إلى من يهمه الأمر
دخلنا الصيفية و مشاكل الطريق الغربي و في عدة ملاحظات حول هذا الشريان الرئيسي الذي بات من أهم الشوارع على مستوى القطر :
- وقوف السيارات من بعد الظهر و حتى آخر الليل دون رقيب و يا ريت لو تقوم البلدية بتأجير هذه المواقف مثل كل المدن الأخرى بسوريا فيقل عدد الواقفين و تستفيد البلدية
- العمل على إيجاد طريق بديل للخروج و الدخول من المشتى و لو حلا مستقبليا و تحويل هذا الشارع إلى شارع مشاة مثل الشوارع المهمة
- إلزام أصحاب الفنادق و المطاعم بمواقف سيارات حسب ما ورد بالمخططات اللي رخص لهم بموجبها
- في 3 شجرات على الرصيف ماذا لو تم قطعهم لأنون ما رح يزيدوا و لا ينقصوا من خضار المشتى
- فتح ممرات مشاة في الجزيرة الوسطية ليتم انتقال الناس من رصيف لرصيف عند الضغط بعد قطع الأشجار التي تم زرعا أمام كل مطعم فلم يعد المرور على الرصيف ممكن

أنا بشكرك يا أخ جورج على الموضوع المهم لضيعتنا لأنو أنا كمان بشكل شخصي بتعزب كتير

من الزحمي خصوصاً وقت لما يكون حفلات أو عيد أو ...... فبدنا حل بتمنى يسمعوا وبضم

صوتي لصوتك ولو كان متل ما قلت الحل مستقبلاً المهم إنو ينحل الموضوع

thanx

أهلين جورج

معك حق بكم نقطة أما بنقطة قطع الأشجار بما بأيدك بهالشي لأنو هالكم شجرة هني اللي مزينين الطريق يعني إذا قطعناهم بيصير الطريق متل الماشي بمدينة
و كمان تبع الجزيرة الوسطى هادا اقتراح خاطئ لأنو إذا تم عمل هالشي بدو يتقلص طريق السيارات كتير و ممكن تصير حوادث كتير و مع هالشي ماحدا رح يتمشى عليه

و أنا عندي اقتراح أو بالأحرى شكوى على بياعين العرانيس بس مو كلون إنما على اللي بيشوو عرانيس عالفحم يعني روائح قذرة للغاية و هداك اليوم كنا عم نتمشى على الطريق و في عيلة قدامنا ووقت مرقو قدام بياع العرانيس قالو لعمى شو هالريحة هادا مالازم يخلوه هون و معون حق لأنو بالفعل بيعمي العالم بالروايح و بالدخاخين و خصوصاً البياع اللي قدام الكان ياماكان لعمى هدا بتقول عم يشوي شو دولاب سيارة على كتر الدخنة اللي بتطلع على كل حال أتمنى من البلدية منع مثل هؤلاء لأنهم بيضربو سياحة الطريق الغربي (هي حلوة) أو منعهم من الشوي بس السلق

تحياتي

__________________
أنا مشتاوي

شكرا على الرد بس في بعض الأمور حابب وضحها
بخصوص هالشجرتين يا طوني مو هني الشي الوحيد اللي بيظهر حلاوة المشتى و خضارها بعدين الشجرة شي مو باقي ولهيك بدال الشجرة لازم ينزرع تنتين بس بشكل ما يعيق مرورنا " مثلا خارج الطريق"
و إذا بيع العرنوس هيك فما بالك كولبة أم علي و أنا من أول الداعيين لإزالتها

ياأصدقائي المشكلة أكبر من ريحة عرنوس الذرة وشجرتين في منتصف الرصيف المشكلة اننا بعد صولات وجولات من الانتخابات لمجلس البلدة آتانا من هو بحق يستحق أن يكون رئيس مجلس ولكن المرض مستعصي جدا (كما يقول المثل أيد وحدة مابتصفق)أنا أطرح عليكم أن تكونوا جميعكم معنيين بمواضيع تهم البلدة وذلك بتشكيل لجان مختصة بتنظيم أمور كثيرة أهمها النظافة وهنا أود أن أتقدم بالشكر للسيد رئيس المجلس وعمال النظافة لأنني أدعو الجميع ليشاهد الساحة العامة والشوارع المهمة في البلدة كيف تكون آخر الليل وكيف تصبح في صباح اليوم التالي كما أنني أدعو لتشكيل لجنة تهتم بنظافة القرية من بعض المسترزقين والمتطفلين على هذه البلدة النظيفة من أمثالهم ولو تم الترخيص لهم من قبل الجهات المعنية ولكني أضع اللوم على من قام بتسليمهم مفاتيح منازلهم وسمحوا لهم أن ينوبوا عنهم بكثير من الأمور أنا أعتذر مسبقا على ماتقدم لكنه منظر غير حضاري فهناك خيم محاطة بلافتات لبيع وتأجير عقارات مشتى الحلو ودورها السكنية سيارات لاتستطيع أن تحدد لونها من ما كتب عليها من مقالات, هؤلاء أغلبهم لاينتمون الى البلدة فهم كما ذكرت سابقا. معذرة ياأصدقاء (ما أفسده الدهر لا يصلحه العطارين) أكرر شكري للسيد رئيس مجلس البلدة وعمال النظافة وأرجو من الأخوة السائحين الأهتمام قليلا بنظافة المكان الذي استضافهم يوجد عدد ليس بقليل من حاويات القمامة وأهلا وسهلا بهم في بلدة المشتى التى جعلها الله للجميع.

المشكلة ياخال صارت فينا
بتمنى أسأل هل أحد راجع الجهة المعنية وذكرهم لعلا الذكرة تنفع المؤمنين وبتمنى يذكرهم أنه ممكن وضع دلالات بعدم رمي القمامة وأنهم وزعوا مرسوم بمعاقبة من يرمي عقب سيكارة على الطريق ياأخي اذا مافي امكانية للمتابعة يقوموا بتأليف لجان من شابات وشباب البلدة ويتم تكليفهم بذلك وبمؤازرة من شرطي البلدية أو شرطة الناحية للمخالفات وخطوة خطوة بنصل شو رأيك يا خال