحكي معك باحترام, يمكن بعيط و بعتب عليك, يمكن أحيانا بحاول استفزك مشان شوفك أو حس فيك, يمكن بسمح لحالي اتطفل على خصوصياتك و اتدخل بقراراتك و انقدها, يمكن كمان بتقصد هينك ادام الناس مشان شوف أدي بيحبوك و كيف بيشوفوك, يمكن بعاندك, يمكن بزعلك, يمكن و يمكن كتير شغلات..... بس صدقني انو الشي الوحيد الأكيد هو انو..... ما حدا بيحبك متلي, و ما حدا بيموت بدونك أدي......
الفرق بين علاقتي فيك و بين علاقة باقي الناس فيك, هو انن بيعرفوك.... أو عالأقل بيدعوا انن بيعرفوك.... بس هني فعليا آخدين فكرة مسبقة عنك و مقتنعين فيها.... أو عم يحاولوا يقنعوا حالن........
أما أنا فبرفض اني اتقبل فكرة الناس عنك بس لأنن اتفقوا عليها.... أنا بدي انو انت تعرفني عن حالك..... بدي ياك تخليني شوفك حوليي وين ما كان و ايمت ما كان....... و أنا كمان بالمقابل عم دور عليك.......... و إلا ما يجي يوم و نلتقي و صير أعرفك أكتر و أكتر.... و ما بتعود بتقدر تضيع مني أبدا......... ساعتها بس بيصير فيني قول لكل الناس شو هو الله بالنسبة إلي........................."  | 
