اسأل مجرب و لا تسأل حكيم ... و بالبكالوريا جيب الـ 260 | |
بطاقة تعريف
محمد قتيبة المرعي
المحافظة : حمص
الشهادة الإعدادية عام 1998: مجموع 290/290
الشهادة الثانوية/علمي عام 2001: مجموع 260/260
حاليأً: سنة سادسة (تخرج) طب بشري/جامعة دمشق
صفاته : مرح - اجتماعي جدا - حاد الذكاء
أول علامة 260 بعد انقطاع حوالي 13 عام لم يحرز فيها علامة 260 في القطر العربي السوري.
آثر الطالب قتيبة المرعي أن يكتب كلمته باللغة العامية كي تكون مألوفة سهلة للطلاب فكتب لبكالوريا ما يلي
بسم الله الرحمن الرحيم
له له يا شباب البكالوريا! لشو كل هالتوتر؟ بعرف إنّو القصّة صايرة كلمالها أصعب و أصعب و المعدلات ما منعرف لوين رايحة, يعني يمكن الـ 260 تبعي من هون لشي كم سنة يا دوبا تفوّتني عالطب تشحيط فحسبكم الله و نعم الوكيل! بس الحكي هلأ لزلم البكالوريا.....لا تخافوا الأمور لسّاها بخير و أنا قدّم البكالوريا بعدي تلاتة من إخواتي و كان الوضع عال العال بفضل الله تعالى.
لمّن طلبوا مني أكتب هالمقال صفنت و كنت قدّام خيارين: يا أمّا بشربكلكن الشغلة و بطعميكن ترعيبة ماكنة, و بعدين بطجّلكن برنامج دراسة مخيف لا أنا و لا جد جدّي بيقدر يمشي عليه, و بترككن للإحباط الناجم عن فشل هالبرنامج و هيك ما بكون فدتكن إنّما ضريتكون, يا أمّا مندردش على بساط أحمدي متل ما بيقولوا و منحكي شلون ممكن تمشي الأمور بإذن الله تعالى بسلاسة و واقعية و منعطي كم تكنيك أساسيين للدراسة و يلّي ممكن البعض يحسّ إنّون سهلين بس برأيي على أرض الواقع كتير ضروريين.
طبعاً أنا آثرت الطريقة التانية لأنّي بآمن أنّو البرامج المتحجرة تبع ادرس من الـ 6-9 بعدين خود ربع ساعة استراحة بعدين من 9 وربع للـ12 وبعدين تغدّى بربع ساعة... يعني هي البرامج مستحيل تنطبق عالناس كلهن لأنو معلومكم البشر مختلفين واللي ارتحت عليه بيجوز ما يرتاح عليه غيري فاللي لح أعمله أنو لح لخص كم ملاحظة من خلاصة هالتجربة واللي استمريت عليهن خلال دراستي الجامعية وما قصّرو معي أبداً زاتن أنا هلأ عندي فحصي التخرج بلش من كم يوم ادعولنا الله يخليكم!): طبعاً الحكي موجّه لزملائنا وزميلاتنا وإن كان الكلام يكتب بصيغة الذكورة متل ما بتعرفو بالعربي لما نوجه حديثنا لخليط من الجنسيين فلا تؤاخذوننا.
لا تخلّي نشوة الإنجاز بمواد معينة تلهيك عن المواد التانية:
كتيرين من رفقاتنا الكفوين بالرياضيات و الفيزياء أهملوا العربي فكبّوا عشر خمس تعشر علامة بدون سبب. فدرلي بالك خصوصاً من المواد اللي ما بتحبها, بعرف أدّيش بيروق اللي فهمان رياضيات لما بيطج كل المسائل بس معلومكن الرياضيات 60 وما بتنجحك لحالها!
البرامج الأسبوعية واليومية كتير مفيدة:
ليش؟ لأنها بتوجّه دراستكن يعني أول ما تفتح عينك بكير بترتب بشغلة دقيقتين تلاتة شو مخططك الزمني لليوم وشو الدروس اللي لازم تخلصها. كمان كل أسبوع بتعمل بشغلة ربع ساعة زمان شو الأمور الإضافية لوظايفك واللي لازم تساويها (مثلاً مراجعة قسم الاحتمالات أو وحدة المغناطيس أو شي كم درس قومية). هيك برامج كتير كتير ضرورية صدقوني لتبقى دراستكن متوازنة وبتخفف من وقت التلهاية والضوجان.
