يا مشتى اليوم جاييكي بعرضي............تقدّملك بعرض النصرعرضي
بأرضك قال منبرنا السماوي.......حفظت عهد الصداقة وصنت عرضي
يا أم الشعر يا أمّ الحلاوي...............يا مشتى الحلو فيكي كتبت فرضي
أنتي أمّ أشعار الطلاوي........................وأنا لأمّ المعنّى ابن مرضي
رجف قلب السما وقال بحماوي......الفزع شفتو اعترى طولي وعرضي
هيدا الشاعر العالنصر ناوي.................شفيق الاحترامو صار فرضي
وإذا شفت الدهر عالحرب ناوي..........يا مشتى وافقي وعالحرب ارضي
لإني يوم ما بحمّي المكاوي.................بهالمشتى الدهر قادر ع صرعو
..............................الجماعة حبايبي والأرض أرضي....................
الشعر عطر وحلا وصدق ومحبّي.........مش حكاية بشو ما كان عبّي
وأنا بالمنبر الزجلي مسرسب..................نبيّي الشعر والتجديد ربّي
بعشق ينقدوني نقد أنسب.........................لإني متل ما مربّى مربّي
بس اللي رفض هالنقد ينسب................بعيني ما فرق عن جرن كبّي
وأجا خصمي بفكرو رح بيكسب...........وعيوبو بالشعر حاول يخبّي
وقلّي ليش شعرك هيك سبسب؟؟..........وجوابي بالصدر ناطر يلبّي
وأنا بقلّو المسبّة بكل مكسب.................عليي بالشعر مش مستحبّي
لكن رح بسبّك لو بترسب....................لأنو كل واحد متل فضلك
.........................ما خرجو سمّعو إلّا مسبّي.......................
أنا عا منبر الأشعار عمّك...............احترم عمّك لحتّى يزول همّك
فرجينا إذا شعرك مضوّى..................حتّى نكشكشك حتّى نضّمك
لا لا..المتلك فضلك مش مقوّى.........وغرورك فرّخ الشوكة بتمّك
غرورك ورّطك في صوت دوّى.....وإجاك اليوم من يعرف يطمّك
سبحان العمل رسمك وسوّى.................ذمّك همّك وغمّك وسمّك
كل شي خالق نعومي بحوّا................نزعها عند ما هالشب سمّك
وأنا بالرّغم ما سيفي تبّوا....................علوّو وقادر بلحظة يجمّك
ما بدّي ادبحك برّا وجوّا...................ولا بدي يجرحك سيفي لأنو
...................إذا دبحتك ما رح بيسيل دمّك..........................
وأنا عمّور ما بكسّر حسامو..........ولا فيّي شوي نقّص احترامو
وما زالو مقامو من البدايي.........مافي بالشعر أوطى من مقامو
لا وزن ولا معاني ولا قرايي......ولا بيسهر على جوهر كلامو
بعمرو ما قشع شكل الدوايي.........لانّو رصاص جايبهن قلامو
أنت شو أنت قلّي يا ضنايي؟؟.........حتّى تحارب الشعر ونظامو
ما في عندك وجود ولا درايي..............بأنك للشعر اخر زلامو
قالولي عمر جايي ورايي................ تا يتحدّى شفيق باهتمامو
إذا سهامو رماها على حمايي............بدّي ردّ عا صدرو سهامو
ألو في كسرة الأوزان غايي............وأنا هاجم بحربي عا سلامو
متل ما كسّر الأوزان جايي..................بهالليلة تكسّرلو عضامو
ونحنا أربعة سويّة طلعنا..............طرحنا كتير ساعة ما جمعنا
ووقعنا وقت نقّينا, بحيرة..............ويا ريت بهيك حيرة ما وقعنا
أنا وبو ادم وشادي عشيري..........ت نسمحلك تجي وتقول معنا
قبلنا نقابل التوب الحريري..........بتوب الخيش يللي بدون معنى
تفاخر يا عمر عا كلّ ديري............القبلنا نوضعك في مجتمعنا
وسمحنالك تجي لجوقة قديري.....وتصفصف حكي يزعج سمعنا
لكن شفقة النفس الكبيري................مانع عن طرد اسمك منعنا
وبدي اليوم تسمح يا ضميري.........كل شي بالتلاتة في مواهب
.............................عمرنا خرّب الجوقة ونزعنا................
وتذكّر يا عمر من قبل مدّي......................لمّا كنت بعدك طفل حدّي
نصحتك تنطر شويّة تتكبر....................وعلّمتك صمودي والتصدّي
وفرشتلّك بقلبي كلّ معبر.......................وكشكشتك على كفّي بودّي
ووسمحتلّك تباريني ت تظهر...........وكنت وقت الضرب ما شدّ يدّي
لكن وقت شعرك صار يبطر....................وبلّشت التمادي والتعدّي
وصرت تكسّر الأوزان أكتر................الهمزة تحطّها فتحة عمدّي
قلت :لازم بقا عالحرب اظهر.........ت خلّي اللي مصدّي مش مصدّي
وت حرّم ناس تطلع فوق منبر............لا من وزني ولا بالشعر قدّي
ويا عمّور مش بعدك صغيّر.....................ت تدلّع عجدّك بالمودّي
طيع لجدّك واركع يا أشقر....................متل ما بعدني بركع لجدّي
الإجو شافو التحدّي, بكل مظهر..............حبّة حبّت تصارع مهدّي
أنا البالعنترة فزت على عنتر............وهيك رجال يا محمد ما بدّي
أنت حدّي بليل الشعر اسهر...................بدّي جذر فيه يحد مدّي
بعلمي عا تحدّي جيت احضر..............مش جايي يا بو ادم ت لعّب
........................ولاد صغار,,هيدا مش تحدّي...............
وعمر حالو نسي وخان الأماني..........وعمل حالو النبي موسى بتفاني
أنت مش متل موسى اللي بجلّو........أنت من شعب موسى الكان جاني
ولنّك بالمعنّى رفيق خلّو........................ولنّك في أصولك كسرواني
أنت غصن انحنى تا يطول ظلّو.........انكسر راسو كتر ما صار حاني
وإذا حابب كلامك تستهلّو ...........................وتتفاخر بشعّار الغناني
الشعر مش أورغ و وغناني عحلّو............ولا جملو ولا مرمر زماني
وشعر موسى وعصا موسى الما حلّو.........وكل شي قلتن بهالاسطواني
خلقهن ((((سيّد))) الكون بمحلّو......................ولولا سيّد الأكوان أكّد
..............................ما في عندك لا موسى ولا دياني.................
بيكفي اسمي ....شادي... 
