من د.إياد قحوش للشاعر حسان بسطاطي | |
هديه للشاعر حسان بسطاطي بمناسبة فوز جائزة سعيد عقل به
طَقْس القْيامِه
_________
طَفَّيْت وِجِّي
وِدْخَلِتْ .. دَفِّي سْرير الرُّوح
وْ بَلَّشْت هَجِّي
غَيْبْتِكْ
دَمْع .. وْ حِزِنْ .. وِجْروح
قَدَّيْشْ شَمْعِة هَيْبْتِكْ…!
بِتْمُونْ عَ الأشْواقْ
تا كِلّ ما سَكَّر حِلِمْ .. لاقِي حِلِمْ مَفْتُوح
***
شُو طَلَّعِكْ
مِنْ زِرّ غَفْوِه مْنَهْنَهَا
عِرْوِةْ صُوَرْ..؟
وِحْرُوف
تاكِمّ وَرْد العاطْفِه
الزِّرّ اشْتَهى
وْفَتَّح قَمَر
عا كِمّ ليْلِةْ صُوف
****
بْخَدِّ المْخَدِّه شِفِتْ شامِهْ..
بْتَعِرْفي؟
يِمْكِنْ لهيب الشّوق .. تـَ تْنامي
حَدّي
نَقَفْ عا شَرْشَفي
صوت الْبِكي
وْعَلّم صَدى .. وِجِّكْ عَ المْخَدِّه
يِمْكِن حْرَقْتي بْغَيْبْتِك
خَدِّي
قَدّيش ليْلك بـارِد .. وْحـامي
هالطّقس يِمْكِن طَقْس اْلِقْيامِه.
د. إياد قحوش 14/11/2007
| 
