 عطس أحمد .!!. أحمد عطس ..؟!!. | |
... هلق صحيح عطس أحمد ..؟!!
- شو هالحكي .. أحمد عطس ..؟!!
... مش معقول .. أنا ما بصدق .!!
- ولا أنا كمان .
... طيب شو عرفك ..؟
- الحقيقة كل البلد عم تحكي وما عندهم غير قصة ..أحمد عطس .!!
... العمى ما يكون عملها بجد ..!!
- يصطفل ذنبو على جنبو .. المهم نحنا مادخلنا .
... دخيلك .. ليش ..هلق الواحد بيعطس على كيفو .. مش من شدة الرشح وضغط الرشح بيعطس ..أي شو الواحد بيقدر يعمل مع فيروس طاير بالهوا وعم بيلطش بخلق الله ..!!.
- ولك اسكت ..يخرب بيت اللي خلفوك ..شو ناوي تبهدلنا .. أي والله..والله .. بقطع انفي ومابعطس ولا بخللي واحد يسألني ليش عطست واللا.. يزورني بطرف عينو .. العمى شو نحنا مجانين ..؟!! .
... طيب كيف الواحد بدو يحمي حالو من الفيروس وما يعطس ..؟
- بسيطة... يبعد عن التجمعات بالأماكن المغلقة .
... متل شو ..؟.
- متل المحاكم مثلا ً يروح يلقط الفيروس من شي قاضي واللا من شي محامي مدعوم ماشي بالطول والعرض .. واللا زبون فايف ستار بيستقبلوه بشد الايدين وهات ياطق بوس من غرفة لغرفة .. ونفس الـ شي بدوائر الدولة .. والكافتيريات الخمس نجوم ..اللي كلو حاطط بوزو بادان التاني وهات ياوشوشة وتطبيق وتضبيط . ومابتقدر تفرق بين الزبون وبين الموظف والمسؤول ورئيس جمعية سكنية واللا عضو مجلس بلدي .
... ولك والله صحيح من طيبو الفيروس سارح على كيفو ..وبيقولولك ..ولااااه ليش عم تعطس . مع انهم بيعطسوا على كيفهم ولاحدا بيسأل .!!
- ولك يابهيمه .. انت عندك لكزس واللا هامر .. شي ..؟
... لأ .
- طيب عندك مكتب هاي كلاس ..؟
... لأ .
- طيب بتقعد بكافتيريات ومطاعم خمس نجوم وبتعزم كام موظف ومسؤول وتقعد بيناتهم متل الطاووس..؟
... لأ .
- طيب في عندك علبة محارم معطرة ..؟
... لأ .
- ولا سيرلانكية ..؟
... لأ .
- وماعندك شي قرايب مسؤول وإنت عم تسمسرلو وتعمل واسطات وتقبض .؟
... كمان لأ .
- أي تضرب بشكلك ..ولسه بدك تتحدى وتعطس ..؟ العمى ضربك ..قوم من وشي .
... روق..روق .. ليش طلع خلقك .. طيب كيف أحمد عطس مع انو أخ.... منا .؟!!
- ماتكون مفكر انو خلصت الحكاية معو .. ؟
... يعني .. شو قصدك ..؟!!
- طيب مانك شايف مين عم يحكي عليه ويشرشح فيه وعامل سيرتو على كل لسان .. ماظل حرامي ولاتاجر غشاش ولا شر...؟ ولا مركب قرون إلا ونازل فيه نتف ..ومش ناقص الا يجي واحد حامل مفكرة بإيدو ومبين الفرفور تحت قميصه وعم يسأل عنو .. ويمكن بكره يطلع مرتبط بشي بغل جرش مونة البلد وهربان وقاعد برااا وعم يبعتلو علف جاهز ومركز .
... طيب إذا هيك أشكال عم تحكي عليه ..ليش حتى يهتم ..؟!!
- ولااااك ياغزال .. المصيبة إنو هيدول اللي كلمتهم مسموعة .. فهمت واللا لسه مافهمت ..؟
... دخيل الله فهمت .. أتسووووووو .
- أه يامدعوم آآآآه .. وعم تعطس كمان ..؟؟؟!!  | 
