جئت أهلاً ووطئت سهلاً، نزولاً عند رغبتك، سيكون لي شرف الحوار مع الشاعر بو علي حسن بنوت عن الغربة والوطن متمنية أن تنال إعجابك، وإعجاب الأخوة الأكارم عشاق الزجل في منتدانا الغالي مشتاوي .
لمّا الشعر يفتح بواب المرجلي =والغزل ودروب الحلا والدرغلي
ولما الحديقة بالورود بتنتلي= عصافيرها عالشجر تبقا مشكلي
ولما الحلم بيطل من أرض الزجل = بيكون خيّم بالحديقة بو علي
*****
يا جنينة الشعر البعيده حدودها=ناوي الليلة بو علي عا ورودها
وشوف الصبايا والشباب وفودها=واقطف من كروم الحلا وعنقودها
ويا ثنا جنينة لقصدها بو علي=إلا بوجودك ما بتحلى ورودها
*****
__________________
الزجل هو خطاب الروح وهمزة الوصل بين الجسد والآلهه.
***
طيور الحديقة وعطرها وألوانها=غنت لها الكون الحلو ألحانها
أوروبا لأمريكيا ميدانها=وبيضل بالشرق الحلو عنوانها
ومهما اغتربنا بالعمر يا بو علي =طيور الزجل بتحن عا أوطانها
*****
بلادي رغم بعد المسافة بعدها=بقلبي وجايي نهار أوفي بوعدها
وياثناء عز النفوس وسعدها=لما الحبايب تلتقي مع بعضها
ويللي ببلاد الغرب عم ياكول عصي=غير اللي قاعد بالجنينة يعدها
*****
__________________
الزجل هو خطاب الروح وهمزة الوصل بين الجسد والآلهه.
هالعصي يا ما بغربتي عديتها= والآه ياما بمهجتي خبيتها
وخدود يا ما بدمعتي سَقَيْتَها= حتى ورود جنينتي ربيتها
ورغم الهجر والقهر وليالي العذاب= بلاد متل بلادنا ما لقيتها
*****
ببلاد فرقت بين خي وبين خي=بتشعر مغرب بين حي وبين حي
وهيدي اكيده متلها ما بشوف زي=مهما برمت بهالدني وبقيت حي
وخيي إذا بقلو انا راجع بيقول=الأوضاع منها رايقة انطرلك شوي
*****
__________________
الزجل هو خطاب الروح وهمزة الوصل بين الجسد والآلهه.
يا فكار في جو الخيال تنزهي = تا يضل بستان الشعر أخضر بهي
يا موطني إنت الأمر أنت النهي = وما بيملك الإنسان كلشي بيشتهي
بينتهي التاريخ وبتفنى الدني= وحبي إلك يا سوريا ما بينتهي
شكرا كتير كتير الكن على استجابة طلبي واتمنى من اختي ثناء واخي ابوعلي ان كل واحد ياخد قسم مثلا الاخت ثناء تاخد الغربة والاخ ابوعلي الوطن او العكس اذا سمحتو لاني والله متيم كتير بأشعاركن وأشعار الاساتذة في الموقع بس ياحسرة بحب الزجل كتير وما بيطلع معي شي وبتشكركن مرة تانية وياريت انكم تابعو الموضوع وتتحفونا بشعركن الرائع
*****
يا ليل خدني مع نسيمك والبرود=نوزع قوافي عا بساتين الجرود
مش هم ما ننسا سوا تراب الجدود=البيهم يصفا الوضع تا نقدر نعود
شايف انا رح تنتهي اعمارنا=وما تنتهي الكذبه ولا كلمات الوعود
*****
__________________
الزجل هو خطاب الروح وهمزة الوصل بين الجسد والآلهه.
الشعر يا إخوان في قلبي قطـن ............والعمـــر لحظة فيها عقلي فـطن
من بعدما بيضيع بالغربة العمر.............بنرجع تحتى نغترب جوا الوطن
أخواني الأعزاء : أرجو أن تعذروني على تطفلي ولكن هذه هي مشاركتي الأولى في هذا المنتدى الرائع وقد آثرت أن تكون في قسم الزجل من شدة حبي لهذا النوع من الشعر
شكرا" على سعة صدركم وأتمنى أن تقبلوني بينكم متذوقا" لأشعاركم الجميلة المفيدة ............أخوكم المحب
