وانطلقت بعد ذلك الى مشتى الحلو طبعا مشتى الحلو وزي مانتم عارفين قرية من ضمن قرى جبل الحلو بس هذا الجبل شي عجيب ومتناثره على جنباته القرى بشكل عجيب والله اعذروني يا اخوان الذاكرة تخونني عشان اتذكر اسماء القرى والاماكن المهمة هناك طبعا كان هدفي هو التوجه إلى مشتى والجلوس فيها فانطلقت مباشرة إلى مشتى يوم وصلت بدا السماسرة يلا حقوني اللي على رجليه واللي على دباب ( موتور ) واللي شوي ويلحقني النعال يبيني اوقف
صار فلم مطاردات بس انا ما وقفت ومسوي نفسي فاهم وعارف المنطقة مضبوط عشان ما يلعبون علي جلست ادور واظيع زي العاده وإذ بي ارى واحد من السماسرة يلاحقني ووقف هاه وش عندك قال تبي شقه فله شي قلت لا شكرا انا ادل المنطقة ومالك شغل ( مسوي نفسي فاهم ) قال بكيفك رحت واكملت اللفة وانا ماشي واشوفة قدامي ويرمقني بنظرات عرفت منها انه يقول في نفسه والله ما عندك سالفه ولا تدري وين ربي حاطك انا دريت اني ظهرت على حقيقتي فاستسلمت للامر الواقع وناديته وقلت له الشكوى لله ودني للي تقول واخذني معه بين ها الطرق المتعرجه والملتويه والطلعات السيئة والصعبه حتى وصلني لذيك العمارة وعندها شايب مكبتن وجالس يشيش ( ايه يحقلك ) جو وطبيعة وش وراك رحب الشويب وراني شقه عنده بس والله حلوه وسعرها جدا معقول ( 1500 ) ليرا ولو الحيت عليه يمكن ينزل اكثر بس لاني مااخذتها الا يوم واحد مارظى ينزل اكثر المهم نزلت عفشي وخليت المعزبه ترتاح وتقيل بس خويكم ما يعرف النووم في السفر طلعت وجلست مع الشويب _ والله احب كبار السن وسواليفهم والجلسه معهم _ المهم جلست اسولف معه واعطيته من الكنافه اللي جايبها من سوق حمص واكلنا وسولفنا وراح الوقت ما حسيت فيه بعدين رجعت للبيت وصحيت المعزبه ولبسنا وطلعنا للمطعم كان مطعم هادي ورائع في اسفل الوادي تغدينا هناك وكانت الساعة السادسة تقريباً طلعنا بعد ذلك واكملنا اللفة في المشتى ومرينا سوقهم كانت تلك القريه هاديه جدا وما فيها سياح بكثرة مثل الزبداني قليل جدا المنطقة اجمالاً حلوه والشعب هناك حبابين واخلاق راقية بس عيبهم انهم ليسو مسلمين وأثناء جولتي مريت على محل للحيوانات اسمه البجعة دخلت فيه وتمشينا كان فيه كلاب وذيابه وظبعة شرسة جدا راعي المحل معه شليخة مبرومه قطرها 12.5 سم يحارش الضبعه بها العصا وصاير طرفها اللي يظرب به الظبعة زي المسواك والله عليها فك غير طبيعي ولا الفك المفترس واصوات مرعبه هذي الضبعة اجل وش بسوي لو اشوف الاسد يا الله السلامة وشفت ايظاً تشكيلة ولا اروع من القطط الفارسية والامريكية يا حليلها جازت لي وحده منهم وقالي بـ 4500 ليرا والله وتذكر فلذة كبدي ابني واعزم على ان اشتريها ورجعت اشاور المعزبة وقالت الحمد لله انت صاحي والا مهبول قطوة .... تشتري قطوة .. وشو له وش نبيبها تحوسنا وتوصخنا طبعا هذي كلها مبررات للفكه منها بس السبب الحقيقي الخوف المهم قيشت معي ها القطوه وقررت اني اشتريها ورجعت لراعي المحل وقلتله يروشها ويظبطها ويحط لها عقد ويجهز اوراقها وبكره ان شا لله اجي وا ستلمها قال ماشي ( اللي في باالي لا يمكن اتنازل عنه )
