بكوخنا يا ابني بهالكوخ الفقيـر
والتلج ما خلاّ ولا عـودة حطـب

والريح عم يصفر فوق منو صفير
وتخزّق بهالليل منجيـرة قصـب

***

وقفوا عا شباكك يدقّو العصافير-- بجوانِِحُن ... يا جوانحن ل متشرنة
جايين يتلطّوا ع كتر الزمهرير-- ورفيقك البلبل ... شو مشتقلك كتير

---- مخبيلك بعبّو شي مية سوسنة ----
يا ابني

***

علوّاه لو فيــــــــــــي يا عينيي لطير
اتفقدك يا رجوتـــــــــــي بعدك زغير

وعمرك وعمر العطر ما كفّوا السنه
وشو الدني - يا ابني وشو طعم الدني

---- ان ما هبجّتْ وجّي بإيدَيْكْ الحرير----

***

شو الجرس قال حامل بشارة العيد
شو ألف عيد وألف قنينة نبيد

صوتك يتدحرج بقلبي وعم يضيع
نازل عن التلة بهالوادي البعيد
حامل بإيد الصبح وبإيد الربيع

***

ومن يوم هالغيبة والله يسامحك
عم فرفط بها الفلّ عم قطف ريحان

عم بستعير من السما أجمل لوان
وخرطّش ع هالحيطان لنو ملامحك

***

وهالقلب عم حفّو على اجرَيْن السرير
عم مرمغو
بيلعبك
بمطارحك
بفراشك
بريحة ريشات جوانحك
بيغبرة حوافر حصانك هالزغير

يا ابني
بفراشك
بريحة ريشات جوانحك
بيغبرة حوافر حصانك هالزغير