الأحبة
شعراء الزجل ...
أتمنى أن تشاركوني هذا الموضوع ، بغزليات تسمو بنا إلى سماء الروح والعشق والحبّ ! ...
بكل المحبة .

يا نحل اجني من الزهر أحلى رحيق ---- ويا غزل امنحني على دربــــك طريق
ويا بحر عرّبش عَ الصــخور الهايمة ---- ويا ليل خلّي الســـــهر والموعد رفيق

متلك أنا يا نحل عم اجــــــــني غزل ---- متلك أنا يا شــــــــعر عم ازرع أمل
ويا ليل عم دوّر على وجــــــه القمر ---- تيصير لحظة غربتي حدّي صديق

بسَــــيْهر نجوم اللـيل والعتمات ...... والقمر عربش فوق عَ التــــلّي

ناطـــــــــــرا طلّي من الطـلات ...... يا ريت تمرق بعد شـــي طلّي

بنطر إجـر تدعس على العتبات ...... متل الزمـــــــــان الناطر الغلّي

متل النحل ... بيغلّ بالزهـرات ...... ناطر عسل بالشــــــهد تا يملّي

ونطرت ... حتى يبعت الردات ...... تاري حبيب القلب قاسي كتير

----- وكلشي حكى قلّي ... وما قلّي -----

تصحيح الزجلية
أعتذر عن خطأ مطبعي حدث أثناء الكتابة

نطرتَك يا غالي حـــدّ راس العين ----- والنبع حــــــدّي ... يدفق الميي

تحت مَدِّةْ حـــــور ... عَ الميلين ----- وشـــوشــــتها ما تقول يا خطيي

وعَ الشّجر كانو هَوْن عصفورين ----- بينغوشــــــــــو ع َالحبّ وعليي

يقلاّ شــــــوفيها ســــارحة ولوَيْن ----- تقلّو متلْ ما سرحتْ يا حســون

------ وع الســـّـــكتْ كنتْ تقولْ غنيي ------

وين القمر ... غافي ....... وين الحلو ســـرحان
نايم ... على كتـافي ....... ومن حبنا حـــــيران

كاس الهوى الصافي ....... وعم يشربو ســكران
يا حلو ... لا تجافي ....... محبوبك ... الولهـان

ناطر على حفــــافي ....... التاريخ ... والأزمان
تايقلك ... عـــوافي ....... وتبقى إلو ... عنوان

حكي الغزل ... يا حــلو ... يا أسمر ------ معربش عَ حيطان القلب واكتر
هوّي الحياة ... وطعمها ... عَ الحلّ ------ هوّي عسل هالعمر ... والسّكر

خليك حـدّي ... بس كلّ العمر --- وان كان ضاق، منوصلو بكم شهر
برندحـــــــلك مواويل وحكايات --- وإنت ... عم تكتب قبالي شـــــعر
ومنصير نجمـــة متل هالنجمات --- ويمـــــــــوت من قهرو قبالي البدر
ليالي الســــما بتضل عشقانات --- ونحنا عليها بعشــــــــــــقنا منمون

------- بلكي بطـــــــــــــوّل تا يجينا الفجر -------

يا حلو... يا ناطر ع مفرق دربْ --- قلبـي معـك ... لا تلوّعو بيكفيـه
مخبـّيك في عبّــــو دلال الحـــبّ --- عن كلّ هالدنيــي الهوى بيغنيــه
إغرق بحبـــّي ... بحلّفك بالربّ --- وضلّك بقلبي ... ندرغل غنانيه
وخلّيك جوّاتـــو ... غرامو غبّ --- بيكبر إذا بيعطيك ... أو تعطيه

ياليل ليّلْ يافجـــــــــر لا تطلّ --- خلّــــــي نجومك ناطرة حـدّي
ويا عتم غطينـي ويازهر الفلّ --- خليك لراس الحلو مخـــــــــدّة
غفينا ســـــــوا وأحلامنا بتغلّ --- يا ســــما ودّي ويا أرض ودّي
ياريتنــي بضلّ وحبيبي يضلّ --- غافي ع زندي الخدّ عا خــــدّي
ونبقى سـوا عشاق فوق مطلّ --- الضيعة ... وغير هَيْكْ ما بدّي
وياريت لا فلّ الهـوى ولا فلّ --- وقت المحبة من ســــــنين العمر
--- وياريت يبقى العمر عا قدّي ---

كلما الفجر شقشق على الأزهار -- وقطر النِّدي عربشْ على ورودي
والسوســنة الحلوة البهاك الدار -- شــــــــــافت حكاية حب مولودة
غارت النســـمة وزهرة الجلنار -- من غفوة المحبوب ع زنــــودي
وشوشتها ... قلتلها شــو صار -- هيدا حبيب القلب معبـــــــــودي
بصــــــلّي إلو ليل وفجر ونهار -- وبدعي بطول العمر بســجودي
بخبّيه جوّا العين بالأســــــــرار -- عا طول مش إيـــــام مــعدودة
بحلف بحق الآلهة عشـــــــــتار -- كيف ماجرى أو برْْمِتْ الأقـدار
--- رَحْ ضَلّ قصة حبّ مشهودة ---