ما حدا بينكر الدور الكبير والمهم يلّي ئام فيه مجلس رعيتنا بالفترة الزمنية الماضية.... وما حدا بيستخف بالاعمال يلّي ئامو فيها من بناء ,وكشّاف, ونشاطات على مستوى المشتى ....لكــــــن ...وبالمقابل ما حدا ئدران يسكت عن هالوضع اللي صاير , ففي المرحلة الاخيرة غاب مجلس الرعية ..او بالاحرى ما عاد مجلسنا مجلس رعية مقبول , بل وللاسف اصبح مجلس رعية غير مقبول !!!...الاسباب كتيرة , اهمها :
1)- صحيح انو الاعمال يللي ئامو فيها هيي اعمال بناء ولكن البناء الحئيئي يلي لازم ينبنى هوي بناء الانسان وهادا الاهم . ( ئبل ما نبني الحجر منبني البشر )...وازا كان في امكانية لبناء الاثنين بوئت واحد بيكون افضل .. فالمشكلة انو المجلس ركز من بدايتو على بناء الحجر ,كان همو الوحيد الجمالية الخارجية ..بدون مايركـّز ع الداخل.فأهمل مدارس الاحد(بشكل ملحوظ)من النواحي التالية :
- A : عدم وجود مرشدين ذوي خبرة ومعرفة بكيفية الارشاد " اكيد باستثناء الئليل جداً " وعدم السعي حتى الى اقامة دورات اعداد مرشدين بشكل بيضمن بناء المرشد أولا والطفل بالمحصّلة .B : فشل مدارس الاحد كان يظهر وئت بيوصل الشاب او البنت للصف التامن وفجأة بيئطع المدارس " بمعنى آخر عدم الاستمرارية "طبعا هالامر ناتج عن ضعف كبير بالارشاد وبجزب الشباب.C : التركيز من قبل اللجنة الثقافية (المسؤولة عن مدارس الاحد بالمشتى ) على الفكرة الرخيصة يللي مابتكلف مصاري.. يعني متل البلاش.. طبعا المئصود وئت التحضير للحفلات في الصالة ,والمفارقة ؟؟؟ انو كل مرة بيركزوا ع ضرورة تحسين وتطوير الحفلات ؟؟؟؟. D : المخصصات الكبيرة في جميع المدارس لاولاد مدارس الاحد للاسف غير موجودة عنا " مع العلم انو الوضع المالي للكنيسة جيد والمشكلة مو مشكلة مصاري ؟؟" E : وحالياً مدارس الاحد عم تعاني من مشكلة الافلاس في الكوادر ( ولولا المبادرات الفردية لبعض المرشدات لكنّا في ورطة ) .
2)- بالنسبة لوضع اللجنة الثقافية : ففي المرحلة الاخيرة...وخصوصا خلال هالسنتين.. اخذت اللجنة بالتراجع بشكل ملحوظ جداً ؟؟؟ فلم تعد تدعو الى محاضرات , وان دعت تكرر او تقيم محاضرات غير هامة او غنية بالمعنى الحئيئي ..فبالاساس تركيبة اللجنة الثقافية ليست بالثقافية !!!! وبعض الاشخاص المؤلفين لها لاحول لهم ولا قوة ..اعضاء بالاسم لا بالفعل ..وعدى عن هالشي وهوي الاهم انو مافي عندن (اي للجنة) برنامج او خطة منهجية بيمشوا بموجبها ... فاللجنة وللاسف واقعة في سبات شتوي طويل وغريب !!!!!!!!!!!!
3)- بالنسبة لوضع الجنة الفنية : فلا نشاطات تذكر ولم تدعوا الى اي عمل فني من وئت امسية همام عيد ( يللي دعت الها اللجنة الفنية اسماً ولجنة المهرجان فعلاً ) فحالها حال اللجنة الثقافية ازا مو اكتر ؟؟