الباكالوريا متل سباق الماراتون:
شو يعني؟ بسباق الماراتون المتسابقين يللي بيشدوا من الأول و بيدبحوا حالون ما بيصلوا لخط النهاية وهيك البكالوريا, ما بدّو الواحد يحرق حالو بالتوتر و الكركبة من الأول لأنو بيفرط بالآخر, بلشو متوازنين وكل ما قربت النهاية بتكون دراستكن عم تشد لحتى يقرب الفحص بيفتح فتحة وحدة. (طبعاً مو معناتها ما أدرس أول الشي بس ما يقبر حالو من البداية إنما يعملو شوية نشاطات عالخفيف أما قبل الفحص بأسبوعين تلاتة مثلاً فهالنشاطات معدنا مقبولة و بتحطلي الصمغ على الكرسي لتلزق فيه و جيبو صمغ مرتب مو شو ما كان كل شوي بيفك!)
ساعة تركيز ولا ستة كلون صفن:
فالبعض بينام عالفقرة ساعة و ساعتين و عين عالكتاب و عين عم تسبح بالغرفة وبالو بستين إرنة! هادا الحكي ما بيشتغل معنا يعني الدراسة بدها تركيز و وقت تحس حالك بلّشت تصفن قوم و تلهالك شي تلهاية مسلية أو نام و بعدين بترجع بتكمل (مو تسحبها كل النهار تلهاية كمان!)
التثبيط من المجتمع عدوك الأول:
حاول تبعد عن أجواء الاحباط و التثبيط و لمّن تحس إنّو في عندك رفيق بيضل يثبطك ( يعني كل ما تحكي معو بتبطل تدرس ساعتين تلاتة) بعّد عنّو و غنّيلو!
للمستجدين:لا تفكر بالإعادة!
بالنسبة للمستجدين إنسى فكرة الإعادة و قلعلي ياها من بالك عالخالص و هادا شعار(الباكالوريا سنتان, من زادها استحسان و من أنقصها قليل وجدان) سلبة بسلبة و إذا هيك الشغلة فمعلش الله يجعلك من قليلين الوجدان! و خاصّة لمّن يقرب الفحص فالتفكير بالإعادة بيقضي عليك عالخالص ولا يمنع يكون عندك طموح يا أخي ولا حرام حتى نحلم؟
ركّز على منهاجك فقط:
بالنسبة للمواد اللي فيها مسائل يعني رياضيات و فيزياء و كيمياء فالأسئلة ما طلعت (وما لح تطلع بإذن الله) عن العامّات و الدورات فلا تضيع وقتك و تشوش حالك بنوط يصدرها بعض أساتذتنا الأفاضل (النوطة السحرية لابن دريّة والنوطة اللي ما بتخيب لأحلى طبيب وهيك شي!)يعني الأختصاصيين الجامعيين والله ما بيعرفو يحلّوها. هيك نوط بتشتتك عن الأساسيات وكتير طلاب من كتر ما بيحلّو من هالنوط بيتلبكو بأبسط المسائل بالفحص لأنو بيفكرو بأعقد الطرق بدل ما يتوجهوا للأبسط , و حتى لو خلصت فالتفتلي للعربي و المواد التانية الله يرضى عليك..اتفقنا؟ يعني شيل هالنوطة من إيدك و يالله اركض عالعامّات!
مو الشغلة بتمريق الصفحات و عدد الإعادات:
لأنّو هادا كله ما بيشفعلك بالفحص إذا ما كانت المعلومات مرتبة ببالك و منسّقة! يعني كل ما تخلص بحث مو مباشرة تنط عاللي بعدو إنما عملو شطفة إعادة و ركز أفكارك وكل ما تخلص وحدة كاملة خصص وقت لتراجعها كلها مع بعضها (منرجع للبرنامج الأسبوعي, خصص لكل أسبوع فترة تراجع فيها وحدة علوم أو فيزياء أو عربي حسب الوضع). آخر الشي يا شباب والله الشغلة بدها رضا وإخلاص بالنيّة لأن معلومكن مسألة رياضيات وحدة تطير فكرتها من بالك بتنزلك فرعين تلاتة لتحت فبتروح الله يرضى عليك لعند الوالدة و الوالد الله يحميلك ياهن و بتبوس إيدين وبتصليلك ركعتين عسى الله يوفقك و لا تعملي جو إرهاب بالبيت و تعيط على إخواتك (أنا عندي بكالوريا!!!) وتتغالظ بلا طعمة فالله سبحانه و تعالى بإيدو كل شي فلا تغضبه....سماع مني ما بتندم و استهدي بالرحمن واتوكل عالله إنت اعمل اللي عليك واتوكل على الله و ادعيه أنّو يوفقك ولا تنساني من دعاءك والسلام عليكم ورحمة الله وبركاته.
محمد قتيبة المرعي
دمشق- تموز 2007
__________________ أنا إيماني الفرح الوسيع
من خلف العواصف جايي ربيع
إذا كبرت أحزاني .. و نسيني العمر الفاني
انتا اللي ما بتنساني
sisi | 
لوحة التحكم الخاصة بك
خروج
بحث
الأعضاء
التقويم
