اتكلو عالرب

حسب اتفاقنا أمس
بتمنى نبلش بالعتابا
وبتمنى نكمل العتابا /
نتلتها متل العرقات الطيبات

وبهالمناسبة بدعي الجميع
وبقترح أنو الشاعر اللي بيتلت
يقدم للشعراء الباقيين بيت أو أكثر
للتتليت
والأمر عايد الكن

واسمحولي بلش

***

حضوري وغيبتي وصحوي وسكري
وقصري وخندقي وأرضي وسكري

***

الأصل

من يوم يا شاعر ما تفكيرك كسد
وقّف المحل بوجه إبداعك كسد


التكميل:
ونشا الله يعجب الشعراء

يا ريت كل شاعر على نفسو انكسد
وفكر بشعر جديد ينعش قلبنا



انكسد : رجع لنفسو


****

للتكميل


بدي المواهب انشلا من ضياعها
وبدي الحقيقة رجعا عا ضياعها

من كتر ما اتطلعنا فيكي عِمينا ------تصرنا متل مركب تايه ع مينا

حبيب القلب كينو

حبيبي القافية الماضية تبعي بتتلت مو صعبة بس القافية هيي

عابرشلونة ..مو شلونا

بس بتمنّى من الجميع تكون الردود منظّمة أكتر من هيك .
وتكون الأبيات اللي بتحتاج التتليت أو التتليتات ..تكون موزونة
وهالشي واجب عالجميع

مع حبّي للكل

سامحونا

الحبايب الطيبون والشعراء الممتعون تحية لكم
اسمحولي أعمل جرد على بيوت العتابا اللي انكتبت لحد هلق

مع ملاحظة أنو التتليت مو أنك تلاقي القافية التالتة بس
لا !!!
التتليت هوي : أنو لما ينقرا البيت ( بيت العتابا ) بعد التتليت يكون بيت كامل
متل اللي بيعمر طابق تالت ببناية لازم يكون لايق
أو اللي بيلبس جاكيت على قميص وبنطلون
لازم تظبط الألوان.
وهلق بعد اذنكن رح جمع الأبيات اللي كتبتوها :


جعفر :

حضوري وغيبتي وصحوي وسكري
وقصري وخندقي وأرضي وسكري

الأستاذ محمد كمل البيت وقال :

فوتي معي ع الغرفة وْسَكْري
ما بدي يشوفنا أغلى لِ حْباب


****

حضوري وغيبتي وصحوي وسكري
وقصري وخندقي وأرضي وسكري

فوتي معي ع الغرفة وْسَكْري
ما بدي يشوفنا أغلى لِ حْباب


العبرة هون مو بالقافية
والقافية هون مو صعبة
إذن العبرة بتنسيق الكلمات تيصير بيت كامب


***************

محمد

يا شاعر لا تْنط على مْواجي
انا رايح تأ جيب العَلَم وآجي

البيت موزون بس بدنا ننتبه عاللهجة

التكملة: فاتح
إذا بتشوف نار العِلم واجّي
تعلّم ترتقي بنظم العتاب


البيت بيصير :


يا شاعر لا تْنط على مْواجي
انا رايح تأ جيب العَلَم وآجي

إذا بتشوف نار العِلم واجّي
تعلّم ترتقي بنظم العتاب


**************************


الأصل / فاتح

من يوم يا شاعر ما تفكيرك كسد
وقّف المحل بوجه إبداعك كسد


التكميل: جعفر

يا ريت كل شاعر على نفسو انكسد
وفكر بشعر جديد ينعش قلبنا


بيصير البيت:


من يوم يا شاعر ما تفكيرك كسد
وقّف المحل بوجه إبداعك كسد

يا ريت كل شاعر على نفسو انكسد
وفكر بشعر جديد ينعش قلبنا

*******************


جعفر:
بدي المواهب انشلا من ضياعها
وبدي الحقيقة رجعا عا ضياعها

محمد

ضَاعِت الدَّولة وْلَ تبكو عَ ضَيَعْهَا
الغالي راح لَ تبكو عَ السَّراب



والبيت بيصفي:


بدي المواهب انشلا من ضياعها
وبدي الحقيقة رجعا عا ضياعها

ضَاعِت الدَّولة وْلَ تبكو عَ ضَيَعْهَا
الغالي راح لَ تبكو عَ السَّراب


**************************

محمد

لا كَلْب فِيِّي كُون وْلا بِسّ فيني
ولا كون سَمْكةِ شَارْدِة بِالسَّفينة

شفيق
ويا عيني على هالرد الحلو
وزن ومعنى

عندك للهريبة بسّ فينـة
يا فاتح شرّع بواب الهرب

بيصير البيت

لا كَلْب فِيِّي كُون وْلا بِسّ فيني
ولا كون سَمْكةِ شَارْدِة بِالسَّفينة

عندك للهريبة بسّ فينـة
يا فاتح شرّع بواب الهرب


*****************************

شفيق

بـدّي طيّـرك عـا برشلونـة
تأعرف لو كنت عابر شو لونا؟؟


كينو:
من بعد مني قلي المنابر شلونا
وكيف حالها بعد هالغياب

وبيصير البيت


بـدّي طيّـرك عـا برشلونـة
تأعرف لو كنت عابر شو لونا؟؟

من بعد مني قلي المنابر شلونا
وكيف حالها بعد هالغياب

********************

وهون أرجوكم ما بدي علق على أي شي
بس بتمنى من كل شاعر أنو يكمل البيت اللي طلب منا تكميلو
على الأقل حتى نقارنو مع تكميلنا نحن
ونعرف مدى نجاحنا
ومدى تقصيرنا
ونتعلم منو

مع ملاحظة وحدة زغيرة
أنو نحن عم نكتب وزن وقافية
وأرجو أخذ ذلك بعين الاعتبار

بتمنى ما تزعلو مني

بكل المحبة عم أكتب الكن
جعفر