وينك صديقي طالت الأيّام = وتفرّقت ع غيابك الأحلام
بعدا عيونك ناعسة وبتحِنّ = وبتدَوّب الكِلمات بالأنغام ?
ولا مِتِل ألبي ؛ وَجَع بتإنّ = وتِعبَت من الأيّام والأوهام ?
***** =
كل ما تأمّلت القلِب بيعِنّ = عا ذِكريات من الطّفولة قْدام
كِنّا ولاد بشي طناشر سِنّ = نراشق بَعَضنا بقِشرِة الشّمّام
وصوت الضّحك متل الجراس يرِنّ = بعِزّ الضّهر .. ويفيّق النيّام
وبابا علينا من وَرَشنا يجِنّ = والمِذنِبْ يْخَبّيه بالحمّام !
***** =
يصرُخ علينا جارنا " يا جِنّ " = " روح انئلِع وانضَبّلك بحرام " !
يا جار .. حَتّى عاللّعب بِتمِنّ ؟! = مَ تروح تِتغَطّى يبو هَمّام ؟
و تِتْرِك طفولتنا براءة تْوِنّ = من قبل مَ نْوَنوِن شقا وآلام
كلّما كبرنا وكبر فينا السّنّ = شدّت حبال المشنقة الأعوام
بدنيا عَلَينا حْروب عَم بِتشِنّ = وزَرْعَت طريق العاطفة ألغام
حَتّى إذا مْنِمْشي الخُطى بِتْكِنّ = خَمْسة لْوَرا وتِنتَين لا قُدّام
***** =
والخِلّ في خِلّه مَكر بيظِنّ = ونَصّاب حامل راية الإسلام
وكُلّ البشر صيحات عم بتصِنّ = وتركض ورا الإعلام والأعلام
أعلام فاقت في عددها ال ten = والبِتبَع الأعلام .. عالإعدام !
***** =
ما عاد بَدّي ناس تيجي تسِنّ = أحكام عيشة .. يقطع الأحكام !
يَ رفيق بَدّي نِرْجع ندَنْدِن = ألحان عود صغير .. صنع الشّام
ونِسْهَر سْوِيّة متل حِنّ وحِنّ = ولَمّا العَتِم يسدُل سِتار الليل
عا جَنب راسك حُطّ راسي ونام =
لوحة التحكم الخاصة بك
خروج
بحث
الأعضاء
التقويم
