العبد بيكبر بالأسياد....ساعة ما بيشم الجود
تفضل يا سليمان طراد...وزتّ الجمر على البارود



المنبر صار بهالأزمان...حنكة ولعبة سْياسية
الداعي سليمان الأوزان....وزغرتا المنبر هيي
ولا تتمرجل يا سليمان....على سليمان فرنجية
من قبالي بدّو لبنان....من زغرتا يزتّك مطرود

بعمرك يا حاسد لا تلوم....الزغلول اللي نقّاني
قلّي عندك أحلى كروم....ونسر المنبر سمّاني
وأذهلت الجمع المعلوم....بأول حفلة وبالتاني
وقلي فيك تشنّ هجوم.....الأوّل أنت بميداني
وخداج اللي اعتاد يحوم....على القمّة ما بينساني
بأجمل جولة فيها رسوم.....القرادي وفكرو الباني
وأسعد بو فادي بنجوم....الزرقة زركش قصداني
قلّي موهبتك بتدوم.....كبيرة وسرّك ربّاني
بتوقيع كتابي المحتوم....سحرت المشتى وخلّاني
وعاود وقّعلي عرسوم....فيها بيفخر عنواني
وبسوريّا عندي علوم.....باري سبع بلوداني
أربع مرّات ومحكوم.....على المتلك يبقى فاني
ورجعت بنصري المحسوم....باري هاني الحسواني
ومن أهل الكف المختوم....مين بيصمد مع هاني
وخلّيت الرمضان يصوم.....ويركع فرض برمضاني
ومحسن سلطان البيسوم....الجوهر أثنى إيماني
والصقر المعتاد يعوم....بو عاطف جل مكاني
هودي يا بْني بوجه عموم....كبار الشعر الإنساني
وحياة الربّ القيّوم ....الكوّن سوري ولبناني
ساعة ما هالحكي يقوم....المتلك قرد بيبقى قرد
...............وحكيك عا جنسك مردود

ما بتقدر يا طراد تصيب....الديب العمرو ما بيحني
بصوغ الفكرة والتطريب....ما في سرعة بتلمحني
وبالحرب وشوط الترهيب.....ويوم المهلك والمحني
معروفة تسلاية ديب......سلخ سباع وملخ فهود

المُقعد منّو مذمّة ,,عيب.....أنك تحكي بهاللهجي
تذكر مرضة زين شعيب....العندو مقعد بالمهجي
والمقعد يللي بالصيب....في علمو زاد الرهجي
بيسوى عشر مزارع شيب....متلك جوهرها مفقود