رجعت للسيارة ما دريت الا ذا البجعة قي وجهي ( بسم الله الرحمن الرحيم ) وانا داخل المعرض احسبها مجسم مادريت انها حقبقية بس روعتني والله المهم ركبت السيارة وطلعت لجبل اسمه جبل السيده جبل مرتفع جدا وفي اعلاه مزار للنصارى وفيه مقهى اطلالته حلوه على جبل الحلو كاملاً جلسنا فيه اكثر من ساعة ونصف بعدين رحت لمطعم ثاني تحت بس ما اتذكر اسمه وتعشيت هناك بس عيبه كان فيه اغاني وازعاج المهم بعد ذلك قررت العوده للبيت بس وين البيت الله اعلم يعني زي العاده مظيع بيتي الحرمه الحمد لله تأقلمت على الوظع بالرغم من ان المشتى صغير الا انه متاهه حاولت اني اوصل البيت لكن مع الاسف ما قدرت المنطقة تظيع واشوارع ظيقه والبيوت ( اعجبتني كلمة البيوت ) من ناحية الكتابه على سطر واحد جايه في الكيبورد _ المهم البيوت قلنا متشابهه والليل ماله عيون قلت مالي الا السوق وارجع للسوق واسأل الشرطي وين بيتي ؟! علامات الاستفهام والتعجب ارتسمت على وجهه وانا ايش عرفني وين بيتك المهم قالي انت ثالث واحد يجيني الليله مظيع بس ما لك هم تعرف رقم تلفون صاحب البيت قلت لا تعرف الشارع قلت لا شو بتعرف قلت ما اعرف شي المهم الرجال بحل بي قال مالك هم ابدور انا وياك المشتى كله وإذا مرينا بالصدفه على بيتك خبرني قلت ما شي والله الرجال ما قصر ركب الشبح حقه ( الموتور ) وجلسنا نلف حتى وصلنا للبيت ولله الحمد بس الغريب ذاك الادمي يعني رجل محترم بمعنى الكلمه تعب ولف معي وفي الاخير ما رضي ياخذ ولا ليرا وقال هذا واجبنا واي شي تبيه انا موجود في السوق طول اليوم وهذا تلفوني أي واحد يضايقك او يزعجك اتصل وانا اجيك على طول والله كفو شرطي محترم بمعنى الكلمه
المهم رجعت للبيت ونمت مباشرة من شدة التعب والارهاق يوم اصبحنا افطرنا على الشرفة امام المنظر الرائع والجو الأروع وضفينا عفشنا وسلمنا الشقه ومشينا مريت بعد ذلك على مغاره حلوه اسمها مغارة الضوايات ثم نزلت لمنطقه اسمها الكفرون ودخلت مطعم اسمه ملتقى النهرين وتغديت فيه مطعم حلو وجلسه احلى بين الاشجار وتجري من تحتك الانهار ( جنة لدنبا )
طلعت بعد ذلك إلى البجعة واخذت القطوه المحترمه طبعا الحرمه تظايقت منها واعلنت صراحة انها خايفه منها حطينها في سله وحطيت فوق السله شنطة الملابس كل هذا خوفا من انها تطلع من السله !!!!!! والله لو انها اسد ما طلعت بالرغم من ذلك لا زالت خائفه .
طبعا طلعت من المشتى واتجهت إلى اللاذقيه
البقيه تتبع في الحلقة القادمة بإذن الله
الصور حسب تسلسل القصة
المطعم اللي تناولنا فيه الغداء
صورة من فوق جبل السيده ( الوقث ليلاً الصورة غير واظحة )
-------------------------
كانت هذه رحلة أبو ريان لمشتى الحلو ضمن جولة سياحية مع عائلته في سوريا
و فيها شهادة لأهل مشتى الحلو جعلنا نحبها و نحب أهلها
http://www.twijri.com/forum/showthre...6&page=6&pp=10
آمل ان تحوز على اعجابكم
رداً على الأخ الزائر وإضافة لما قاله إخوتي 
إلى البدوي الضـــــــــــــــــائع بين أغنامه 
نحنا منفتخر بدينا ودائماً عايشين بسوريا الأسد بدون طائفية ويلي كان بدو يعمل 