4 )- بالنسبة للكشافة : فالبداية كانت موفقة جداً ..لكن اليوم كشافتنا ما تشد ايدك ابداً فالوضع سيء والعزف ليس بالجيد ..وطبعاً هالشي نتيجة الاهمال للكشافة من جهة ,وعدم الترغيب من جهة تانية فالاولاد وحتى الشباب الصغار ازا ما رغبتن, مو ممكن يجو وحتى ازا كانوا عم يجوا بيبطلوا ؟؟ وازا كان في محاولات تشجيع من المجلس فهالمحاولات مانها كافية .
5 )- اما بالنسبة للرسوم الكنسية : ف الكنيسة مانها برج العرب ازا بدك تفتح الباب وتفوت بتدفع مصاري ع الفوتة ...والكنيسة مانها محل للتجارة "كلشي بحئّو " .: ف فتح الكنيسة لعرس الو رسم وللعمادة الو رسم وغيرو ( طبعا الكنيسة بحاجة لمصاريف لكن مو بهالشكل هادا ) ونفس الشي بالنسبة للكشافة سواءاً بعرس او بدفن !! والسؤال: هل يستثنى فقراء الحال من هالرسوم الكنسية ؟؟؟؟؟؟؟؟؟؟؟؟ .
6 )- الاهمال الكبير للصالة : وعدم المحاولة اصلا لجذب الاولاد...سواءاً بجلب اجهزة كمبيوتر لتعليم الاولاد عليها او يلعبوا حتى !! او جلب طاولة بينبونغ او العاب للاطفال ...الخ او حتى اقامة دورات في مختلف المجالات ( مع العلم انو بالفترة الماضية قاموا مشكورين بفتح دورات مجانية للشباب والاولاد على الكمبيوتر و دورات في المواد المدرسية ..ولكن ليش توئف هالامر الجيد ...( لا نعلم ) ؟؟؟؟؟!! .
7 )- في اشخاص مسجل اسمن بالمجلس من دون اي عمل بيئوموا فيه حتى انون ما بيحضروا ؟؟؟.... فالاعمال ان قامت فانها تقوم في اغلب الاحيان على عاتق عضوين او ثلاثة مواكتر !!!!
8 )- بعض الاعضاء في المجلس لا تتوافر فيهم شروط العضوية ؟؟؟ واسمحولي ما ادخل بالموضوع اطلاقاً .
9 )- استمرار المجلس لهذه المدة الطويلة جداً (8 سنوات ) : اكيد رح يسبب هالشي خلل وتعب وعجز وخصوصاً بانو لم يشهد اي تطوير في الاشخاص او في الافكار ؟؟؟
10)- اهمال دور جوقة الكنيسة : فبالرغم من الجهود الفردية لتقوية الجوقة بالمرحلة الاخيرة ...لكن للاسف بينئصها كتير تحتى تصير جوقة كنسية بيزنطية قولاً وفعلاً ..وطبعاً المسؤولية تقع على عاتق رئيس الجوقة ومجلس الرعية ...
11 )- بيبئى اعرف رأيكن حول السؤال التالي والهام :هل انت مع :
أولاً : تغيير مجلس الرعية بالكامل.
ثانيــاً : استبدال بعض أعضائه فقط .
ثالثــاً : تطعيم المجلس بأعضاء جدد مع الابقاء على الاعضاء القدامى .
رابعاً : ابقاء الوضع على حاله .
" ملاحظة هامة" عضوية المجلس طرحت مؤخراً على اكثر من شخص بالمشتى ..لكنّهـــــا ...لاقـت الرفـض القاطــــــــــع ؟؟؟؟؟..فـلكم الحكـــــــــــم .

