( شعر اللغة المحكيّة )
اللغة المحكيّة, حَرف انفـَلَتْ مِتل الأوف من حنجرة جَبَلي, مِتل الأهْلا من طـَلّة العَتبات الفقيرة, وضَلِّت تِتعَكَّز عالخوف وتِتدَعْتـَرْ بالموت حتّى وصلِت لَرَبيعا الأخضر تحمل فيه الفكر الجديد والوعي المبدع. ومِتـْلا مِتِل اللغة الفصحى, عَـذ َّبا الأتراك, وسَجَنا الدَّرَكْ, وفرفـَط حروفا الإحتلال, لكن ضَلِّت أقوى من البارودي المْشِرَّة,والأيادي الغادرة والنفوس المْعَتـْمة, ورجْعِتْ تعانِق الفصحى عناق الخَيت لَ خَيتا, عناق الحَرف الجديد للحَرف المْعَتَّق بالبرواز, الحَرف الجديد هوّي الحَرف العربي المِتـْمَرِّدْ عالضَّمِّة والكَسْرة والفـَتـْحة اللي بآخِر حَرف الفصحى, وهوّي ساكِن الآخِر.
الحَرف الجديد مِشْ ضد الفصحى, هوّي لغة ضَيَعْجي القرن العشرين اللي لابـِسْ بنطلون وبرنيطة وبيشتِغِل بمَعْمَل الذ َّرّة وبيركب المَدفع والدَّبابة, ما بتلهيه قاعِدة تقديم المبتدأ عالخَبَر, ولا بيشغلو إعراب الأفعال النّاقصة عن خَلق المجتمع الكامل.بهالحَرف الجديد, واللغة المحكيّة, عَمْ بلتقي مَعكُن وبتمَنّى تحِبّوه مِتِل ما بحِبكُن.
الشّاعر المرحوم عيسى أيّوب هوّي اللي كَتـَب هالكِلمات, وهوّي واحد من عدّة شعراء كَتبوا اللغة المحكيّة,لغـّة البَي والإم, لغـّة الجـِدْ والسِّتْ, لغـّة الضَّيعة اللي عَرَّف عَنّا عيسى أيّوب:
هَونيك ضَيعِتنا
مَطـْرَحْ ما زِند بيعْبَدْ المَنـْجَـل
والدّالية جَرّة خَمِرْ .....
والتّانية بْتِسوى عِمِرْ .....
مَطـْرَحْ ما ألله عانـَقْ وطـَوَّلْ .....
وبَوَّسْ وكَـتـَّرْ .....
مَطـْرَحْ ما بتشوف الدّني غـَير الدّني
وأزغـَرْ مَرا ... بتجيب خَمسة بالسِّنة
وان شِفِت شي طِفـْلِ بْحِضِنْ إمّو
بـِتـْقـَمْطو بـِدْيالْ مَريولو ...
تـْضَمّو لَصِدرا ... هَيكْ ... وتـْشِمّو
تبوسو بـِمَطـْرَحْ بـِسْتِحي قولو ...
هَونيك ضَيعِتنا .............
عيسى أيّوب ما كَتـَب قـَدْ ما رَسَمْ لوحات بالحروف والكِلمات البسيطة,عِشِق الشعر وقال عَـنّو:
يا هالشِّعر ...
هَمّي إنت
ووَجّعي وملح جروحي إنت ...
ولا ... يا شعر
وحياتـَكْ , لَولا ما بْتِجْـدُ لْ شَعر الصَّبيّة بصابيعَـكْ
كِنتْ ببيعَـكْ
لَولا ما بْتِغـْفى عا صدرا ...
هَون مخَدّة ... وهَون مخَدّة ...
كِنت بجافيك , وما بطيعَـكْ .........
عيسى أيّوب رَسَمْ الضّيعة بكلماتو وبـِحْروفا , رَسَمْ صبايا الضَّيعة مِتِل ما حَبْ يشوفـُن , وحدي سَوسَني, وحدي تفاحة:
يسلَمْ تفـّاح المَشْتـــــى ................ عا كِـلْ مْطِـلْ
وهالتـّفاحة اللي قطـَفـْتا ................ سِـكَّـرْ عالْحِـلْ
وهاي بَعِض اللوحات اللي رَسَما بكلمات الضَّيعة البسيطة:
ـ نامي على زِنـْدي
وضَلّي العِمر عِندي
وان كان بَعْدِكْ خايفي من النَّوم حَدّي
بْنـَيِّمِـكْ حَدّي ...
وان كان ما بيرَيِّحِكْ صِدري ...
عا صِدري تفـَضْلي سْتِنـْدي
صِدري إلِكْ فـَرشي حَنوني ...
ورَقبتي مْخَـدّة ............
ـ يا غـَيم ما بسافِر بَقى ... تـْرِكْني مَعا
إحْـلَـــمْ مَعا
إكْتـُب شْعورا بْلا حروف ..... وسَمِّعا
وما بَين شِفـِّة مْصَيِّفي
وجـِفـْنا الِمْرَوَّجْ ينطِفي
بشوف الفصول الأربعة
تـْرِكْني مَعا
حِطـّا بـِقـَلبي وضَيِّعا
ويا قـلب حِبّا ..... بَسْ أوعى تـْوَجِّـعا ..............
ـ بوسْـني ... مو هَيكْ يا أَزعَـرْ
قـَدْ ما نـَصَحْتـَكْ ... ما بْتِتـْغـَيَّرْ
بَعِرفـَكْ مِنْ يَومْ كِنتْ زغـيرْ
بـِتـْموتْ عالمَعْـقود بالسِّـكَّــرْ ................
ـ عْيونِـكْ الأدفى مِن حَنان السَّوسّنة
خِلقو قـَبـِلْ ما يخْلَقْ السِّحر .. بْسِني
ولَوما يكونو بالدِّني ... كان الحَلا
خَزَّقْ تيابو وقال: يقـْطـَعْ هالدِّني ...............
شكراً لكم وعذراً للإطالة , وأرجو أن ينال ما كُتِبَ الإعجاب .
 | 
لوحة التحكم الخاصة بك
خروج
بحث
الأعضاء
التقويم
