رجــعـــوا الشـــــــــــــــــــــــــــــــــــــــــــــــ ـعار

ثناء حيدر · #1 26-01-2006

نرجو أن يعود شعار الزجل إلى مواقعهم ويلبوا دعوة الأستاذ رامي

جعفر حيدر · #2 26-01-2006

المعذرة
حصل خطأ بالدخول بين اسمي واسم زوجتي / ثناء
لأننا نكتب من نفس الكمبيوتر
والمشاركة الأصلية لي

جعفر

------

جعفر إجا من بعد غيبة مطولة
جايي تا عرش الشعر وحدو يعتلي

الشعار صارو واقعين بمشكلة
رح رقصن يا هويدلك يا هويدلي

وعمار هالشعار بدي اقصفا
وأول قصف رح ببتديه ببو علي

-----

حسن بنوت · #3 26-01-2006

*****
جعفر رجع يا ناس طلـّي وقشعي
مطوطح بنص الدرب ماشي بلا وعي

بقصف العمار بالبهوره عم يدعي
ويا ويل ويلو علقتو طلعت معي

من قبل ما يوصل تا عمري يقصفو
رح يوصلو من هون قصفي المدفعي
*****

جعفر حيدر · #4 26-01-2006

منو حكي يا بو علي ولا بهورة
قصف المدافع ما بيخوف عنترة

هيدي الحقيقة الواضحة لكل الورى
وضوح الشمس وقت الضهر من منطرة

البيمد ايدو اليوم عا قوافي الزجل
إلا بزجل ... بيكون عا روحو افترا

شفيق · #5 26-01-2006

شكر كبير للاستاذ الفاضل الشاعر الكبير جعفر حيدر على تنزيل هالموضوع الحلو ..
وشكرا للشاعر الكبير أبو علي حسن بنوت ...اللي بيضل يتحفنا بشعر حلو ...وجمل مرتاحة بتذكّرنا بجمل المرحوم زين شعيب

أخوكم شفيق

حسن بنوت · #6 26-01-2006

*****
يا عنتر السهم العليي طالقو
وباب الموده خلف منك غالقو

النمرود من قبلك لاًلله شالقو
وعلاج بغرور البراسو ما لقو

وبالشعر وحروب القوافي بالزجل
ما بيكبر المخلوق علـّي خالقو
*****

جعفر حيدر · #7 27-01-2006

---------

إن كان ما بيكبر تواضع يا همام
خصوصي وشعري للشعر مسك الختام

تلقّى سهامي اللي طلقتها بإحترام
وصلي وكبر ربك وزيد الصيام

وبقدر ما برصّك يا سيد بو علي
لازم تزيد محبتي وتضرب سلام

حسن بنوت · #8 27-01-2006

*****
ما زالها صارت القصه مسايره
من بعد ما دارت عليك الدايره

اتطمن ما رح خليك نفسك حايره
وعالرص لو صارت عروقي فايره

بخليك ترجع لا سهام ولا سلام
وعا راسك بكسّر صحون الطايره
*****

جعفر حيدر · #9 27-01-2006

نفسي وحيرتها حكايي من الأزل
خلف الحقيقة راكضة بلغز الأمل

وهاك الصحون الطايرة بسرعة وعجل
هيّي متتكسر بدونك يا بطل

كلّ ما شافت شعر دوّى إلي
متلك بتتكسر ... بيقتلها الخجل

حسن بنوت · #10 27-01-2006

*****
يللي اعتبرت الصحن بوسه عالخدود
صحون وطناجر قد ما بتريد خود

بحيثك يا جعفر شاعر وقلبك ودود
والذوق عندك زين قوافي الردود

رح بكسر الشر وما بكسر خاطرك
وخلـّي المحبه البيننا من دون حدود
*****

جعفر حيدر · #11 28-01-2006

لما حسن بنوت في صحنو لطا
طنجرة شعرو ضيعت عنو الغطا

من حروف شعري اللي عليه مسلطة
خايف ... وبصحونو بيجزل بالعطا

وكرمال حبو النازل عليي غرام
رح كسر حدودي ... وبلش زلغطة

حسن بنوت · #12 28-01-2006

*****
ياليل ودّي نجومك لصوبي تجي
تسمع غزل وتعود ليك مبنجي

جعفر اٍذا من سطوتي الليله نجي
هيدا هيدا لاًنو الحب مني مرتجي

هات نتغزل سوا برمش الحبيب
وحّول السهم لزر ورده بنفسجي
*****

جعفر حيدر · #13 28-01-2006

سطوة الشعر العذب مش سطوة سهام
ولا حرب شعلاني ولا قتل ولا احتدام

يا بوعلي كلك عذوبة وانسجام
ورقة وغزل ... كلمات من ريش النعام

كيف لما تشد خيطان الغزل ؟؟؟؟
وتغزل من الكلمات آيات الغرام ؟؟

حسن بنوت · #14 29-01-2006

*****
كرمال خاطر قدها وفستانها
شرايين قلبي بتنغزل خيطانها

وبشد فارس همتي وحصانها
وبقطع جبال الكاينه ووديانها

وبعود حامل راية بيوت الغزل
الخلقان سيدها الوفي وسلطانها
*****

جعفر حيدر · #15 29-01-2006

وبعود حامل راية بيوت الغزل
اللي شالها الإنسان من يوم الأزل

اللي بكل نفس بتزرع بذور الأمل
وبكل تم بتزرع شفاف وقبل

ومن كل روح بتزع وجوه العلل
ومن كل قلب بتنزع شروش الخلل

وبكل عين مكحلة عالميلتين
شلال حب بتسكبو فوق المقل