( غيث تقــلا )

__________________
أنـــــــــــا مشتــــــــــاوي

الأخ غيث تقلا المحترم
على ما يبدو من هذه الملاحظات الدقيقة أنك من المهتمين جداً بأمور الكنيسة ورعية المشتى والغيورين عليها .
فالسؤال لماذا لا تقدم نفسك كعضو في المجلس المنشود والمراد تشكيله .
ولماذا الاشخاص الذين يعرض عليهم الإنضمام لمجلس الرعية يرفضون العرض حسب ما أوردت في ملاحظتك

مسا الخير صرلي زمان ما فتت ع الأنترنيت وتصفحت موقع المشتى ومبارح بالصدفة فتت ولقيت تعليق لشخص بيحكي فيه عن واقع مجلس الرعية ولجانه وفرقة الكشافة
هيك حكي مارح يخلي مجلسنا يغير من سياستو بالكنيسة لأنو أثبت أنو هوي المجلس الوحيد من اللي مرقو
قدر يعمل تغيير جذري على مستوى الأوقاف والنشاطات الفنية وحتى ضمن الكنيسة بيكفي أنو العالم صارت تعرف وين عم تروح تبرعاتها.
بعهدها أتشكلت الفرقة النحاسية اللي السنة قدرو يحصدو المرتبة الأولى بمهرجان الفرق النحسية اللي هوي وليد فكرة من اللجنة الفنية وهوي أول مهرجان من نوعو بسورية وفرقتنا أخدت الأول مع انو عمرها ما بيتجاوز
4 سنوات وعمر أعضائها اللي ضلو ما بيتجاوز 22 سنة والأغلبية من الجنس اللطيف فهل هيدا دليل تراجع يا غالي ووينك ليش ما شاركت بالكشافة انت ودعمتها بالشباب النشيط , عم تحكي عن مدارس الأحد وين المرشدات المؤهلين ولا راحو بعد ماصار في نظام يحكم الصالة ولجنة تشرف على نشاطتهن مع أنك انت كنت واحد من هالمرشدين وين رحت وتركت الصغار اللي ما عندهن كفائة متل ما قلت يشتغلو بمدارس الأحد إذا كنت خايف كتير ع وضع مدارس الأحد.
صالة الكنيسة ضلت سنين ما حدا يفوت عليها لكن وقت اللي أستلم المجلس الجديد كل أبوابها أنفتحت لتستقبل الشباب وانا واحد منهن .
وبالنسبة لأحقية العضوية بالمجلس انت عم تركز على شخص انا بعرفو كتير منيح وهوي من أنشط الأشخاص بالمشتى بس بجوز لأنو ما كان يسكت عن الغلط وما زال ,وبحب قللك انو الأب خليل هوي اللي نقا أعضاء المجلس تنقاي لأنو كل اللي نجحو بالأنتخابات ما داومو فهوي صار يقترح الأعضاء وللأسف الظاهر انو حتى أختيار الخوري ما نو عم يعجبكن .
بدل ما تحكي هيدا الحكي اللي هوي مو حكيك وكلنا بنعرف مين ورا هالحكي روح وحاول تلم هالشباب لحتا يفوتو ع الصالة ويدعمو نشاطاتها .
بدي قلك شغلي عن طريق التهجم والحكي ع المجلس ما رح توصل لشي والعضوية فيه ما فيك تكسبها إذا كنت مفكر أنت وغيرك إلا عن طريق نشاطكن وتعبكن وتبينو للضيعة أنكن كفؤ .


ملاحظة : هيدا الشب كان من أكتر المتحمسين للمجلس ونشاطاتو ودائما كان يفوت بمشاحنات كرمالو , والأخوية بتشهد بس الله يرحمها ما طولت وكان عضو سابق بالفرقة المسرحية , ما بعرف شو اللي خلاه يتغير
بس الظاهر أنو نحنا مابندافع عن شي إلا إذا كان في مصلحة شخصية من وراه

على ما يبدو ان الاخ رواد متحمس جداً بالدفاع عن مجلس الرعية واعضاءة إلى درجة كبيرة والسبب الأكبر حسب اعتقادي هو لمجرد وجود خاله في المجلس .
لذا نرجو منك يا اخ رواد النظر بموضوعية أكثر وتجرد وعدم مشاهدة النقد وكأن الهدف منه التجريح بأحد فلا تخلو دائرة او تنظيم في العالم من الاخطاء ونقاط الضعف ولفت الانتباه إليه واجب على كل الغيورين على مصلحته مع اعتراف معظم أعضاء مجلس الرعية بوجود نقاط الضعف في بعض المجالات وهذا ليس عيب وانما العيب التستر عنه او عدم محاولة إصلاحه .
كما اني لاحظة من التعليقات السابقة او مشاركة الاخ غيث بأنهم استثنوا بعض الاعضاء المهتمين والغيورين واشادوا على اعمالهم ورغبوا في المحافظة عليهم في المجلس
ارجو تقبل مشاركتي بروح رياضية مع احترامي لجميع الآراء

__________________
احلى بحـــة

الحقيقة يا اخ (ناي) المفروض انو عزفك يكون احلى من هيك.
بداية ممكن يكون مجلس الرعية عم يعاني من بعض الثغرات و هذا امر عادي جدا, و بعتقد انو ما في مجلس في العالم كامل.
الا ان الطريقة التي اثير بها الموضوع فيها الكثير من التجني, حيث يظهر المجلس مظهر المفلس (معنويا), غير المكترث, غير المبالي بمصلحة البلدة و الكنيسة. طبعا هذا موضوع مرفوض جملة و تفصيلا..
المجلس الو فضل كبير في وصول الكنيسة عموما الى مرتبة معينة. وعلى فرض ان بعض الثغرات تحدث الان فهناك آلاف الحلول الموجودة بعيدا عن هذه الطريقة, و المشتى معروفة برحابة الصدر و المرونة في معالجة الامور.
وبالنسبة لحماس رواد فهو مبرر, لانه من المساهمين على ارض الواقع في معظم نشاطات الكنيسة و المهرجان, و بعتقد هذا واضح جدا للجميع.
واذا دافع عن المجلس لوجود خاله فيه فهذا حقه الطبيعى مو بس لنو خاله و لكن لان نشاط غسان مخائيل في المهرجان اكتر من واضح.
على كل حال بتمنى من الجميع الارتقاء بافكارهم الى مرتبة اعلى, بما يعلي شأن البلدة.



