قومي اطلعي يالذاكره
من شهوة النسيان
ومن هالعقول الغابره
و خربة زمن بليان
مرّي عادنيي عامره
فوتي عامضجع هالأمان
تاتحبلي و مجاهره
بضحكة عمر فرحان
تاتولدي من خاصرة
من دفقة الشريان
من رحم أرض العاطره تاتولدي انسان
رح يطلع من الويل عاكف الصبح
و يكتب عاوجه الليل من شعلة جرح
مولد زمن جايب وطن سياجو عدالة و حق برّات المحن
تايلجم الحرمان ويشبّع الجوعان
يا هالذاكره قومي انجلي
و فضّي بكارة هالعتب
و عرّي بقايا المرجلي
تاتصنعي منها عرب و تغيري العنوان
قومي انفضي حالك من غبرة الحكّام
قومي اغسلي خيالك عامفرق الأيام
اهتزّي لا تبقي ناطره و هدّي طيور مسافرة و جيبي عقول مهاجرة
وردّي فكر هربان من هربان
استقصلي رحم الفزع
من جيل جايب جيل
هونيك من حالو طلع
ماشي بعتم المستحيل
و نقّي زوان اللي انزرع
بين السنابل و الخميل
قبل الشجر ما ينقطع
و يصير عاخيالو قتيل
هاتي زمان اللي لمع
مدّيه عالحلم الجميل
و الحق لو نجمو سطع ردّيه للميزان
و سكّري باب السمع قدّام طوفان الحكي
تاتحلمي بعمر الشبع و تنشّفي نهر البكي
قومي اطلعي من هالوجع من ليل وا قف مرتكي
عالظلم عاكتف الطمع
و عم يرقص جنونو عاموت البيلسان
اتهدّي با ذاكرة الزمان اللي جمح
صوب الحزن و الجوع
حاجي بقا ما ضلّ مطرح ما انجرح
و لا ترجعي الرجوع
و بزهوة الألوان من قوس القزح
غطّي وطن عريان
فيقي يا ذاكرة العرب امتدّي عافكر النور
قومي اشربي حبة أدب و اشفي عمر مقهور
و فوتي عاذاكرة الدّني منها خدي تاتغتني
وضللي صبيي و احبلي من كون بخيالو حلي
تاتولدي الانسان بالانسان و نعيد ترتيب الزمان بهالزمان  | 
لوحة التحكم الخاصة بك
خروج
بحث
الأعضاء
التقويم
