حفلة عين قنية بتاريخ 28/9/07

[بشار]

بشار معنى:
يا عين قنية يا عروس ملبّكي ***ما بتنوصف روعة مساكي الليلكي
عن مجدك التاريخ بيحب الحكي***حتى القدر كوعو عا كتفك مرتكي
أهلك كواكب بالليالي الحالكي***وبقلب كل انسان جعفر برمكي
ونحنا حملنا قلوبنا وجينا لكي***بعاطفة مجنون وبحنكة ذكي
تا نقول للبيحبنا وعم يشتكي***عن أرضنا المن عند الله مباركة
كلما العطش طلّع عليها من بعيد***بتقرص الشلال تا يبلش بكي



قرادي
حسون :
غبت وراجع يا حبابي عوض ايام غيابي
نهدي من صوت الحسون بترجف سبع الغابي

من سنة السبعة وستين** زعلاني الارض الحرة
ورجعو سلال المغرومين** سلسال يعانق درة
وجيتوا يا زوج مجانين** يا ريت بقيتوا برا
واحد خشيش فناجين **والتاني عالربابي

بشار :
رجفت وعندي اسبابي**عا هالنفخة الكذابي
ببقى بضحك لما تصير**تغرف من كعب الخابي

يا حسون بلاد المن** بمواهبنا مبهوجي
لكن فيها المنطق جن** عا هالجوقة المطعوجي
ولما بدفعلك بالين** من فلسفتي ومنتوجي
اياك ترخص بالفن** حتى تعيشوا ليلة عز
انت وجوقك عاحسابي

هالبحر العاصر الغابي*** نقط خمر العنابي
كلما بتعطش يا بشار*** انزل اسكر عا حسابي

مطعوجي جوقتنا كتير*** كترت ما حملت متلك
منسافر فيهن منطير*** منتشتشهن تا نهلك
جيابي ما فيها دنانير*** ولا ين يقدر جهلك
متلك كم بشار زغير*** عايش جوات جيابي

بشار :
خمر شعوري وسرسابي***عصرتو بمكبس اعصابي
وبخمرك داير مفعول***سم الحية النشابي

هالجوقة الما فيها حيل ***عاهالغلطة ناطرها
شعري من ميل ومن ميل***اسمي بيطعج خاطرها
الجوقات بموجات الويل***قبالي بترمي ياطرها
وتا اطحنها متل الهيل***عليها بمرّق دولابي

حسون :
عندك حية نشابي*** عندي القوس النشابي
كنت قتلتك لوما تكون*** طولك من طول ركابي

يا قحل المليان ظنون **جاييك الكرمل عابس
وروحك وصاها الحسون*** متلك كم عنتر حابس
مطرح ما الخفاش يكون*** بيصير الأخضر يابس
ومطرح ما بيمرق حسون**اركع بوّسلي ترابي

بشار :
لولا طلعت من تيابي***وزدتك صاحب عا صحابي
ما بيعني عالمنبر فيك***تفهم سر من كتابي

ترّقى وعن تجريحك عيف***الخفاش بكرمك باقي
من هالنزعة كفي نظيف***وبقدم مسرح راقي
وانت الجايي عندي تضيف***وترخي تمّك عا طباقي
كلما شعر رخيص تضيف***العالم عنك بدها تقول
صاحب كلمة منعابي







معنى

حسون:1
لهفة سلامي على قلوب مريضة*** لهفة النور بشوق عين مغمضة
شاعر كمشت البدر داخل محفظة*** ودخنت غيمي والشواطي منفضة
وطليت عا جنينة شعر متجهضة***دلدقت وحيي متل بحرة فايضة
واسأل يا بشار الزمان اللي مضى*** كم اسد عالمنبر تحت سيفي انقضى
ومن بعد ما احتليت زرقا مكوكبي*** نازل بسيف الشعر احتل الفضا

بشار :1
لهفة سلامي شوق جنة بالتمام***لسلمان ابن الفارسي عليه السلام
وحسون لما تشد يدّك عاللجام***ما بتسكر بخمر التمرد عالنظام
عا كل حال البهرجي بصف الكلام*** بتبذر زوان البخل عا بيدر كرام
وعا سيرة السبع ال عن الحسون صام***بايدي قتلتو وعا زنودي الليل نام
لكن معك رح اكتفي بقول المتل***بيت السبع ممنوع يخلى من العضام


حسون :2

يا ألف صلى عليك يا سيد الورى*** ابنك انا سبع المعنى اللي افترى
والمقبرة العندي لشعرك مجزرة*** مدفون يا بشار فيها عنترة
واليوم جيتك لا شفق لا مغفرة*** بسيف سيدنا ابراهيم اللي اجترى
ومن بعد ما ذقتك عشا قبل العشا*** زت السبع عضماتك على المقبرة

بشار:2
حسون كلما الجوع بعروقك مشى*** بزّقمك عالريق بسكوت ونشا
صوت الضمير الفيك عا حسابي ارتشى*** وحنيّتي حطط على عيونك غشا
وما زال مكمن غايتك عنك وشى*** مجبور اني فهمك سر انفشى
البيريد يشرب خمر من كاس المسيح*** المفروض يستهدي على سر العشا