وليد خوري

حبيت عقب عا الموضوع ياغيث لأني متلك بعتبر أني عضو من أعضاء الكنيسة ألي تربيت رغم عدم انتمائي للمجلس أو أي لجنة تابعة للمجلس .
المعنى هو وقت بحس أنو بيتنا تخربط بحاول رتبو و أعيد تنسيقه ( ومع أحترامي الشديد جدا لكل عناصر مجلس الرعية ) .بعتقد أنو الحل الأنسب بالوقت الحالي.
وبتمنى من المجلس الكريم لا يستخف بالمسؤولية الكبيرة الواقعة عليه لأن إدارة الكنيسة موضوع مادي وروحي كمان وأنهم مسؤلين تجاه الرب أول شي و تجاة أهالي المشتى تاني شي
وبحب ضيف
إذا بلشنا نحس بشوية ضعف بلش يتسرب عا المجلس و اللجان التابعة له فالحق مو عا الكنيسة بس الحق عا أهالي المشتى المفروض أنهم يتابعو ا أمور الكنيسة وبقترح نتبع مبدأ إعادة تقيم ما أنجزو كل فترة يعني المفروض من مجلس الرعية يقوم بإجتماع مع المهتمين بأمور الكنيسة من أهالي المشتى بشكل عام لحتى تم عملية تحاور ومناقش بأمور الكنيسة وما تم تحقيقه وما إلى ذلك ................

أما من أهم الأمور المهملة بكنيستا هم الشباب وأنا بحمل المجلس القسم الأكبر من المسؤولية للأسف المجلس ما قدر لحد الوقت الحالي أنو يجمع الشباب بها البلدة وهم العنصر الأهم لأنو وضع المشتى السياحي و الاجتماعي والاقتصادي يتطلب منا كمجلس رعية أنو نجمع شبابنا قبل مايضيعوا قدر الإمكان .

طبعا" بدو بعض الأشخاص بدهم يردو ويقولو ا قدرو من خلال الفرقة النحاسية نحنا ما ننكر أنو الفرقة النحاسية من أهم المنجزات بكنيستنا و منفتخر فيهم و نقدر كل شخص ساهم فيها لكن الفرقة النحاسية شي و جمع الشباب ليتبنوا فكر كنيستنا و يتابعو ا مسيرتها لأنهم المستقبل شي تاني تماما" مختلف.

ما عن مدارس الأحد
نشكر الله أنو مدارس الأحد مستمرة بها الشكل يعني فيني قول ألي ما بيعرف شو الإمكانية المقدمة لمدارس الأحد بيظن أنو كادر الإدارة كبير لكن فعلا يا غيث متل ما قلت نحنا كتير قلال كمرشدين و كإدارين ضمن مدارس وأنا بقترح فصل مدارس الأحد عن الجنة الثقافية و بأسف قول أنها مقصرة جدا" تجانا وخاصة في أخر فترة وبتمنى من أي شب وصبية عندهم قدرة للإعطاء يشاركوا معنا والخبرة يا غيث بتتشكل مع الوقت وبخص عنصر الشباب لأن النقص فيهم تحديدا" مثلا" السنة أول مرة كنيسة المشتى ما قدرت تنفذ حفل بعيد الميلاد ألي كانت من أهم وأجمل الحفلات الأطفال التي تقام بالمشتى نتيجة هذا النقص ونتيجة عدم متابعة من اللجنة الثقافية كونها المديرة لأمور مدارس الأحد
بالأخير أنا بشكر أهالي الأطفال الموجودين بمدارس الأحد لأن عم نلمس اهتمام كبير منهم بها الأمر كان ضعيف بالسابق وبشكرك غيث لطرح ها الموضوع

__________________
(¨`v´¨)
`v´ Sammor..· ´¨¨))
¸.·´ .·´¨¨))
((¸¸.·´ .·´