خليل روكز وخليفة أمير الزجل | |
حوار بين كروان الوادي وخليل روكز على مسرح بيت مري في صيف 1948 بعد رجوع الكروان من رحلته الاولى إلى نيويورك .وكانت جوقته تتألف من الشعراء خليل روكز وطانيوس الحملاوي وعبده بدران غصن صاحب مجلة الشحرور.
خليل:
لما لبست التاج عا هامي الكبير……..ومن كتر ما عندو وفا وعندو ضمير
شاف عقلي قد تلتين الدني…………قلي شلحني صغير عا راسك كتير
كروان:
حاجي عيونك بالخليقة مفنجرة……بقطع نفاسك في مجاري الحنجرة
وما زال تاج الفن عا راسك صغير…….روح فوّت طاستك بالطنجرة
خليل::
مين متلي مين من الله انوهب……..نور المعنى من تكاويني شهب
والطنجرة لو لبستها عا هامتي……..بينقلب شحتارها روح الدهب
كروان::
عرشي سفينة وما حدى غيرك غراب……بتحوّل العمران بوجودك خراب
لو الطنجرة شحتارها تحوّل دهب……..بدو الدهب من لمستك يقلب تراب
خليل::
كان المسيح الحي يجلي من القشب……………………..والطنجرة حولتها حلة قشب
وحيث الدهب من لمستي بيصبح تراب…….ان حطيت إيدي عليك بتصفّي خشب
الكروان::
كل العقد كان المسيح يحلّها……..ومجموعة عمالك عقد عا حلها
حاجي بقا تعمل عجايب يا خليل…..وأنت معرض للعجايب كلّها
خليل::
الشمس صورة من جبيني جايبي……ولو ضحكت بتشوف الليالي دايبي
ولو كنت معرض للعجايب كلّها…….وشفتك أنا بتهون كل مصايبي
كروان::
الله بضرباتو جبينك خاربو………….….ما فيش قوة شمس يوم تقاربو
وما في عجيبي بالدني تغطّي عليك……ببشاعتك رقم القياسي ضاربو
خليل::
موقفك بالفن عاكس موقفي…….لمّا ظهر عا مسرحك سر الخفي
إياك تنسى في حياتك يا كميل……..حتى الحقيقة بالمعنّى فلسفي
كروان::
موقفك عن موقفي دقيقة وقوف…………..….حداد في جناز تذكار الحروف
ان كنّو المعنّى فلسفي..من الفلسفي…….بخلق نبي يعمل يعمل عليي فيلسوف
كروان الوادي كميل خليفة …من عمالقة الرعيل الأول انتخب خليفة لأمير الزجل اللبناني رامز البستاني بس مات قبل ما ياخد الخلافة عن عمر ال 64 سنة ..
تتلمذ شعريا على إيد استاذه وصديقه شحرور الوادي وهنّي التنين من ضيعة واحدة ..وادي شحرور ….
كروان الوادي من أكثر الشعراء غزارة بالانتاج الشعري وبالذات بالمعاني الفلسفية الاجتماعية العميقة والغزليات الرقيقة ..
وهوي انظلم شوي كروان الوادي بالرغم من شهرتو الكبيرة بعصرو بس ما أخد شهرة أعضاء جوقة شحرور الوادي
…غنّا بجوقتو …كتير شعراء ::مثل خليل روكز, زغلول الدامور ,أحمد السيد ,أنيس الفغالي ,أديب المحاسب,عبد الجليل وهبي,طانيوس الحملاوي جوزيف الخويري ,نسر المزرعة (متري الدرزي) وأمين حمدان ..وغيرن كتير ......
__________________
سامحوني
آخر تعديل بواسطة شفيق ، 02-01-2006 الساعة 11:19 PM.
| 