كلما نسيم الفجر عا صوتي انتشا*** بيركض يفيق مي ويبورد رشا

حسون:3
حاجي بعز الصيف تزرع كستنا***ما الشعر رخص كتير منك ما اغتنى
ومن فوق عنقك سيف ذمتنا انحنى*** احني جبينك للقمم يا منحنى
وتا تحس سر الموت عا روحك دنا*** عشيتك الردات بصحون الفنا
ونكنت حامل سر آلام المسيح*** صرخة مسيح الحق عالمنبر انا

بشار :3
دشر مسيح الحق عالعرش الكريم ***ما بيكسر الميزان تا يعين العقيم
بكلمة انا سلمت روحك للجحيم*** سلاح ذو حدين ما بينفع غشيم
طلّع على المنبر وليد المستقيم*** بتشوف توما القطّب الجرح القديم
وحدو مسيح الموهبة ما بينصلب*** تا يصلب اللصّين حسون وسجيم*


*نجيب سجيم

حسون:4
يا بو طليع المجد خجلت الجميع*** جايب فرخ بو حنين عالجو الصريع
مينك يا غبرة زتها خيالي الرفيع*** مينك يا شتلة علت موتها الصقيع
بعميك بهواية معنى عالسريع*** تا تصير تفهم مين هالجوق المنيع
صلبني بليلة عز بيموت الوفا*** واصلب نجيب الموهبي بيخلق طليع

بشار:4
عمر الوفا عا حسابنا وعمرك الك***لا تغصبوا يسرّح رباط مشاكلك
وعدل الطبيعة انْ راد مش راح يسألك*** يصلب عبد أخلاق تا يخلق ملك
جرّحتني والله انا بعرف ولك ***ببو الحسد ما بيشبعو وسع الفلك
ما حضرتك لو عندك شوية حيا***بتعيش تا عين الشماتي تقتلك


حسون5:
يا عين قنيه الحب يا منبع غني*** متلك انا موهوب خيرات الدني
قلبي انقطف تفاح من خير السني*** وفيي الكرز بيذوب رعشي مكوني
لكن انت يا عشب ميت منحني*** اسمك قبل ما تطل عالدنيا فني
بتفقد حياها الأرض بتراب الوفا*** انكانت متل فضلك عرايا دافني

بشار :5
حسون حتى تقدر تغرد مليح***لا تشحذ الاعصاب من عجز الكسيح
الارض اللي خلت بيّنا آدم جريح*** دفنت بقلب ترابها منيح وقبيح
سماع مني حط حملك واستريح*** ما بفهّمك انو كلامك مش صحيح
لو كان آخرتي بأرض مش طاهرة*** ما كنت كيف ما تبرم بتقشع ضريح

العاري الوحيد بملعب الفكر الفسيح*** عاري خيالك من التفكير الرجيح
وعاري كلامك من الصحة يا فصيح*** يا لبّسو يا عجّل من الدرب زيح

حسون 6:
زرتك يا سيدي الخضر والقلب ارتمى***زرت النبي سلطان من بعد الظمى
وسيدي ايليا بداخلو الطهر احتمى***وست شعواني قداسي للحمى
هودي بضريح الطهر مسلكهم نما***لكن انت نمرود عايش بالوما
نمرود حلموا كان يشقع خالقو***احلم متل نمرود تطلع عالسما


بشار 6 :

صحح كلام مطرطش بدم الوجل***نمرود حارب ربنا عز وجل
ناقص امام الكل يا فرخ الحجل***تبكي من الايمان بيكفي دجل
نمرود صورة عنك بقلك اجل***غذى غرورك بس رب المرتجل
كلما قشع نمرود متل حكايتك***بيكرر التاريخ عا منبر زجل



باقي الختام بكرا ان الله راد بنزّلو



تحياتي

[المغربي]

يا شاعر الكلمي ليخيلك ما كبي
يا فارس المنبر بسطوي مرعبي
قبالو كل ما طلعت عمنبر زجل
عميقشعك خليل ابن المغربي

حلو يا ملك .. وعين قنية اعتزت فيك وبطلتك كمان .. وكان شرف كبير النا.

تحياتي يا خليل الشعر

[عصام يوسف]

المشاركة الأصلية كتبت بواسطة بشار

بشار معنى:
يا عين قنية يا عروس ملبّكي ***ما بتنوصف روعة مساكي الليلكي
عن مجدك التاريخ بيحب الحكي***حتى القدر كوعو عا كتفك مرتكي
أهلك كواكب بالليالي الحالكي***وبقلب كل انسان جعفر برمكي
ونحنا حملنا قلوبنا وجينا لكي***بعاطفة مجنون وبحنكة ذكي
تا نقول للبيحبنا وعم يشتكي***عن أرضنا المن عند الله مباركة
كلما العطش طلّع عليها من بعيد***بتقرص الشلال تا يبلش بكي

يا عيني يا بشّار ... عيدا و زيدا !!!!

عصاممعمحبّتي