اتكل عا الله يا شفيق....

[Romel]

عنك عرفنا يا شفيق بهالوجود=رافع مهند شعر و مبارز حشود
لكن عند ما بتطلع الجولة معي=إرفع عشر صابيع بعيون الحسود

[شفيق]

شفت الحسود موقّف بجنب الطريق=عيونو بتقدح نار وبتنضح حريق
ولمّا حسدني قال (خصمك بعرفو=أهون خصم نيّال قلبك يا شفيق)

[Romel]

ان شفت الحسود اللي كلامو مستقيم=ما في حسود اختار أربحاك تديم
و ال دفشك ب(نيّال قلبك) عالحوار=عم يضمر ال(الصحتين عا قلب ابراهيم)

)

[mohamad kh]

غنَّا إبراهيم وكان عَ المنبر نجيب = وغنَّا شفيق وكان عَ المنبر أديب
نيال قلبك يا إبراهيم ويا شفيق = إل ما عْلِقتو بإيد؛.... محمد خطيب

[شفيق]

اكلت (الضرب)من حاسدي عالحالتين=و طلعت عقلبك بدل ضربة ضربتين
ضربة شفيق و ضربة عيون الحسود=و عاللي اكلتو عم يقلك صحتين

[Romel]

ضربة العين الحاسدة الما تنحملْ=كانت عادقنك ردها لأوّل جُملْ
و اتريك "صحّة" واحدة لضربة شفيق=ما بتحرز ال"صحتين" عا لحم الحمَلْ

[شفيق]

كانت عدقني وأنت شقلبت الدعا=وصارت عصحّة قلبك, وعالادّعا
ما بتشبع ولمّا شي لحم يشبّعك=تكرم تأبدلّك (الصحّة) بأربعة

[Romel]

يا بولحم عا قد ما لحمك تخين=وقت اللي بدو بطبقو لحم بعجين
و بدشر العضمات عا شفافي علام=تحكي نهاية لي تهجم عالعرين

[شفيق]

شفافك عضام وباللحم أمنيّتك=بعلمي الحمل عا فراش جوعك بيّتك
بعد اللحم جايي على أكل العضام=خلّيتنا نشكّك بإنسانيّتك

[Romel]

العضمات عا شفافي قلت ما في جدال=مش للأكل! هيدي رسالة تفهمّو
و كيف رح كمّل على عضامك مازال=قدرنا بألف ويلاه... لحمك نهضمو؟!

[شادي75]

ابراهيم وشفيق...... حلو ياشباب...

----------------------------------

شادي عم يقرا الأفكار .........ب هالردات الشعريهِ
ومابيعطيكن ياشـــعّار ........ إلا الميــهِ عْلى ميــهِ..


-------------------------------------------------

[شفيق]

عملناك ما بتشبع طرف عينك غشي=ومشيت عكسي وعكس ما ردّك مشي
وان ماانهضم لحم الذكي شو عيّرو=هي مشكلة صغر الحجم بالبرغشي

[Romel]

لا تدّعي و تقول بعد التجربة=كل شي صغير الحجم ما بيهضم عقاب
و لو غص فيك النّمر ما في مهربة=ابن التراب بيهضمو دود التراب

[شادي75]

عال يا ابراهيم.............

[شفيق]

قلّي أنو أفضل يا بو الصغر العطوف = دود الأرض يمّا بقايا الفيلسوف
ودود الأرض لو صرت بسمحلك تجي = تاكل شفيق وتعزم رفاقك ألوف