من قلب الشاعر طليع حمدان الى روح سيدنا الشيخ أبو حسن عارف حلاوة عليه رحمة الباري تعالى
يا مــــلاك الأبيض النعســــان=مدري نعس مدري غـــفا غفيان
عا مخدتك لاقوك خمس ملوك=ألوانهـــم من أطهــــر الأ لوان
الأخضــــر يقلّك للأبد مبروك=الأحمـــر يهنّي الأصفـر الديّان
وأبيض نقي لبّســـتلك البـاروك= وتا يخيّـم الأزرق على الأبيض
لبســـتلك الأزرق ســـــما لبـــــنان
***********
وصار النّبع يا طاهر السمعة=مثل المضوّا بمأتمك شمعة
ويقول بلكي" بو حسن عارف "=عم يحلم علينا بها الجَمّعة
وحتى ما يزعج ظلكّ الوارف=قلّل النغمي وكتر الدّمعة
وصفّى كأنّو بالصّلا عارف=يتمتم ويقرا الدور بين الحور
ويبكي عليك بليلة الجمعة
************
ياريتني بخيال شمعاتك=شمعة تا افنى عا تراباتك
بلكي عالهتات الشموع وعيت=معهن بصير بشم لهتاتك
بتكون يا سيدي عليّي رضيت=لولا فني ذاتي على ذاتك
ومنّي وصيّة لو عليك فنيت=يخلّي من شفافي القدر رشفي
تاضل فيها بوس ديّاتك
**************
الله عطاك من الزّهور شفاف=وطهرو عطاك من النّدي عينين
فيها النظر الا الطهر ما شاف=وبس الكتاب لمست بالايدين
ايديك زنبقتين من نفناف=ودقنك صبح والفرق واضح بين
صبح الطبيعة وصبحك الشّفاف=بيوعى الصباح بزنبقة وحدي
وصبحك بيوعى بين زنبقتين
*************
في يوم تا زورك رحت بكير=وكان قدّامي تحدّي كبير
قلتلّك دعيلي وقلتلّي=انشالله بتتوفق يا ابني كتير
وعطيتني من ايديك الفلّي=زر وردة ورحت للتصوير
بلّشت غنّي وبلّش يصلي=ويرقي الي تا كون متجلّي
وكان الوحي من زر ورد زغير
*************
زر عن قلبي ما كان يروح= وعامل من وراق الحمر تمّو
وتحت الحمر كان الخضاريلوح=لا بس وراق الخضر عا كمّو
مطرح ما حملّتو صلاتك روح=تا يضل عطرو طفل مع امّو
صار العطر منو بعد ما يفوح= تا يشم روحك حول زر الورد
يرجع لعند الزر ويشمّو
**************
سنتين ضل بمنظرو الخلاّب=تا هرت وراقو غصب عنّي
خبّيت منو العرق والأحباب=وراقو تايبقو متل ماهنّي
عملتن حجاب الطّهر فيهن داب=من لمستك يا ساكن الجنّي
ردّيت عنّي بزر عنّي غاب=وبترد عنّي لو حملتو حجاب
والله لا يبعد رحمتك عنّي
*****************
حجابك معي لا تفكر بينساك=اصلو زهر من مسكبة نساك
لا مزهرية شايفي متلو=ولا سهر سهره على شباك
ايدي بيوم الدفن شدّتلو=تنهد على ايدي وشهق شوباك
عيني بكت والروح قالتلو=مات سيدي "بو حسن عارف "
واليوم يتّمنا أنا ويّاك
***************
يا ميتم بقلبي العطش والجوع=طعمني رضاك وحبّك سقيني
الباروك فيها من التُقى ينبوع=تحت التلج سرّو بيدفيني
الباروك فيها من الاله فروع=بيناتهن عالقبر خليني
ضوّي على حجارو دموعي شموع=بلكي بينشّو هالحجارة دموع
ودمعي بيرجع ليكي يهديني
